फीलीपी 2 - चेपाङ1 लौ नीङ् ख्रीस्कोः मान्तालम् स्याव्आक्तीको ओउःइ लव्ह्तेःआकाय् माः र। ओउःइ नीङ्कायः राप्ती झ्यान्ते ल्हुङ् धोमाय्तो स्याव्तेःनै। ओउःकोः ग्वालामः नीङ्कुस् मुतेःनै। फेरी लयःमयःकायः नीङ्इ योनःतीलेः योकाय्तेःनै माः र 2 इपाय् दोङ् कुरालेः त खेःया ल्हुङ् ब्राङ्तो लयःमयः राप्काय्ती यातैज्योः स्याव्तेःपै ओहाङःसैको ङा जुगाङ् म्रोलेःनाङः। 3 दोह् खेःयामा अरुकः लती लयःकायः ताङ्ह्ताक्ती जाङ्ह्तेःचानी। मीओ ल्हुङ् स्याव्ती अरुलम्कायः “ङासै ताङ्ह्ओ लेःआः” त म्हर्न। 4 लःलयःकायः क्युताक्सा बोङःमामाःत अरु अरुकायः “गत हायःती लव्ह्चाङः” त म्हर्न। 5 येसु ख्रीस्कोः ल्हुङ्तुक् दोःतेःपै 6 ओउःपाय् परमेस्वर्लो खेःतो “ङा परमेस्वर्कायः छुलेःनाङः” त म्हर्माःत 7 लयः झाक्तीलेः सबै फेती ओउःइ लयःकायः मीताक्ती मान्तालो थाङ्ती नोकरी काम् जाङ्ह्आकान्। 8 मान्ता स्याव्आक्तीको न्हाङ्तोलेः मीताक्ती परमेस्वर्इ झाक्ती तोओ कुरा सायःती लयः सीसा ग्याओ खेःतो। माः बाने क्ल्याय्ओ सीङःहाङःमा सीसा ग्याओ लेःआः बा। 9 ओउःत झ्यान्ते परमेस्वर्इ ओउःकायः आन ताङ्ह्ताक्आथै ओउःकोः मय्ङ् “सबैसै पेलेःनाः” त तोआथै। 10 ओउःत खेःओ येसुकोः मय्ङ् पेह्तोक्हाङः लाङ्काहाङःमा ल्हाव्ह्दैबाङ्हाङःमा कामः नालाहाङःमा ओउःहाङः मुओलम्इ सबै ओउःकायः बाःसामा खेःइतो 11 “येसु ख्रीस्पाय् प्रभु लेःआः” त सबै तय्ह्ती तोसामा खेःइतो ओउःत हायःती ओउःमयःइ परमेस्वर् आपाकायःमा ताङ्ह्ताक्नानी। 12 लौ उया पुःचोङ् हौचोङ्लम् ङ्हापाय् ङा नीङ्कुस् मुओहाङः ङाइ तोओ कुरा ग्यातीलेः जाङ्ह्तेःनीतो द्याह्पाय् ङा मुमालोहाङःमा ङाइ तोओ कुरापाय् न्हाङ्तोलेः जाङ्ह्सा खेःतो। ओहाङःसै परमेस्वर्कः एङःती दल्ओ मान्ताकोः काम्लम् जुगाङ् दप्तीलेः जाङ्ह्नु दा। 13 दोह् हायःती दाय्ह्सा ओउःकोः लयः झाक्ओ काम् जाङ्ह्साकायः परमेस्वर्इ नीङ्कायः ग्याताक्मातेःनै खाय्ताक्मातेःनै। 14 ओउःत झ्यान्ते सबै काय्ह्ल्ह्याव्मामाःत काय्काय्मामाःत जाङ्ह्नु दा। 15 ओहाङःसै नीङ्पाय् पेतो जय्कुमःत छय्ङ्ओ परमेस्वर्कोः चोःलम्लो लेखालेः स्याव्तेःनै। नीङ्कायःपाय् सुइमा गाल्तुम्ती तोसा खाय्नीली। च्याक्ओ फेल्बाङ्हाङः प्लीङ्ह्ती थोङ्ओ कार्लम्लो लेखालेः नीङ्पाय् ल्हाव्ह्दैबाङ्कोः पेमालो माःती ब्रःती नोःओ मान्ताकःहाङः ग्रमःत मुती 16 ओउःमयःकायः रौ जीङःकोः पेओ नोःराय् छ्यानःतेःनानी। ओउःत हायःओ चीःती ङाइ नीङ्कायः ह्र्युङ्तो जाङ्ह्ओ काम्पाय् आह्रे खेःल ओउःत झ्यान्ते ख्रीस् वाङ्सा दीन्हाङः चोङाय्तीलेः मुनाङः। 17 माः रैस नीङ्इ परमेस्वर्कायः जाङ्ह्ओ काम्कुस्मा ओउःकायः ल्हाओ ङ्हाम्राय्कुस्मा ङाकोः होती सीओ वयःमा ल्हाती बयःसा खेःतो त खेःया ङा चोङाय्तीलेः मुनाङः। नीङ्कुस् ङा चोङाय्तीलेः मुनाङः 18 ओउःतलेः नीङ् ङाकुस् चोङाय्तीलेः मुसा खेःतो। 19 प्रभुइ ताक्नाःताङः त खेःया देङेलेः नीङ्कःताङ् तीमोथी ल्होक्नेःनाङ्स ओहाङःसै नीङ्कायः गत स्याव्नै त दाय्ह्ओ कुरा सायःआक्तीको ङा ल्हुङ् धोमाय्नाङः। 20 ओउःपाय् ङालो लेखा नीङ्कायः स्यास्सा थेङा ल्हुङ् र्याङःती मुनाः। अरु मान्तापाय् सुमा र्याङःती मुइली तीमोथी ह मुनाः। 21 अरुखे लयःकोः कुराकायः ह बोङःसा झाक्नै येसु ख्रीस्कोः कुराकायः झाक्इली। 22 ओउःखेइ ङाकुस् नीस् आपाचाःलो लेखालेः परमेस्वर्कोः पेओ समचार्कोः काम् ज्याक्ती जाङ्ह्ओआः बा ओउःत नीङ्इ चीःतेःनानी। 23 ओउःत झ्यान्ते ङा लयःकायः “गत स्याव्नाङः” त पेतो चीःआक्तीको ङाइ ओउःकायः ल्होक्नाङः। 24 फेरी प्रभुइ ताक्ती झ्यान्ते ङामा देङे वाङ्सा दोःनाङः त ताःनाङःस। 25 ङामा लोने वाङ्सा बोङःनाङः द्याह् ङीकोः हौ एपाफ्रोदाय्तस् त तोओकायः नीङ्कःताङ् “द्यान्ह्ती ल्होक्सा खेःतो” त म्हर्आलाङः। ओउःकायः नीङ्इ ङाकःताङ् ल्होक्तेःआकानी ल्होक्आक्तीको ओउःइ पेतोलेः लव्ह्आताङः। ओहाङःसैको नीची नीस्चाक्इ ब्राङ्तोलेः परमेस्वर्कोः पेओ कुराकायः काम् जाङ्ह्माआलाङःचु त्यानःकाय्माआलाङःच। 26 द्याह् ओउःपाय् नीङ्कायः आन झाह्ती ल्हुङ् र्याङःतोलेः मुनाः दोह् हायःती दाय्ह्सा “ओउःपाय् आन जीक्नाः” त दाय्ह्ओ ओउःकायः कुरा सायःताङःतेःआकानी। 27 दोङ्सीलेः ओउःपाय् सीखेःतोलेः जीक्ओ खेःतो परमेस्वर्इ ओउःकायः योनःती योती झ्यान्ते स्याक्ताक्आथै। ओउःकायःआले खेःल ङाकायःमा परमेस्वर्इ योनःती योआताङः रैस दोह् हायःती दाय्ह्सा ओउः मान्ता सीआ त खेःया ङा लीह्तो गोरःओहाङः पाःतीलेः लीह्तो खेःङोतो। 28 द्याह् ओउःपाय् ङाइ आन झाक्ती ल्होक्नेःनाङ्स ओहाङःसैको ओउःकायः क्रुस्आक्तीको नीङ्मा चोङाय्तेःनै ङा लीह्ओमा बल अम्नाङः। 29 ओउःत खेःओ ओउःकायः लयःकोः प्रभुकायः ङ्हाम्ओ हौकायःच्युक्लेः ताःती चोङाय्तीलेः रोम्नु दा। ओउःलो लेखा मान्तालम्कोः तोओ कुरामा पेतो सायःनु। 30 दोह् हायःती दाय्ह्सा ओउःखे “ङा सीनाङः यादो” त म्हर्माःत ङाकायः लव्ह्ती ख्रीस्कोः काम् जाङ्ह्तोक्हाङःपाय् दोङ्सीलेः सीखेःओ खेःतो। ओउः बेलाहाङः नीङ्खेइ ङाकायः लव्ह्सा खाय्तेःनीली त झ्यान्ते नीङ्कोः होन्त लव्ह्आताङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.