फिलिप्पियों 4 - चम्बयाली नौआ नियम1 इधेरे तांइ मेरे प्यारे संगी विश्वासियों, मैं तुसा कने बड़ा वरी प्यार करदा ते मैं तुसा कने मिलणे रा इंतजार करेया करदा है, जे मेरी खुसी ते मेरा ताज हिन। ते मेरे प्यारेयों, प्रभु बिच विश्वास करणे बिच इसी तरिक्के कने मजबूत हुंदे जाओ। पौलुस री सलाह 2 मैं यूओदिया रे ते सुन्तुखे रे भी छंदे करदा की से अप्पु-मिते सुलह करी के परमेश्वर बिच सांती कने रैह्ण। 3 ते मैं मसीह री सेवा करणे वाले अपणे विश्वासी भ्याल सुजुगस का ए बिनती करदा, कि से तिन्हा जनानियां बिच भी सुलह कराई दये किजोकी तिन्हा जनानियां ने मसीह रा सुब बसेख फैलाणे बिच मेरे, क्लेमेंस ते मेरे बाकि रे साथियां कने बराबर मैहनत कित्ते री है। ते तिन्हेरे नां जिन्दगी री कताब बिच लिख्खे गेरे हिन। 4 प्रभु री वजह कने खुस रेयो, मैं फिरी बोलदा, खुस रेयो! 5 तुसा रा कौमल स्वभाव सारे लोक्कां पर प्रकट हो। मसीह यीशु रे हटणे रा दिन नेड़े है। 6 कुसकी भी गल्ल री फिकर मत करो पर हर हालात बिच तुसा री मिन्नतां, प्रार्थना ते याचिका रे जरिए, धन्यवाद कने परमेश्वर रे सामणे रख्खे जाण। 7 तां परमेश्वर री सांती जे सारी समझ का परे है, तुसा रे दिल ते तुसा री सोच्चां जो मसीह यीशु बिच बचाई करी रखगी। 8 इस तांइ ओ संगी विश्वासियों, जे गल्लां सच हिन, ते जे गल्लां आदरणीय हिन, ते जे गल्लां सही हिन ते जे गल्लां पवित्र हिन ते, जे गल्लां सोह्णि हिन, ते जे गल्लां दिलां जो भाणे वाली हिन, ते आखिरकार जे ठीक गुण ते तारिफ रे जोग्गे हिन, तिन्हा पर ध्यान लाया करो। 9 जे गल्लां तुसा मेरे का सिख्खे री हिन, ते अपणाई ते सूणी, ते मेरे बिच दिख्खी, तिन्हेरे जो ही मन्नेयां करों, तां सांती रे परमेश्वर ने तुसा कने रैह्णा। पौलुस रा फिलिप्पी सहर रे विश्वासियां रा शुकर करणा दान तांइ धन्यवाद 10 मैं परमेश्वर री वजह कने बड़ा खुस है की अवे इन्ने दिनां रे बाद तुसा ने फिरी मेरे जो याद करी के मेरे तांइ दान भेज्जेया; पक्का ही तुसा जो सुरु बिच भी इसेरा अदांजा थिया, पर तुसा जो मौक्का नी मिल्लेया। 11 ए नी की मैं अपणी जरुरतां री कमी री वजह कने ए बोलदा; पर मैं ए सिख्खे रा है की मैं जिस हालत बिच है; तिसी बिच संतोष करां। 12 मैं अमीरी बिच भी जीणा जाणदा ते गरीब्बी बिच भी जीणा जाणदा; मैं हर हालात बिच संतुष्ट रही सकदा, चाए मैं भूखा हो या मैं रजे रा हो, ते या चाए मेरे का सब किच्छ हो या किच्छ भी ना हो। 13 मसीह मेरे जो ताकत दिंदा ते तिस बिच मैं सब किच्छ करी सकदा। 14 तां भी तुसा मेरी मुसीबत बिच मेरे जो दान देई करी मेरी मदद कित्ती, तुसा ने खरा कित्तेया। 15 ओ फिलिप्पी सहर रे संगी विश्वासियों, तुसा अप्पु भी जाणदे की सुब बसेख री सुरुआत बिच, जां मैं मकिदुनिया प्रदेश का निकलेया, तां तुसा जो छड्डी करी होर कुसकी कलीसिया ने लैणे-दैणे रे मामले बिच मेरी मदद नी कित्ती। 16 इसी तरिक्के कने जां मैं थिस्सलुनीके प्रदेश बिच थिया, तां भी तुसा मेरी जरुरतां री कमी पूरी करणे तांइ इक्क बाहर कै पर दो वरी दान भेज्जेया थिया। 17 मैं ए नी लिख्खेया करदा है कि मैं तुसा का दान चाह्ंदा, पर मैं चाह्ंदा कि ए भी तुसा रे भले कम्मां री सुची बिच जुड़ी जाए जिन्हा तांइ परमेश्वर ने तुसा जो ईनाम दैणा। 18 मेरे का सारा किच्छ है, बल्कि जरुरत का भी जादा है; जे चीजां तुसा इपफ्रुदीतुस रे हत्थां भेजी थी तिन्हा जो पाई करी मैं रजी गे रा है, तुसा री भेज्जी री चीजां परमेश्वर जो चढ़ाए रे खुशबूदार दान ते कुर्बानी सांई हिन। जे परमेश्वर जो मंजुर ते पसंद आणे वाली चीजां हिन। 19 मेरा परमेश्वर भी अपणे तिस धन्न रे हिसाब कने जे महिमा कने मसीह यीशु बिच है, तुसा री हर इक्क घटी जो पूरा करगा 20 असा रे परमेश्वर ते पिता री बड़ाई हमेसा-हमेसा तिकर हुंदी रे आमीन। आखरी नमस्ते 21 मेरे पास्से का हर पवित्र मणू जो मसीह यीशु बिच मेरा नमस्ते बोल्लेयो। 22 सारे परमेश्वर रे लोक्कां जो, खासतौर पर जे मणू सम्राट रे घराने का विश्वास बिच आए रे हिन, तिन्हा जो नमस्ते बोल्लेयो। 23 असा रे प्रभु यीशु मसीह रा अनुग्रह तुसा री आत्मा कने रे। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.