Ebera 13 - Bibilia Tapu

PENE XIII - 13

Ei takinga-meitaki a tikaʼi, ei akono oki i te orometua ko tei inangaro i te vaerua o te tangata.

¹ KIA vai marie mairai te aroa taeake.

² Auraka e akakore i te kite atu i te tangata ke ke ra: e angela oki tei kiteia atu e tetai aronga, kare oki i kite e angela.

³ E akamanako i te aronga i tapekaia ra, mei te mea e, kua tapeka katoaia kotou; e te aronga i takinga-kinoia ra, no te mea tei roto katoa kotou uaorai i te kopapa nei.

⁴ Kia akameitakiia te akaipoipo i te tangata ravarai, e te viivii kore oki te roi: e akava oki te Atua i te akaturi e te moeana ra.

⁵ Ei noo anga noinoi kore i te apinga to kotou; kia mareka i ta kotou i rauka ra; ko te Atua oki tei tuatua mai e, “Kare rava au e akaruke atu ia koe, kare oki au e taka ke ia koe, kare, kare rava atu.”

⁶ I tikaʼi ia tatou kia akamaroiroi, e kia karanga e, “Ko Iehova toku tauturu, kare au e mataku; eaa ta te tangata kia rava mai iaku?”

⁷ E akamanako i to kotou au arataki, ko tei tuatua mai kia kotou i te tuatua a te Atua; e aru atu i to ratou akarongo, ma te manako i te openga o ta ratou tuatua.

⁸ Okotai rai o Iesu Mesia tu, i nanai, i teianei rā, e tuatau ua atu.

⁹ Auraka e turori ua atu i te tuatua rikiriki ke ke tau kore ra. E mea meitaki kia maroiroi te ngakau i te aroa ua ra; auraka i te kai, kare oki a te aronga i rave ra e puapinga i rauka i te reira.

¹⁰ E atarau ta tatou, ko tei kore rava e tau i te aronga e akamori ki roto i te puakapa ra kia kai.

¹¹ Te kopapa oki o te au mea, no reira te toto i apaiia e te taunga maata i roto i te ngai-tapu ei tarangaara ra, i tutungiia ki vao mai i te puakapa ra.

¹² Koia katoā Iesu, i mate aia ki vao mai i te ngutupa ra, kia akatapu aia i te tangata i tona uaorai toto.

¹³ E teianei e aere tatou kiaia ra ki vao mai i te puakapa ra, ma te akakoromaki i taua akakino iaia ra.

¹⁴ Kare oki o tatou e oire e mou i ko nei, te umuumu nei ra tatou i taua oire ra no a muri atu.

¹⁵ E teianei e na ko tatou iaia ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.

¹⁶ Kareka te takinga-meitaki e te oronga, eiaa rava ïa e akatopaia; te pereperekavana ra oki te Atua i te reira atinga.

¹⁷ E akarongo i to kotou au arataki, e kauraro atu kotou; te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.

¹⁸ E pure ia matou: kia kite tikai oki matou e, te tika nei to matou akava-ngakau i te akakoro anga e, ei akono meitaki ta matou i te au mea katoa nei.

¹⁹ Kia akaoki vaveia ra au ia kotou na, i maata uaʼi taku tuatua ia kotou e, e akapera.

²⁰ E teianei kia akatau mai te Atua au, ko tei akaoki mai i to tatou Atu ra ia Iesu, i te tiaki mamoe maata, mei te mate maira, no te toto o te koreromotu mutu kore ra,

²¹ Kia akameitaki rava mai ia kotou i te au angaanga memeitaki katoa ra, kia rave kotou i tona anoano, i te akatupu anga i roto ia kotou i te mea tau i mua i tona aroaro, ia Iesu Mesia ra; ei iaia te kakā e tuatau ua atu. Amene.

²² Teia ra taku tuatua kia kotou, e aku au taeake, e āriki meitaki mai ana i teianei ako, i tata poto io nei oki au i teianei tuatua kia kotou na.

²³ Kua tukuia to tatou taeake ko Timoteo, kia kite oki kotou; e kia oki vave mai aia ra, e kite katoa atu maua ia kotou na.

²⁴ E aroa atu i to kotou ua arataki, e te aronga tapu katoa ra. Te aroa atu nei to Itale ia kotou na.

²⁵ Ei ia kotou ravarai te aroa ua. Amene.