Ebera 3 - Bibilia Tapu

PENE III - 3

E maata te Mesia ia Mose, e tei kore e akarongo iaia, e rai to ratou mate i to Iseraela.

¹ E TEIANEI, e te au taeake tapu, ko tei rauka katoa te kapiki anga no te rangi maira, e akamanako meitaki i te Aposetolo ra i te Taunga Maata o ta tatou nei tuatua, i te Mesia ra ia Iesu;

² Ko tei akono meitaki atu iaia i tei akataka mai iaia ra, mei ia Mose katoa i akono meitaki i te are katoa o te Atua ra.

³ Kua akonoia oki teianei tangata e, ei kakā maata tona i to Mose e tau ei, mei te tangata e akatu i te are ra e kakā maata tona i to te are.

⁴ E akatu oki to te au are ravarai nei; ko tei akatu ra i te au mea katoa, ko te Atua ïa.

⁵ E akono meitaki mou rai oki te Mose, ei tavini, i te ngutuare katoa o te Atua ra, ei akakite anga i te au mea e tuatuaia mai a muri atu;

⁶ Kareka te Mesia ra, ei tamaiti ïa i tona uaorai ngutuare: ko tatou oki taua ngutuare nona ra, kia mou piri tika rai tatou i to tatou irinakianga, e te tiakianga rekareka ra, ma te maroiroi, e tae ua atu ki te openga ra.

⁷ E teianei, mei ta te Vaerua Tapu i tuatua maira, “Kia tika ia kotou i teianei rā i te akarongo i tona reo,

⁸ Auraka e akamārokiakia i to kotou ngakau, mei tei te akakoko anga ra, mei tei te rā timata anga, i te medebara ra:

⁹ I ta to kotou ai metua timata anga mai iaku ra, kua akakoko mai iaku, kite uaʼi ratou i taku ra au angaanga, e a katoa ngauru i te mataiti.

¹⁰ Ongoongo rava akera au i taua uki ra, e kua tuatua akera au, E aronga ngakau tarevake ratou, e kare ratou i kite i toku ra au aerenga.

¹¹ Ko tei taputouia e au i toku riri anga ra e, Auraka roa ratou kia o i toku ra akaangaroianga.”

¹² Kia matakite, e te au taeake, ko te vai aea te ngakau kino akarongo kore katoa ki roto i tetai o kotou, i te akaruke anga i te Atua ora.

¹³ E ako marie ra tetai ki tetai auraka ei rā e tukua, koi vai ake te ao; ko te akamārokiakiaia aea tetai o kotou na i te pikikaa o te ara.

¹⁴ E puapinga oki ta tatou i te Mesia ra, kia tamou marie rai tatou i to tatou irinaki mua ra ma te maroiroi, e tae ua atu ki te openga ra;

¹⁵ Koi vai ake te tuatua e, Kia tika ia kotou i teianei rā i te akarongo i tona reo, auraka e akamārokiakia i to kotou ngakau, mei tei te akakoko anga ra.

¹⁶ Ko tetai pae oki, kite ua rai ratou, kua akakoko; kare ra i ope rava taua aronga katoa mei Aiphiti maira ta Mose i arataki ra.

¹⁷ I makitakita ra aia iaai, e a katoa ngauru anga o te mataiti? Kare aina i te aronga i rave i te ara, i tei topa to ratou kopapa i te medebara ra?

¹⁸ E koai oki tana i taputou ra e, auraka ratou kia o i tona ra akaangaroianga, mari ra ko te aronga kare i akarongo ra?

¹⁹ E teianei te kite ua nei tatou e, no te akarongo kore i kore ei ratou i o ki roto.