ফিলিপীয় INTRO1 - Chakma Bibleআজল্ কধাগান ফিলিপী মণ্ডলী ইধু পৌলর লেখ্যে চিধিগান হুজি অবার্ চিধি এলঅ। ইয়েনত্ ইউরোপ ভিদিরে পত্তম মণ্ডলী থিদেবর্ এলঅ। এই মণ্ডলীবো অলদে উত্তর গ্রীস ভিদিরে রোমীয়গুনোর অধীনোত্ ম্যাসিডোনিয়া রেজ্যত্। ফিলিপী জেলোত্ থেবার দশ বজর্ পরেদি তে এই চিধিগান লেখ্যে। সিধু থেবার সময়োত্ গোজেনে তার্ ওইনে এক্কান আমক্ অবার্ কাম গোজ্জ্যে (প্রচারগ্কুনোর কামর্ কধানি ১৬:১৬-৩৪)। বেগত্তুন্ দাঙর্ আমক্ কামান অলঅ কয়েকদিনো ভিদিরে বেশ্ কিজু মানুচ্ খ্রীষ্ট উগুরে বিশ্বেজ্ গোজ্জ্যন। পৌলে যেক্কে এই চিদিগান লেখ্যে সেক্কে তে আরঅ জেলোত্ এলঅ। খ্রীষ্টর্ পক্ষে অন্যগুনে যিগুনে কাম গোজ্জ্যন তারার্ উল্লোমিত্যে তে দুঘ্ পার্ আর ফিলিপীত ভুল্ শিক্ষ্যে দেনার কারনে দিদ্দেরি পেইয়্যে। ইয়েনি বেক্কানি থেলেয়ো তার্ খ্রীষ্ট উগুরে নির্ভরতার আর অমকদ হুজির্ কধা তে তারারে জানেয়্যে। তার্ প্রচার-যাত্রাত্ ফিলিপীয় বিশ্বেজিগুনোর্ দীনার সাহায্যত্যে ভালেদি জানানাগান্ এলদে এই চিধি লেগানার্ বিশেষ উদ্দেচ্চ্য। যুনিয়ো তে তারা ইধু কয়েকদিন এলঅ তো তার্ এই চিধিগানত্ গমেডালে বুঝো যায় যে, ফিলিপীয় মণ্ডলী উগুরে তার্ কোচ্পানাগান কত্তমান গোভীন্ এলঅ। মূলুক্ মূলুক্ কধানি: (ক) পৌলর ভালেদি জানানা, বাঈনী গরানা আর তবনা (১:১-১১) (খ) পৌলর নিজো অবস্থা (১:১২-২৬ পদ) (গ) খ্রীষ্টর্ আদর্শ অনুসারে চলানা (১:২৭-২:১৮) (ঘ) তীমথিয় আর ইপাফ্রদীতর উদাহরন্ (২:১৯-৩০) (ঙ) বেদমা মাষ্টরুনো পৌইদ্যেনে উজিয়ার্ গরানা (৩:১-৪:৯ পদ) (চ) ফিলিপীয় মণ্ডলীর বক্শিজত্যে পৌলর্ ভালেদি (৪:১০-২০ পদ) (ছ) শেজর্ ভালেদি আর আশীদ্বাদ (৪:২১-২৩) |
Copyright © 2021 Bangladesh Bible Society
Bangladesh Bible Society