Daniela 7 - Bibilia Tapu

PENE VII - 7

Te orama a Daniela i nga puaka taae e a, e no te basileia o te Atua: kua akakiteia mai te aiteanga o tana moe.

¹ I TE mataiti mua o te ariki o Babulonia ra ko Belesazara e moe ta Daniela i kite, e te orama upoko nona ra ki runga i tona roi: e kua tata iora aia i taua moe ra, e kua akakite atura i taua tuatua ra.

² Kua tuatua iorā Daniela, na ko akera. Akara atura au i taua orama naku i te po ra, e i na, kua puroro ua maira nga matangi o te rangi e a katoa ra ki runga i te tai maata ra.

³ E kua aere maira nga puaka nunui e a mei raro mai i te tai ra, e tu ke anake to ratou ki tetai ki tetai.

⁴ Ko tei mua ra mei te liona ïa, e e puke peau aeto tona: te akara ua ra au e ope akera nga peau i te utiutiia e kua akatuia akera ki runga mei raro i te enua nei i nga vaevae mei te tangata, e e ngakau tangata tei orongaia kiaia.

⁵ E i na, e puaka ke maira, ko te rua ïa, mei te daba te tu, nana uaorai i akatu i tetai kaokao ki runga, e toru ivi kaokao i tona vaa i rotopu i nga nio ra: kua karanga atura ratou kiaia, Ka tu, ka kai i te kiko e kia maata.

⁶ Oti akera te reira, te akara iora au, e i na e mea ke maira, mei te nemera, e a ona peau manu ki runga i tona tua; e a oki mimiti to taua puaka ra; e mana oki tei orongaia nona.

⁷ Oti akera te reira, kite atura au i te orama i te po ra, e i na, ko te a ïa o nga puaka, e mea mataku e te rikarikaia, e te ririnui maata; e e nio maata auri tona: kua kai aia e kua akaungaungātiti, e kua takatakai i te toenga ki raro ake i tona vaevae, e tu ke oki tona i to te au puaka ravarai i muatangana ra; okotai ngauru oki ona tara.

⁸ Kua akamaaraara iora au i taua aronga tara ra, e i na, kua tupu maira tetai tara mea ngiti i rotopu ia ratou, e ki mua akera i te reira kiriti tumuia akera nga tara i muatangana ra e toru: e i na, e mata tei teianei tara mei te mata o te tangata ra, e te vaa oki i te tuatua anga i te tuatua maata.

⁹ Te akara ra au, e kua akanooia iora te au terono, e kua noo maira To te au rā taito ra, ko tei tau tona kakau ki te kiona i te teatea, e te rauru o tona upoko mei te uru-mamoe meitaki ra ïa: e mura ai tona terono: tona porotata ra, e ai kakā ïa.

¹⁰ Puroro ua maira te ai taravai mei mua mai iaia: kua tausani oki te tausani anga i te tavini anga kiaia, e kua ngauru oki te tausani anga i te manotini i te tu anga ki mua iaia; kua noo iora te akava anga, e kua eeuia te au buka.

¹¹ Kua akara iora au e no te tuatua maata i tuatuaia e taua tara ra; akara iora au, e i taia ïa taua puaka ra, e pou akera tona kopapa, e orongaia atura ki te mura ai kakā ra.

¹² Kareka i tetai pae i taua au puaka ra, kua ravea keia akera to ratou mana: i akaroaia ra to ratou ora anga i tetai tuatau e tetai atianga.

¹³ Akara iora au i taua orama i te po ra, e i na, tetai mei te Tamaiti a te tangata ra i te aere anga mai na roto i te au tiao rangi ra; e kua aere maira ki To te au rā taito ra, e kua akavaitata iora aia ki mua iaia.

¹⁴ E kua orongaia maira te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia: tona mana, e mana mutu kore ïa, kare ïa e kore, e tona basileia, kare ïa e pou.

¹⁵ Ko au, ko Daniela nei, kua taitaia toku vaerua i roto i te kopapa nei, e kua pekapeka au i te au orama upoko noku ra.

¹⁶ Kua akavaitata atura au ki tetai o ratou i tu ua maira, e kua ui atura au iaia i te aiteanga i taua au mea katoa nei. Kua tuatua maira aia kiaku i reira, e kua akakite mai kiaku i te aiteanga o taua au mea nei.

¹⁷ Ko aua nga puaka nunui e a nei, e puke ariki ïa toko a, te ka tu mai ïa ki runga mei raro mai i te enua nei.

¹⁸ Ko te aronga tapu ra no Tei Teitei ra te ka rave i taua basileia nei, e no ratou rava atu te basileia, e tuatau, e tuatau ua atu.

¹⁹ Inangaro atura au i reira kia kite i te aiteanga o te a o aua nga puaka ra, ko tei tu ke ia ratou ravarai, e mea rikarika roa, e nio auri oki tona, e tona maikuku, e veo ïa; ko tei kai, e kua akaungaungātiti, e kua takatakai i te toenga ki tona vaevae;

²⁰ E nga tara okotai ngauru ki runga i tona mimiti ra, e tetai oki tei tupu ra, e topa iora e toru ki mua i te reira ra; taua tara oki e mata tona ra, e te vaa i te tuatua anga i te tuatua maata roa ra, ko tei maroiroi maata tona tu i to te au oa katoa nona ra.

²¹ Te akara ua ra au, e kua kaitamaki maira taua tara nei ki te aronga tapu ra, e mana atura aia ki runga ia ratou;

²² E kia tae maira To te au rā taito ra, e kua tukuia mai te akava anga ki te aronga tapu no Te Teitei ra: kua tae akera oki ki te tuatau e riro ei te basileia ki te aronga tapu ra.

²³ Kua na ko maira aia, Ko te a o te puaka, ko te a ïa o te basileia i te enua nei, e tu ke oki tona i to te au basileia katoa ra, e pou oki te ao katoa nei i te reira, ka takatakai oki ki raro, e ka akaungaungātiti oki.

²⁴ E nga tara okotai ngauru no roto i teianei basileia, e puke ariki ïa tino ngauru te ka tupu ra: e i muri ake ia ratou e tupu ei tetai; e tu ke oki tona i to tei muatangana ra, e toko toru ariki te ka mate iaia.

²⁵ E ka tuatua aia i te tuatua akakino ki Tei Teitei ra, e tamanamanata oki aia i te aronga tapu no Tei Teitei ra, e manako oki e taruri ke i te au atianga, e te au ture: e tukuia mai oki ratou kiaia e okotai akera tuatau, e nga tuatau oki, e te vaenga o tetai tuatau.

²⁶ E nooia ra te akava anga, ka rave ke oki ratou i tona mana, ei akapou, e ei akakore, e tae rava atu ki te openga.

²⁷ E te basileia e te mana, e te maata katoa o te basileia i raro ake i te rangi katoa nei, ko te ka orongaia ïa ki te au tangata ra ki te aronga tapu no Tei Teitei, tona basileia e basileia mutu kore ïa, e ope oki te au tutara katoa i te tavini mai e te akarongo iaia.

²⁸ Ko te openga teia o taua tuatua nei. Ko au nei ra ko Daniela, taitaia roa akera au i toku ra au manako, e tu ke atura taku mata iaku nei: vaio iora au i taua tuatua nei ki roto i toku ngakau.