VAEBRANIA 9 - Chasu New Testament 1967

Hezerire ha kae ni fwanyanyi ya hezerire ha iki

¹ Hata kila kiaghano cha kuvoka chekirena mitasire yacho, na hezerire hacho ha kimasanga.

² Ambu ihema leharehwe, hala ha kuvoka, niho hantu hekina kamnara ka taa, na meza, na mikate ya kuvonyesha; niho hantu hekiitangwa “Hezerire”.

³ Na nyuma ya pazia ya keri ni lila ihema leitangwa “Hezerire ha hezerire”,

⁴ aho hekina kamshereta ka dhahabu ka kufukijija, na sanduku ya kiaghano yevirirwe dhahabu hose hose, niho hantu hekina kazembe ka dhahabu kena ila mana na ila nzata yakwe Aroni yyeshoshije, na vila vibao vya kiaghano;

⁵ na wanga helo makerubi a ngazo, ekigera kichumbi cha mbonea kivuri; heicho tetuna igheri la kuherereja mburi ja vintu ivyo kimwe kimwe.

⁶ Aho vintu ivyo vyekinaharehwa huvo Vatasi veingia he lila ihema la kuvoka kila igheri, vekikolosha vila vyetara he mtaso.

⁷ Mira he ilo ihema la keri, mtasi m’baha eingia ho esitikie sakame, ya kutasia vuntu vwakwe ye mwenye, na kwa mabanu a kusamanya kwa vantu.

⁸ Mpeho Wedi ekivonyesha mburi ii, iti nzia ya kuingia hala hezerire yasafunyirijwa, aho ilo ihema la kuvoka lecheri imuka;

⁹ elo fwanyanyi ya igheri ili twena nalo iki, ello igheri matasi na mitaso vyekifunywa, kwa madunganyo a ngoro esekiidima kumkoloshija mretasiwa,

¹⁰ kila e viziomo vya kimwiri du, vyala na vyanwa na mikuojire ya mbare nyingi, vyeazerwe mhaka igheri la kuharehwa kivusha.

Itasi lakwe Kristo lina nzinya ya kuzerija

¹¹ Mira Kristo mtasi m’baha wa vintu vyedi vyeneza, ekinaze he ihema ibaha lekoloke, lesiharehwe na mikono, nicho kuti, esi la si ii,

¹² neri esi kwa sakame ya nzenge na ndama, esire kwa sakame yakwe mwenye, eingie hala ezerire kantu kamwe, ekinavone vukomboli vwa kae na kae.

¹³ Ambu ukinakiche sakame ya nzenge na njekwana na maivu a ndama ya ng’ombe vyenyinyirwe venye ikwe vizerija na kuelija mwiri,

¹⁴ sakame yakwe Kristo, eye he vuntu vwa Mpeho wa kae na kae, ekuinkije he Mrungu kuoka itasi lesima madamaro, inezika kumuoja madunganyo enyu na mihiro yenyu yefwie, muidime kumtasa Mrungu mwenye moo!

¹⁵ Heicho ye ni ntume wa kiaghano kishaa, nesa kifwa chekinaoke cha kukombola he ala mabanu ekiho he kila kiaghano cha kuvoka, vala veitangwe vaghuhe kiravo cha vupali vwa kae na kae,

¹⁶ ambu hantu kiaghano cha vupali cheho, niresari hakete kifwa cha ula ekiharehe.

¹⁷ Ambu kiaghano cha vupali kina nzinya hala hantu heketike kifwa cha mntu; ambu tekina nzinya kari ula ekiherehe ereho moo.

¹⁸ Ambu hata kila cha kuvoka, tekivokiwe esire kwa sakame.

¹⁹ Ambu kila iamoro lekikenja kutetwa ni Mose he avo vantu vose, sa vuntu viziomo vyeazere, ekighuha sakame ya ndama na ya nzenge, hantu hamwe na mpombe na mpamba mnkundu na mafuri, akanyinyira kitabu kijenye hantu hamwe na vantu vose,

²⁰ ekiti: “Ii ni sakame ya kiaghano mweazerwe ni Mrungu.”

²¹ Nirehuvo hata ihema na vintu vyose vya he mtaso akavinyinyira iyo sakame.

²² Na he mburi ja viziomo, hafuhi vintu vyose vyekionjwa kwa sakame; na hesina kuita sakame tehena kushighiwa.

Itasi lakwe Kristo telina mghenja

²³ Heicho nekisari fwanyanyi ya vintu vya uko wanga viojwe nijo, mira vintu vya uko wanga vijenye vyo viojwe ni matasi edi kujikela.

²⁴ Ambu Kristo teingie he hezerire heharehwe kwa mikono, e fwanyanyi ya hezerire hajenye; esire eingie uko wanga hajenye; avoneke iki mozya ya kizango cha Mrungu vuntu vwetu;

²⁵ neri si iti akuinkije kantu kajinki, sa vuntu mtasi m’baha eingia he hezerire kila mwaka kwa sakame esiyakwe;

²⁶ nanga ne huvo chekimtara kurishwa vwasi kantu kajinki too kurumbwa kwa masanga; mira iki ni kantu kamwe du he igheri lekoloke; efunukurwe nesa avushe mabanu kwa itasi la mwiri wakwe.

²⁷ Na sa vuntu vantu vevikiwa kufwa kantu kamwe, na nyuma ya kifwa milaho;

²⁸ nirehuvo Kristo naye, ekinainkijwe kuoka itasi kantu kamwe, nesa atike mabanu a vantu vajinki; enefumirira ka keri he avo vemwinda kwa lukio, esi kwa vuntu vwa mabanu.