फीलीपी 1 - चेपाङ1 लौ इ चेती ङा पावुल्मा तीमोथीमा नीची नीस्चाक् येसु ख्रीस्कोः नोकरीनीस्इ नीङ् फीलीपी सहर्हाङः मुओ ख्रीस्कायः ङ्हाम्ओलम्कायः लेखती ल्होक्नेःनाङ्स. नीङ्कायःमा नीङ्कोः स्यालःओ मान्तालम्मा परमेस्वर्कोः काम् जाङ्ह्ओलम्कायःमा सबैकायः लेखती ल्होक्नेःनाङ्स। 2 नीङ्कायःपाय् ङीकोः परमेस्वर् आपाइमा ङीकोः प्रभु येसु ख्रीस्इमा योनःती योतो ल्हुङ् धोमाय्ताक्तेःपै। 3 नीङ्कायः ल्हुङ्हाङः लाय्ओ बेलाहाङः परमेस्वर्कायः गलकायःमा “च्युता” त तोनाङः। 4 फेरी ओउःकायः तेती तोओहाङः नीङ्कायःमा गलकायःमा म्रोती तेनाङः 5 दोह् हायःती दाय्ह्सा ङ्हाहाङःसै देङीच्युक्हाङः ङाइ परमेस्वर्कोः पेओ समचार् थोल्ह्ती तोतोक्हाङः ङाकायः नीङ्इ लव्ह्धै मुतेःइतो 6 ओउःत झ्यान्ते नीङ्कायः तोहालेः पेतो वाह्ताक्ओ परमेस्वर्लेः ओउःइ देङीमा लोनेःमा येसु ख्रीस् वाङ्नम् दीन्च्युक्हाङः पेतोलेः वाह्ताक्तेःनै एत ङा ल्हुङ्हाङः म्हर्नाङः। 7 नीङ्कायःपाय् ङाइ गलकायःमा झाह्ती मुनाङः ओउःत खेःओ इतलेः म्हर्सा स्याव्लेःनाः। ङा इहाङः थुनती मुओ बेलाहाङःमा बाहीर पेओ समचार् स्यान्ओमा त्यानःकाय्ती नोःओ बेलाहाङःमा ङाकुस्लेः नीङ्मा परमेस्वर्इ पेतो बयःओलेः दोःनाःतय्ही। 8 दोङ्सीलेः ङाइ नीङ्कायः येसु ख्रीस्इलो लेखालेः झाह्नेःनाङ्स एतलेः परमेस्वर्इ चीःआनौ। 9 “ओउःमयःइ न्हाङ्तोलेः राप्पानी न्हाङ्तोलेः व्हाय्तो चीःपै” त दाय्ह्ती नीङ्कायः तेती तोनेःनाङ्स। 10 ओहाङःसैको नीङ्इ पेओ कुरालम् व्हाय्तोलेः वेलःती तय्ह्सा खाय्तेःनानी ओउःत हायःतीलेः ख्रीस्कोः वाङ्सा दीन्च्युक्हाङः नीङ् पेतो छय्ङ्तो वाह्ओ मुतेःनै। 11 ओहाङःसैको एत वाह्ती येसु ख्रीस्इ बयःओ दोङ् पेओ कुरा दोःती परमेस्वर्कायः लुङ्ती ताङ्ह्तेःताक्सा खाय्तेःनानी। 12 लौ पुःचोङ् हौचोङ्य ङाकायः तेन्छ्याङ् इत स्याव्ओपाय् “जुगाङ् पेमालो” त नीङ्इ ताःतेःनानी यादो। खेःल ङा इत स्याव्आक्तीको परमेस्वर्कोः पेओ कुरा न्हाङ्तोलेः थोल्ह्ती तोओ लेःआः बा। 13 “पावुल्पाय् येसु ख्रीस्कोः काम् जाङ्ह्ओकायः इहाङः थुनती मुनाः” त दाय्ह्ओ सबै इ दर्बाल्कोः सीपाहीलम्इमा सबै अरुलम्इमा चीःनानी। 14 ओहाङःसैको एत चीःतीलेः नाःतो ङीकोः प्रभुकायः ङ्हाम्ओ पुःचोङ् हौचोङ्लम् ल्हुङ् घ्युम्माःत स्याव्ती ओउःकोः कुरा रैमामाःत फुती तोनानी। 15 ओउःमयःइ फुती तोसापाय् तोनीतो यात् नीस्खेइ पेमालो लओ ल्हुङ् स्याव्ती लयःकायः ताङ्ह्ताक्साकायः ख्रीस्कोः कुरा थोल्ह्ती तोनानी अरुखेइ दोङ् पेओ ल्हुङ्इ ओउःकोः कुरा थोल्ह्ती तोनानी। 16 इमयःखेइ ङाकायःपाय् “ख्रीस्कोः पेओ कुरा त्यानःकाय्ती तोसाकायः परमेस्वर्इ छ्युङ्ह्आथै” त चीःती ङाकायः राप्ती ख्रीस्कोः कुरा थोल्ह्ती तोनानी। 17 ओउः अरु पेमालोलम्खेइ “लौ थुनती मुओ पावुल्कायः न्हाङ्तोलेः मीतो स्याव्ताक्ती लीह्ताक्नी” त म्हर्ती ख्रीस्कोः कुरापाय् ले ब्रेह्तीलेः थोल्ह्ती तोनानी। 18 ओउःतलेः हायःनानी ओउःत हायःओपाय् दोह्मा दयःल। ओउः पेमालो ल्हुङ्इ तोओलम्खेइमा ओउः दोङ् तोओलम्खेइमा नीस्ज्योःमा ख्रीस्कोः पेओ कुरा थोल्ह्ती तोनानी ओउःत झ्यान्ते ङा चोङाय्तीलेः मुनाङः। माः रैस चोङाय्धै मुनाङः बा 19 दोह् हायःती दाय्ह्सा ङाकायः नीङ् परमेस्वर्कः आन तेतेःनै ओउःत झ्यान्ते येसु ख्रीस्कोः ग्वालामःइ लोने इ थुनओसै दल्ताक्नाःताङः एतलेः चीःआनाङः बा। 20 “इ आङ्हाङः मुतोक्हाङः ङा जुगाङ् रैमामाःत ल्हुङ् गीःतीलेः ख्रीस्कायः ताङ्ह्ताक्पाङः। सीनाःया स्याक्नाःया गलकायःमा ख्रीस्कायः ताङ्ह्ताक्पाङः” त ल्हुङ् आसती झाक्नाङः बा। ओहाङःसैको ओउःकःहाङः ङा गत खेःयामा रास्सा परङल। 21 दोह् हायःती दाय्ह्सा स्याक्नाङः त खेःया लौ ख्रीस्मा दोःलेःनाङः ओउःकोः काम्मा जाङ्ह्नाङः। सीनाङः त खेःया लौ न्हाङ्तोलेः ख्रीस्पाय् दोःलेःनाङः। 22 सेलः मुओहाङः पेओ काम् जाङ्ह्सा खाय्नाङः ओउःत झ्यान्ते गाव्खे पेनाः। 23 सीसाया स्याक्साया गाव् पेनाः त चीःङल। इ ल्हाव्ह्दैबाङ् फेती ख्रीस्कुस् मुसा आन झाक्नाङः ओउःत हायःओपाय् न्हाङ्तोलेः पेनाः। 24 ओउःत हायःसा ङाखेकायः पेसापाय् पेलेःनाः सेलः मुती नीङ्कायः स्यान्सामा लुङ्सामा ओउःपाय् नीङ्खेकायः न्हाङ्तोलेः पेलेःनाः। 25 ओउःत झ्यान्ते “ङा इहाङःलेः सेलः मुनाङः” त ल्हुङ्हाङः चीःनाङःस ओहाङःसैको नीङ् न्हाङ्तोलेः चोङाय्ती ङ्हाम्सा खाय्तेःनानी। 26 ङा नीङ्कःहाङः द्यान्ह्ती वाङ्सा बेलाहाङःमा नीङ्इ आन चोङाय्तीलेः येसु ख्रीस्कायः ताङ्ह्ताक्सा खाय्तेःनानी। 27 ओहाङःसैको दोह् खेःयाकायःमा ख्रीस्कोः पेओ समचार् ङ्हाम्ओलम्लो लेखा वाह्न। ओउःत हायःती नाङ्कायः ङाइ क्रुस्नेःनाङ्सया क्रुस्नेःनाङ्सलया “ओउःमयःइ यातैज्याङ् ल्हुङ् ग्रमःत मुती ब्राङ्तोलेः स्याव्ती ओउः पेओ समचार्कोः काम्पाय् त्युस्तीलेः जाङ्ह्नानी” त दाय्ह्ती नीङ्कायः नोःओ सायःपाङः। 28 ओउःत हायःती नीङ्कोः बीरोत्कः रैमाःत ल्हुङ् क्रोङ्तोलेः मुन। ओहाङःसैको ओउः बीरोत्इ एत च्यवःती नीङ्कायःपाय् “लौ ओउःमयःखेकायः परमेस्वर्इ दल्ताक्नाःथास ङीखेपाय् वाय्तोलेः स्याव्नाःतय्ही” त दाय्ह्ती लयःकोः ल्हुङ्हाङः चीःनाःइसी। 29 नीङ्पाय् दोह् हायःती ग्रमःत मुसा खेःतो दाय्ह्सा नीङ्कायःपाय् ङ्हाम्साकायः झुङ्आले खेःल ख्रीस्कायः नीङ्इ लीह्सीःओ गोरःसाकायःमा छ्युङ्ह्तेःइतो। 30 ओउःत लीह्सीःओ ङ्हाहाङःमा ङाइ ख्रीस्कोः बीरोत्सै गोरःआलाङः इत च्यवःतेःआनाङ्स। तेन्छ्याङ्मा ओउःतलेः “लीह्सीःओ गोरःधैलेः मुधाङ्नाः” त सायःतेःनानाङ्स। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.