VAEBRANIA 7 - Chasu New Testament 1967

Yesu ni mtasi m’baha se Melkizedeki

¹ Ambu uo Melkizedeki mfumwa wa Salemu, mtasi wa Mrungu eho uko wanga, eye ekimzanie Abrahamu aho ekihunduka kufuma he nkondo ya kubigha vala vafumwa, akamunka lutelwedi;

² eye Abrahamu emghavie ifungu la ikumi la vintu vyose; izina lakwe cha kuvoka ni sa kuti: “Mfumwa wa mporere;”

³ tena vavee, tena mlala wavo, tena lukolo, tekimanyike hantu misi yakwe yevokie, neri hantu yesiie, mira efwanyanywa na Mwana wa Mrungu;- uu atue e mtasi kae na kae.

⁴ Heicho, rerehani sa vuntu uo mntu ekim’baha, eye vava wetu Abrahamu emunkie ifungu la ikumi la mitahe.

⁵ Na he vana Levi vala veinkiwe vutasi, veazerwe kughuha ifungu la ikumi he vantu vavo, evo vandughu vavo, kwa kuazerwa ni viziomo, nziaho vefumie he mavindi akwe Abrahamu.

⁶ Mira ula lukoko lwakwe lwesitarirwe iti lwefumie he avo, eghuhie ifungu la ikumi he Abrahamu, akamunka ula e wa kila kiravo lutelwedi.

⁷ Neri tekivekana iti mdori einkwa lutelwedi ni m’baha.

⁸ Na aha vantu vefikiwa ni kifwa veghuha ifungu la ikumi, mira uko ni ula etetiwa vuonwa eho moo.

⁹ Kangi kive kutetwa iti, he nzia yakwe Abrahamu hata Levi eye eghuha ifungu la ikumi einkije ifungu la ikumi,

¹⁰ ambu ekiho he mavindi a vavee, aho Melkizedeki akimzana.

Vutasi vwakwe Kristo ni vubaha kuvecha vutasi vwa Kiyuda

¹¹ Ambu nanga vutasi vwakwe Levi vwekikoloke -ambu vala vantu veghuhiie viziomo hevwo,- mretasa ungi ekiendiwani wa, wa fwanyanyi yakwe Melkizedeki, neri esitarirwe he fwanyanyi yakwe Aroni?

¹² Ambu vutasi vwekikoranyika nire sari kiziomo nacho kikoranyike.

¹³ Ambu ula etetiwe neki mntu wa mbari ingi, neri hesina mntu wa iyo mbari ehiririe meza ya mtaso.

¹⁴ Ambu chemanyike boo iti Mfumwa wetu efumie hakwe Yuda, mbari neri Mose esitetie kintu heyo he ndima ya vutasi.

¹⁵ Kangi ivi tweteta vyemanyike kukela, kakicha havoneka mtasi ungi wa fwanyanyi yakwe Melkizedeki,

¹⁶ esi mtasi kwa kiziomo cha iazero la kimwiri, esire kwa nzinya ya nkalamo yesina mginto;

¹⁷ ambu etetiiwe vuonwa kuti: “We u mtasi kae na kae, Wa fwanyanyi yakwe Melkizedeki.”

¹⁸ Ambu, hena kuvushwa kwa lila iazero lerongore, vuntu vwa vusoka vwalo na kusaveiwa kwalo

¹⁹ -ambu kiziomo chasakolosha kintu;- hamwe na ivyo, hainkijwa ikuji ledi kukela, elo helo twezengelela ha Mrungu.

²⁰ Na kwa kuti tekiokie hesina kirigho,

²¹ -ambu vala veghoshijwe vatasi hesina kirigho, mira ye ni wa kirigho, he ula emtie: “Mfumwa akurigha neri tekakoranye, We u mtasi kae na kae;”

²² heicho Yesu eokie mwikome wa kiaghano kila e chedi kukela.

²³ Kangi vala veghoshijwe vatasi ku vangi, kila vekikindwa ni kifwa, vasiikae;

²⁴ mira ye kila eikaa kae na kae, ena vutasi vwesisia.

²⁵ Heicho, ye eveiwa kuvakija kae na kae, vala vemswia Mrungu kwa kuvechija heye; ambu eho moo misi yose, nesa avaombie.

²⁶ Ambu chekituvaie uswi kuketa mtasi m’baha sa uu ezerire, esina vuvivi, esina idamaro lolose, etanyijwe na venye mabanu, eho wanga kuvecha uko wanga;

²⁷ eye chesienda iti kila msi arongekutasia ye mwenye, vuntu vwa mabanu akwe, nyuma anatase vuntu vwa mabanu a vantu, sa vuntu vala vatasi vabaha vekiketa; ambu ye eketie huvo kantu kamwe, ekikuinkija ye mwenye.

²⁸ Ambu viziomo vivavika vantu vena vusoka kuoka vatasi vabaha, mira icho kiteto cha kirigho chezie nyuma ya viziomo, chamvika Mwana ekoloke kae na kae.