Daniela 4 - Bibilia Tapu

PENE IV - 4

Te akakite rā Nebukanesa i te mutu kore anga i te baseleia o te Atua: tana moe, e te aiteanga i akakiteia e Daniela.

¹ TE ariki ra ko Nebukanesa ki te au tangata katoa ra, te au enua, e te au reo ke ke, i te noo aere anga ki te ao katoa nei: Ei au nuingangare to kotou.

² E mea meitaki i toku manako kia akakite i te au akairo e te au ravenga taka ke i raveia e te Atua teitei iaku nei.

³ Aue te maata o tana ra au akairo! e aue te ririnui o tana ra au ravenga i tona basileia e basileia mutu kore ïa, e tona ra au ki tera uki ki tera uki.

⁴ Ko au nei ko Nebukanesa, te noo ponuiaau ua ra ki roto i toku ra are, e te meitaki ua ra au ki roto i toku ra kainga ariki:

⁵ Kua kite au i tetai moe e rokoia iora au e te mataku, e tumatetenga roa akera au i te au manako i runga i toku roi e te rika a toku upoko ra.

⁶ I akatu ei au i tetai ture e arataki mai i te aronga pakari katoa i Babulonia ki mua iaku nei, kia akakite mai ratou kiaku i te aiteanga i taua moe ra.

⁷ Kua aere maira i reira te aronga pakari, te au akara etu, te au Kaledea, e te au purepure: e kua akakite atura au i taua moe ra kia ratou; kare ra ratou i akakite mai kiaku i te aiteanga i te reira ra.

⁸ E i te openga iora, kua aere mairā Daniela ki mua iaku, ko Beletesazara tona ingoa, mei te ingoa ïa o toku atua, e tei roto iaia oki te vaerua o te au atua tapu ra: e kua akakite atura au i taua moe nei kiaia.

⁹ E Beletesazara e, te tutara o te aronga pakari ra, kua kite au e tei roto ia koe te vaerua o te au atua tapu ra, e kare koe e kimingata i te au tuatua ngaro katoa ra, ka akakite mai ana koe kiaku i te orama o taua moe naku, i kitea e au ra, e te aiteanga katoa ra.

¹⁰ Teia te tu o te orama o toku upoko ki runga i toku roi; Akara atura au, e i na, e rakau tei rotopu i te enua, e teitei maata roa tona.

¹¹ Tupu atura taua rakau ra, e pakari atura, e kua taea rava te rangi e tona teitei, e kitea uaia kia akara e tae ua atu ki te openga o te enua katoa nei.

¹² E mea manea tona rau, e kua maata tona ua, e tei roto iaia te kai o te au mea katoa: te au puaka o te enua nei tei raro ake i tona marumaru, e tei runga i tona au rara te au manu o te reva nei, e ko tei keingaia ïa e te au mea ora katoa nei

¹³ Kua akara iora au i taua orama upoko noku ra i runga i toku roi, e i na, tetai tiaki, e mea tapu ïa, ko tei eke mai ki raro mei te rangi mai;

¹⁴ Kua kapiki nui maira aia, e kua na ko maira, Ka tua ana i te rakau ki raro, ka tipupu ei i tona au rara, ka rurungaoro i tona rau, ka akapueurikiriki i tona ua: kia aere ke oki te au puaka i raro ake iaia, e te au manu i runga i tona au rara.

¹⁵ Ka vaoo ra i te tumu i tona aka ki raro i te one, ma te ruru auri oki e te veo, i roto i te ngangaere paruparu o te kainga ra; e kia akamauuia aia i te au no te rangi; e tana tuanga, ei rotopu ïa i te au puaka i te ngangaere o te enua nei:

¹⁶ Kia akatu keia tona ngakau auraka ei ngakau tangata, e ei ngakau puaka tei tukuia mai kiaia; e kia itu ua atu tuatau i te na runga anga iaia ra.

¹⁷ Na te au tiaki teianei tuatua, e teia akauenga, na te tuatua ïa a te aronga tapu ra: kia kite te aronga e ora nei, e e mana to Tei Teitei ra i te basileia o te tangata nei, e te oronga nei aia i te reira ki tana tangata inangaro, e te tuku nei i te aronga akaaka roa ki rungao.

¹⁸ Ko taku teianei moe ta te ariki ta Nebukanesa i kite. E tenana, e Beletesazara e, ka akakite mai koe i tona aiteanga, kare oki te aronga pakari katoa i toku ra basileia e tika kia akakite mai i te aiteanga: ko koe ra ka tika ïa, no te mea tei roto ia koe te vaerua o te au atua tapu ra.

¹⁹ Tumatetenga iorā Daniela, ko Beletesazara tetai ingoa, e okotai akera ora, taitaia akera aia i tona manako. Kua tuatua maira te ariki, na ko maira, E Beletesazara, auraka e taitaia i te moe nei, e tona aiteanga katoa ra. Kua karanga aturā Beletesazara, na ko atura, E taku atu, ei te aronga i riri mai ia koe ra taua moe nei, e to reira aiteanga ra, ei toou ïa au enemi.

²⁰ Te rakau taau i kite ra, ko tei tupu, e pakari atura, e kua taea te rangi i tona teitei, e tei kitea uaia e tae ua atu ki te enua katoa nei:

²¹ Tei manea tona rau, e kua maata tona ua e tei roto iaia te kai a te au mea katoa; e kua marumaru te au puaka o te enua ki raro ake i te reira, e tei runga i tona au rara te nooanga o te au manu o te reva:

²² Ko koe taua rakau nei, e te ariki, kua tupu koe, e kua pakari: kua tupu koe i te maata, e kua taea te rangi ra, e toou ra au i te openga mai o te enua nei.

²³ E ko koe oki, e te ariki, i kite i tetai tiaki e tetai mea tapu ra, i te eke anga mai mei runga mai i te rangi ra, e te na ko anga mai, Ka tua ana i te rakau ki raro, ka akakore atu; ka vaoo ra i te tumu i tona aka ki raro i te one, ma te ruru auri oki e te veo, i roto i te ngangaere paruparu o te kainga ra; e kia tamauuia i te au o te rangi, e ei te au puaka o te enua nei taua tuanga, e kia itu ua atu tuatau i te na runga anga iaia;

²⁴ Teia te aiteanga, e te ariki e, e teia oki te akakoroanga a Tei Teitei, tei rokoia mai ïa taku atu te ariki ra.

²⁵ E tuaru ratou ia koe ki vao i te tangata nei, e riro toou nooanga i rotopu i te au puaka o te enua nei, e akaangai oki ratou ia koe ki te ngangaere mei te au puakatoro ra, e akamauu ratou ia koe ki te au o te rangi ra, e kia itu ua atu te tuatau i te na runga anga ia koe ra, kia kite koe e, tei te Teitei te au i te basileia o te tangata nei, e nana e oronga i tei reira ki tana ra tangata inangaro.

²⁶ E ko ratou oki i karanga e vaoo i te tumu rakau i te aka ra; e riro noou tikai taua basileia noou nei, kia kite ra koe e, tei te au rangi te au.

²⁷ E teianei, e te ariki, ka āriki mai na koe i taku nei ako, e akaruke ke atu i taau nei au ara i te rave anga i te tuatua-tika ra, e toou au kino i te aroa anga i te ao; peneiake ko te roao toou ra meitaki i reira.

²⁸ I rokoia taua ariki ra ko Nebukanesa e taua au mea katoa nei,

²⁹ E ope akera nga marama okotai ngauru ma rua, te aaere ra aia i rungao i te are ariki i te basileia i Babulonia.

³⁰ Kua tuatua iora taua ariki ra, na ko akera, Kare ainei teia ko Babulonia maata, i patuia e au nei ei are no te basileia, i te mana o toku nei ririnui, e kia ngateitei atura toku mekameka nei.

³¹ Te vai rai taua tuatua ra i te vaa o taua ariki ra, kua topa maira tetai reo no te rangi mai, na ko maira, E te ariki, e Nebukanesa, ko koe teia i tuatuaia nei, Kua riro ke toou ra basileia.

³² Ka îîa ke atu ratou ia koe i rotopu i te tangata nei, e riro toou nooanga i rotopu i te au puaka o te enua nei: e akaangai ratou ia koe ki te ngangaere mei te puakatoro nei, e kia itu ua atu te tuatau i te na runga anga ia koe, e kia kite koe e, tei te Teitei te au i te basileia o te tangata nei, e kua oronga aia i te reira ki tana ra tangata inangaro.

³³ Tupu atura taua tuatua nei ia Nebukanesa i taua ora rai: îîa keia aia i rotopu i te tangata nei, e kua kai i te ngangaere mei te puakatoro ra, e kua kū tona kopapa i te au o te rangi, e tupu atura tona uruuru mei to te aeto ra, e tona maikuku mei to te manu ra.

³⁴ E ope akera taua au rā ra, kua nānā atura au ko Nebukanesa i toku mata ki runga i te rangi, e kua oki akaou maira toku kite kiaku nei, e kua akameitaki atura au i Tei Teitei ra, e kua akapaapaa au e kua akakite atura au iaia i tei tika i te ora anga e tuatau ua atu, e tona au ei au mutu kore ïa, e tona basileia ki tera uki ki tera uki:

³⁵ E tei noo i te enua katoa nei, tei manakoia ei mea puapinga kore: e te rave nei aia i tana inangaro i rotopu i te nuku o te rangi, e i tei noo i te enua nei: kare e tika i tetai kia tāpu atu i tona rima, kare oki e karanga ua atu kiaia e, Te akapeea ua ana koe?

³⁶ I taua tuatau rai i oki mai ei toku manako kiaku nei; e te kakā o toku ra basileia, te ngateitei noku ra, e toku manea, i te oki anga mai kiaku ra; e kua kimi mai oki toku aronga tumu korero, e taku ui mataiapo, kiaku: e kua akatinamouia iora au i toku ra basileia, e kua akamaataia mai toku nei mekameka.

³⁷ E teianei, te akapaapaa nei au, ko Nebukanesa, te akamaata nei, e te akangateitei nei, i te Ariki o te rangi, e tuatua-mou anake te au angaanga nana, e mea tau oki tona ra au aerenga: e tei aaere ma te ngakau parau ra, e tika iaia kia taakaaka.