ফিলিপীয় 3 - Chakma Bibleখ্রীষ্টরে লাভ্ গরানা বেগত্তুন্ দাঙর্ কধা 1 জেরেদি কং, মর্ ভেইয়ুন, তুমি প্রভু লগে আঘঅ বিলিনে হুজি অ। তমা ইধু আরঅ একই কধা লেগদে মর্ কনঅ দুঘ্ ন-অর্, আর তমারে উজিয়ার্ গুরিবাত্যে সিয়েন গরানা গম্। 2 সেই কুগুরুনোত্তুন্, অত্তাৎ যিগুনে ভান্ন্যেই কাম্ গরন্ আর কিয়্যে উগুরে কাবা-কুদো গরানা উগুরে জোর্ দুয়োন তারাত্তুন্ উজিয়ার্! 3 আমি ঘেচ্চ্যেকগুরি চুনু মাঢবোর চামান কাপ্যে মানুচ্, কিয়া আমি গোজেন আত্মার্ মাধ্যমে তার্ উবোসনা গুরিই আর খ্রীষ্ট যীশুরে নিইনে বার্ গুরিই আর চুনু মাঢা কাপ্যে উগুরে নির্ভর ন-গুরিই। 4 মুই খালিক্ সিয়েন গুরি পাত্তুং। যুনি কেঅ মনে গরে, আচার-অনুষ্ঠান উগুরে নির্ভর্ গুরিবার্ তার কারন আঘে সালে তে হবর্ পোগ্ যে, মর্ তাত্তুন্ বেশ্ আরঅ কারন আঘে। 5 আট্য দিনোত্ মর্ চুনু মাঢাবোর চামান্ কাবা ওইয়্যে; ইস্রায়েল জাদ ভিদিরে বিন্যামীন গুট্টিত্ মর্ জর্ম; মুই এক্কো খাটি ইব্রীয়; মোশির রীদি-সুদোম পালানা পৌইদ্যেনে মুই এক্কো ফরীশী; 6 ধর্ম পৌইদ্যেনে মুই এমন্ একবুচ্চ্যে এলুং, খ্রীষ্ট মন্ডলী উগুরে মুই অত্যেচার্ গত্তুং; আর গোজেনর্ মানি লোইয়্যে অবার্ আজায় মোশির আইন-কানুন্ পালানা পৌইদ্যেনে কেঅ মরে বদ্নাঙ্ গুরি ন-পাত্তাক্। 7 মাত্তর্ সিয়েনত্ মর্ যেদক্কানি লাভ্ ওইয়্যে খ্রীষ্টত্যে মুই ইক্কিনে সিয়েনিরে ক্ষতি বিলিনে মনে গরং। 8-9 আসলে যাত্যে মুই এদক্কানি ক্ষতি স্বীগের্ গোজ্জ্যং মর্ সেই প্রভু খ্রীষ্ট যীশুরে জানানা ভিদিরে যে অাশিদ্বাদ্তান আঘে, তা কায়কুরে আর বেক্কানিরে মুই ক্ষতি বিলিনে মনে গরং। খ্রীষ্টরে যেন মুই পেই পারং আর মরে যেন খ্রীষ্ট সমারে এগত্তর্ দেগা যায়, সেনত্যে মুই সিয়েনিরে কাজর্ বিলিনে মনে গরং। আইন-কানুন্ পালন গরানাত্যে যে মুই নিদ্দুজি সিয়েন নয়, মাত্তর্ খ্রীষ্ট উগুরে বিশ্বেজর্ কারনে গোজেনে মরে নিদ্দুজি ইজেবে মানি লোইয়্যে। এ নিদ্দুজিগান গোজেনত্তুন্ এজে আর সিয়েন বিশ্বেজ্ উগুরে নির্ভর গরে। 10 মুই খ্রীষ্টরে জানিবাত্যে চাং আর যে খেমতালোই তারে মরণত্তুন্ জেদা গরা ওইয়্যে সেই খেমতাগানরে জানিবাত্যে চাং। মুই তার্ দুঘোর্ ভাগী অবার্ চাং। আজল্ কধা, যে মনভাব্পোই তে মোজ্জ্যে মুইয়ো সেবাবোত্যে মনভাব্ পেবাত্যে চাং। 11 সেনত্যে যিয়েন অদঅ সাৎ মুই ঘেচ্চ্যেকগুরি মরণত্তুন্ জেদা ওই উদিম। শেজ্ দুজিগান ইন্দি ধাবা দেনা 12 মুই যিয়েনত্যে চেষ্টা গরঙর্ সিয়েন ইক্কিনে যে পেইয়োং বা পুরণ ওইয়্যে এমন্ নয়। মাত্তর্ যিয়েনত্যে খ্রীষ্ট যীশু মরে ধোজ্জ্যে সিয়েন ধুরিবাত্যে মুই ধাবা দোঙর্। 13-14 ভেইলগ্, মুই যে সিয়েন ধুরি পাজ্জ্যং সিয়েন মনে ন-গরং। মাত্তর্ এক্কান কাম মুই গরঙর্-পিজেদি বেক্কানি ভুলি যেইনে মুজুঙেদি উজেইনে বেক বলান্দোই মুই শেষ্ দুযিগানদি উজেই যাঙর্। ইয়েন্দোই যেন খ্রীষ্ট যীশুর মাধ্যমে গোজেনর্ স্বর্গমোক্ক্যে ডাগনিগান ইধু যে বক্শিজ্চান আঘে সিয়েন মুই পাং। 15 ইয়েনত্যে আমি যিগুনে গম মানুচ্ আমাত্তুন্ সেই একই মনভাব থানা উচিত। আর যুনি কনঅ পৌইদ্যেনে তমার্ অন্য বাবোত্যে মনভাব থায় সালে গোজেনে তমারে সিয়েন্অ দেগেই দিবো। 16 যিয়েন ওক্, আমি যেবাবোত্যে অবস্থানত্ লুম্মেয়ি সেই মজিম চলানা উচিত। 17 ভেইলগ্, তুমি বেক্কুনে মঅ ধোক্ক্যেন গুরি চলঅ, আর যিগুনে এবাবোত্যেগুরি আঢাউদো গরন্ তারারে চিনি রাগঅ। কেধোক্ক্যেন গুরিনে চলা পরে সিয়েন আমি তমারে দেগেয়্যেই। 18 মুই তমারে বার্ বার্ কোইয়োং আর ইক্কিনে চোগো পানিলোই আরঅ কঙত্তে, এমন ভালোকজন আঘন্ যিগুনে খ্রীষ্টর্ ক্রুশোর শত্রু ধোক্ক্যেন আঢাউদো গত্তন। 19 তারার্ ভাগ্যত্ আঘেদে ভস্ত অনা; পেট্টো অলঅ তারার্ গোজেন; যিয়েন লাজেবার্ বেপার সিয়েন্দোই তারা দেমাগ্ গরন্; আর বানা জাগতিগ পৌইদ্যেনে তারার্ মনানি পড়ি আঘে। 20 মাত্তর্ আমার আজল্ থেবার জাগায়ান দঅ স্বর্গত্; সিয়েনত্তুন্ আমার উদ্ধোর্ গুরিয়্যে প্রভু যীশু খ্রীষ্টর্ এযানাগান্ আমি আওজ্ গুরিনে বাজ্জেই আঘি। 21 তে আমার বল্পোজ্জ্যেলোই ভরা কিয়্যেগান বুদুলিনে তার্ মহিমালোই ভরা কিয়্যে ধোক্ক্যেন গুরিবো। যে খেমতাগান্দোই তে বেক্কানি নিজো অধিনে আনে সেই খেমতাগান্দোই তে এই কামান্ গুরিবো। |
Copyright © 2021 Bangladesh Bible Society
Bangladesh Bible Society