फीलीपी 3 - चेपाङ1 लौ पुःचोङ् हौचोङ्य प्रभुकायः तय्ह्ती झ्यान्ते चोङाय्तीलेः मुन। इ कुरा पुछ्युङःती लेखसाकायः सावःङल। इ पुछ्युङःती तोओ कुरापाय् नीङ्कायः पेतो चीःताक्ती झ्यान्ते नीङ् ग्रमःत वाह्सा खाय्तेःनौ। 2 ओउः पेमालो स्याल्लो लेखा स्याव्ओ मान्तालम्कः घीःती मुन दा। ओउःमयःइपाय् आन पेमालो हायःती “यहुदीलम्कोः चीन्ह जाङ्ह्सा खेःतो” दाय्ह्ती लयःकोः आङ्लम् तात्नाःइसी। 3 ओउःतलेः हायःइसीतो ओउःमयःखे खेःल ङीखे परमेस्वर्कोः मान्तालम्कोः दोङ् चीन्हलेः दोःआतय्ही दोह् हायःती दाय्ह्सा ङीइलेः परमेस्वर्सै ओउःकोः ग्वालामः दोःती ओउःकायः पेतो ताङ्ह्ताक्नाःतय्ह्नी। येसु ख्रीस्सै रौ जीङः दोःती ङीलेः चोङाय्ती मुनाःतय्ही। ङीपाय् मान्तालम्इ जवओ कुराकायः ङ्हाम्तय्ह्नीली। 4 ओउःत ङ्हाम्तय्ह्नीली मान्तालम्कोः जवओ काम्लम्कायः ङा ग्याओ खेःतो त खेःया ङाइ अरुसै ङ्हाम्सा खाय्ओ खेःतो 5 दोह् हायःती दाय्ह्सा ओत्ओहाङःसै आत्दीन्हाङः यहुदीकोः पुन् तात्सा चीन्ह बयःआताङः। ओहाङःसै ङापाय् दोङ् इस्राएलीकोः मान्ता खेःनाङः ङीकोः बेन्यामीन् तोकानःसै ग्ल्युङ्ह्ती दोङ् हेब्रैनीकोः प्लोमःदाने खेःनाङः। यहुदीलम्कोः ऐन् जुगाङ् जाङ्ह्ती झ्यान्ते ङा फरीसी त तोओ खेःङोतो। 6 ओउः ऐन् जाङ्ह्साकायः ङा ओउःच्युक् म्ह्युङ्ती ग्याओ ल्हुङ् दोःती झ्यान्ते ख्रीस्कायः ङ्हाम्ओलम्कायः थुनसामा सात्सामा आन बोङःङोतो। ओउःत हायःतोक्हाङः ओउः ऐन्कोः कुरापाय् जुदालेः जाङ्ह्आलाङः। ङाकायःपाय् सुइमा “लौ नाङ्इ ऐन् पेतो जाङ्ह्तेःनीली” त दाय्ह्ती गाल्तुम्ती तोसा खाय्आक्नीली। 7 ओउःत खेःङोतो ओउः ङ्हा झाक्ओ “पेओ” त ताःओ कुरालम्पाय् द्याह् ख्रीस्कायः ङ्हाम्सा थेङा सबै “आह्रे लेःआः” त दाय्ह्ती जुदालेः फेआलाङः बा। 8 इ कुरामा सबै ल्हाव्ह्दैबाङ्कोः पेओ कुरामा “आह्रे लेःआः” त म्हर्ती जुगाङ् फेती वाय्आलाङः। ओहाङःसै ओउः न्हाङ्तोलेः पेओ कुरापाय् ङाकोः प्रभु येसु ख्रीस्कायः तय्ह्सा दोःनाङः। ख्रीस्कोः मान्ता स्याव्साकायः सबै अरु कुराकायः “आह्रे वाय्सा खेःओ धान्ह्लम्लो लेखालेः” त म्हर्ती फेती वाय्आलाङः बा 9 ओउःत हायःती ख्रीस्कुस् ब्राङ्तोलेः स्याव्नाङः। ऐन्कोः कुरा जाङ्ह्ओकायः खेःल ख्रीस्कायः ङ्हाम्ती झ्यान्ते द्याह् ङा परमेस्वर्कोः मीक्हाङः पेतोलेः मुनाङः। ओउःत स्याव्ओपाय् ङ्हाम्ओलम्कायः परमेस्वर्कःसै दोःनाः। 10 ओहाङःसैको द्याह् ङाइ ख्रीस्कोः ल्हुङ्तुक् चीःसामा झाक्नाङः ओउःकोः उह्ताक्सा ग्वम् लयःकायः धेःती ओउःकुस् लीह्सीःओ गोरःती ओउःलो लेखा सीसामा झाक्नाङः अरु दोह्मा झाक्ङल। 11 ख्रीस्लो लेखालेः लीह्सीःओ गोरःती सीनाङः त खेःया ओउःलो लेखालेः ङामा उह्ती च्योक्लेःनाङः त आसती म्हर्नाङः। 12 एत हायःसा आसती म्हर्सापाय् म्हर्लेःनाङः ओउःपाय् दोःधाङ्ङल ङापाय् जुगाङ् छय्ङ्तोलेः स्याव्धाङ्ङल। दोह्लो येसु ख्रीस्इलेः ङाकायः छीङ्ह्ती बयःसा बोङःनौ ओउःलेः त्याक्साकायः ङाइ आन त्युस्तीलेः बोङःनाङः। 13 माः रैस पुःचोङ् हौचोङ्य द्याह्पाय् दोःधाङ्ङल दाह्धाङ्ङल। इ यातैज्याङ् काम् ह ङाइ जाङ्ह्साकायः बोङःनाङः। सबै ङ्हा स्याव्ओ कुरालम् म्हेःती लोनेः दोःसा कुराकायः बोङःनाङः। 14 ओउःत झ्यान्ते ङाइ ओउःकःसै वेङ्माःत येसु ख्रीस्कायः गुल्ह्नाङः ओहाङःसैको रौ जीङः दोःताक्साकायः परमेस्वर्इ ङाकायः लाङ्काताङः गोत्नाःताङः। 15 ङीकःहाङः सुलो परमेस्वर्कोः कुराहाङः चोक्ओ ल्हुङ् नाःओलेः मुनाःतय्ही ओउःइलेः “दाह्धाङ्ङल” त दाय्ह्ती ङालो लेखालेः ओउःत हायःसा बोङःपानी। सुखेलो थे थे ल्हुङ् स्याव्तेःनै ओउःकायःपाय् परमेस्वर्इ पेतोलेः चीःताक्तेःनै। 16 ओउःत चीःसापाय् चीःताक्तेःनै गतलो ङी ङ्हापाय् वाह्ओ खेःतो ओउःतलेः लोनेमा वाह्धै मुपाःतय्ही। 17 लौ पुःचोङ् हौचोङ्य ब्राङःतोलेः ङाकायः तेःतीलेः वाह्न। अरु ङीलो लेखा वाह्ओलम्कायःमा तय्ह्तीमा तेःतीमा योनु। 18 दोह् हायःती दाय्ह्सा नाःतो वाह्ओलम् ख्रीस्पाय् क्ल्याय्ओ सीङःहाङः सीओ कुरालेः झाक्इली ओउःत ङ्हाम्सा ग्याइली। इ कुरा ङाइ ङ्हामा तोझुङ्नेःनाङ्सतो द्याह्मा र्याःतीलेः पुछ्युङःती तोनेःनाङ्स। 19 ओउःमयः लोने जुगाङ् वाय्तोलेः स्याव्नै दोह् हायःती दाय्ह्सा ओउःमयःखेइ जेःक्राक् स्याव्ती जेःगालम् अरु थोक्लम् द्यव्तालो लेखालेः ताङ्ह्ताक्मानानी। रास्सीःओ कुरा झाक्तीमा ल्हाव्ह्दैबाङ्कोः कुरा ह क्युताक्सा बोङःमानानी। 20 ङीखे लाङ्काकोः मान्तालेः खेःनाःतय्ही ङीकायः दल्ताक्सा खेःओ प्रभु येसु ख्रीस्पाय् “लाङ्कासै वाङ्पाः” त म्हर्ती ओउःकायः ल्युङ्ह्तीमा हेरःतीमा योतीलेः मुनाःतय्ही। 21 ओउःइपाय् ङीकोः पेमालो सीसा खेःओ आङ्लम्कायः लयःकोः पेओ आङ्लो लेखालेः थाङ्ताक्नाःतय्ही। ओउःत हायःसाकायः ओउःइ लयःकोः ग्वम्इ जाङ्ह्सा खाय्नौ। ओउः ग्वम्इपाय् येसु ख्रीस्इ सबै थोक्लम्कायः ग्रक्नौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.