ယေႇရမိ 3 - သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး

ၵူၼ်း​မဵဝ်း​ဢီႉသရေႇလႃႉ​ဢၼ်​ဢမ်ႇ​မီး​သဵတ်ႈ​ၸႃႇ

¹ ၶဝ်​လၢတ်ႈ​လႄႈ​ဝႃႈ၊ ပေႃး​ၽူႈ​ၸၢႆး​ပႅတ်ႈ​မေး​မၼ်း​လႄႈ မေး​မၼ်း​ၼၼ်ႉ ဢွၵ်ႇ​ၵႂႃႇ​သေ​ၵႃႈ​တီႈ​မၼ်း​လႄႈ ပဵၼ်​မေး​ၵူၼ်း​တၢင်ႇ​ၵေႃႉ​ယဝ်ႉ​ၸိုင်၊ မၼ်း​ထုၵ်ႇ​လီ​ၶိုၼ်း​ဢဝ်​မၼ်း​ၼၼ်ႉ​ႁိုဝ်။ ဝႃႈ​ၼင်ႇ​ၼႆ​ဢေႃႈ။ မိူင်း​ၼၼ်ႉ​တၵ်း​ပဵၼ် ဢၼ်​ၵူဝ်ႈ​ၵိူၵ်ႇ​ဢမ်ႇ​ၸႂ်ႈ​ႁိုဝ်။ ၵူၺ်း​ၵႃႈ မႂ်း​ၼႆႉ​ၸပ်း​ၸွမ်း​ၸူႉ​ၼမ်​ၼႃႇ​လႄႈ ၽိတ်း​ပိူင်ႈ​ယဝ်ႉ​သေ​ၵေႃႈ၊ ၶိုၼ်း​မႃး​ၸူး​တီႈ​ၵဝ်​သေ​ၵမ်း၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

² ဢဝ်​တႃ​မႂ်း​ႁႅၼ်​တူၺ်း​ၵႃႈ​တီႈ ဢၼ်​သုင်​တင်း​လၢႆ​လႄႈ ႁႃ​ဢဝ်​တီႈ​ဢၼ်​မႂ်း​ဢမ်ႇ​ယၢမ်ႈ​တွၼ်ႉ​ၼွၼ်း​လူၺ်ႈ​ၵၼ် တင်း​ၽူဝ်​ဢွၼ်ႇ​ၼၼ်ႉ​သေ​တီႈ​တီႈ​တႃႉ။ မႂ်း​ၼင်ႈ​ယူႇ​ၵႃႈ​တီႈ​သဵၼ်ႈ​တၢင်း​တင်း​လၢႆ မိူၼ်​ၸိူဝ်ႉ​ၼင်ႇ​ၵူၼ်း​ဢရေႇပျႃႉ ၵႃႈ​ၼႂ်း​ထိူၼ်ႇ​ၼႂ်း​ၶိူဝ်း​ၼၼ်ႉ သေ​လႄႈ ဢဝ်​တင်း မေႇ​ထုင်ႇ​ဢၼ်​ဢမ်ႇ​တြႃး​မႂ်း ဢိၵ်ႇ​တင်း လွင်ႈ​တၢင်း​ဢၼ်​ႁၢႆႉ​ယုတ်ႈ​မႂ်း ႁႂ်ႈ​မိူင်း​ၵူဝ်ႈ​ၵိူၵ်ႇ​ယဝ်ႉ။-

³ ပိူဝ်ႈ​ၼႆ​လႄႈ ပိၵ်ႉ​သမ်ႉ​ၽႃႉ​လႅင်ႉ​လႄႈ ၽူၼ်​ဢမ်ႇ​တူၵ်း​တေႃႇ​ထိုင်​ႁွတ်ႈ ၽူၼ်​ႁၢင်​ပီႊ​သေ​ၵေႃႈ၊ မႂ်း​ယင်း​မီး​ၼႃႈ​ၽၢၵ်ႇ မႄႈ​မွၵ်ႇ​ယႃႈ​ယူႇ​လႄႈ ပႄႇ​သၽေႃး​ဢၼ်​ဢူၵ်း၊​ဢၼ်​ဢၢႆ​ၼၼ်ႉ​ပႅတ်ႈ​ယဝ်ႉ။-

⁴ ၸႃႉ​ၸဵမ်​မိူဝ်ႈ​လဵဝ်​ၼႆႉ​လႄႈ မႂ်း​တၵ်း​ႁွင်ႉ​သႅၼ်ႇ​တီႈ​ၵဝ်​လႄႈ​ဝႃႈ၊ ပေႃႈ​ၵဝ်​ၶႃႈ​ဢိူၺ်း၊ ၸဝ်ႈ​ႁဝ်း​ပဵၼ် ၸဝ်ႈ​ဢၼ်​ပႂ်ႉ​ၶႃႈ​ၸဝ်ႈ​ယူႇ​ၸဵမ်​မိူဝ်ႈ ဢသၢၵ်ႈ​ၶႃႈ​ၸဝ်ႈ​ယင်း​လဵၵ်ႉ ယင်း​ဢွၼ်ႇ​ၼၼ်ႉ တီႈ​ၶႃႈ​ယဝ်ႉ၊ ဝႃႈ​ၼင်ႇ​ၼႆ​ႁိုဝ်။-

⁵ မၼ်း​ၸဝ်ႈ​ၼၼ်ႉ တၵ်း​ၸႂ်​မႆႈ​ၶႆႈ​ၸႃႉ​ယူႇ​တႃႇ​သေႇ​ႁိုဝ်။ မၼ်း​ၸဝ်ႈ​တၵ်း​မၢတ်ႈ​တွင်း​မၼ်း​ဝႆႉ တေႃႇ​ထိုင်​ႁွတ်ႈ​တီႈ​သုတ်း​တီႈ​ၵွႆ​ႁိုဝ်။ တူၺ်း​လူး၊ မႂ်း​လၢတ်ႈ​သေ​လႄႈ ႁဵတ်း​လွင်ႈ​တၢင်း​ဢၼ်​ႁၢႆႉ​ဢၼ်​ယုတ်ႈ​တင်း​လၢႆ ၸွမ်း​ၵႃႈ​ၼင်ႇ​ဢၼ် မႂ်း​တၢတ်ႈ​ၼိူင်ႇ​လႆႈ​ၼၼ်ႉ​ယဝ်ႉ လူင်​ပႄႇ။

ဢီႉသရေႇလႃႉ​လႄႈ​ယူႉတႃႉ​တၵ်း​လႆႈ​ပိၼ်ႇ​ၸႂ်

⁶ လႆႈ​သမ်ႉ ၼႂ်း​ၸူဝ်ႈ​ပၢၼ်​ၶုၼ်​လူင်​ယူဝ်းသီႉယႃႉ​ၼၼ်ႉ၊ ထႃႇဝရႃႉ​ၽြႃး မီး​ဢမိင်ႉ​တီႈ​ၵဝ်​ၸမ်ႉ၊ မႂ်း​ႁၼ်​လွင်ႈ​တၢင်း​ဢၼ် မဵဝ်း​ဢီႉသရေႇလႃႉ ဢၼ်​ၽွၵ်ႈ​ပျၢၼ်ႇ​ၶိုၼ်း​ၵႂႃႇ​ၼၼ်ႉ ႁဵတ်း​ၼၼ်ႉ​ယဝ်ႉ​ႁိုဝ်။ မၼ်း​ၶိုၼ်ႈ​ၵႃႈ​ၼိူဝ်​လွႆ​ဢၼ်​သုင်​ၵႃႈ​မီး​လႄႈ ၶဝ်ႈ​ၵႃႈ​တႂ်ႈ​တူၼ်ႈ​မႆႉ ဢၼ်​လိပ်း​၊ဢၼ်​ၶဵဝ်​ၵႃႈ​မီး​ၼၼ်ႉ သေ​လႄႈ ႁဵတ်း​မႄႈ​မွၵ်ႇ​ယႃႈ​ယဝ်ႉ။-

⁷ မၼ်း​ၼၼ်ႉ ႁဵတ်း​လွင်ႈ​တၢင်း ၵူႈ​ၸိူဝ်ႉ​ၵူႈ​ပိူင်​ၸိူဝ်း​ၼၼ်ႉ သေ​ယဝ်ႉ၊ ၵဝ်​လၢတ်ႈ​လႄႈ​ဝႃႈ၊ ၶိုၼ်း​မႃး​တီႈ​ၵဝ်​သေ​ၵမ်း၊ ဝႃႈ​ၼင်ႇ​ၼႆ​သေ​ၵေႃႈ မၼ်း​ဢမ်ႇ​ၶိုၼ်း​ဢမ်ႇ​မႃး။ လွင်ႈ​တၢင်း​ၼၼ်ႉ​ၸိုင်၊ ၼွင်ႉ​ယိင်း​မၼ်း​ယူႉတႃႉ ဢၼ်​သဵတ်ႈ​ၸႃႇ​လူႉ​ၼၼ်ႉ ႁၼ်​ယူႇ​ဢေႃႈ။-

⁸ ၵဝ်​လႆႈ​ႁၼ်​လွင်ႈ​ဢၼ် ပိၵ်ႉ​သမ်ႉ​ၵွပ်ႈ​ပိူဝ်ႈ​လွင်ႈ​တၢင်း​ၼႆႉ​လႄႈ မဵဝ်း​ဢီႉသရေႇလႃႉ ဢၼ်​ၽွၵ်ႈ​ပျၢၼ်ႇ​ၶိုၼ်း​ၼၼ်ႉ ၽိတ်း​ပိူင်ႈ​သေ​ယဝ်ႉ၊ ၵဝ်​ပႅတ်ႈ​ၵၼ်​တင်း​မၼ်း​လႄႈ ဢၢပ်ႈ​ပၼ်​လိၵ်ႈ​ဢၼ်​ပုတ်း ဢၼ်​ၶၢတ်ႇ​ယဝ်ႉ​သေ​ၵေႃႈ၊ ၼွင်ႉ​ယိင်း​မၼ်း​ယူႉတႃႉ ဢၼ်​သဵတ်ႈ​ၸႃႇ​လူႉ​ၼၼ်ႉ ယင်း​ဢမ်ႇ​ၵူဝ်​ဢမ်ႇ​ႁႄ​လႄႈ ၵႂႃႇ​လႄႈ​ႁဵတ်း​မႄႈ​မွၵ်ႇ​ယႃႈ ယူႇ​ၼၼ်ႉ​ဢေႃႈ။-

⁹ ၵွပ်ႈ​ပိူဝ်ႈ​ဢၼ် တၢင်း​ဢၼ် မၼ်း​ႁဵတ်း​မေႇ​ထုင်ႇ ဢၼ်​ဢမ်ႇ​တြႃး​ၼၼ်ႉ ၶုၼ်ႇ​သဝ်ႈ​လမ်​ဝဝ်း​လႄႈ မိူင်း​လႆႈ​မီး​တၢင်း​ဢၼ်​ၵူဝ်ႈ​ၵိူၵ်ႇ​လႄႈ မၼ်း​ၽိတ်း​ပိူင်ႈ​လူၺ်ႈ မၢၵ်ႇ​ႁိၼ်​ၵွၼ်ႈ​ႁိၼ်​တင်း​လၢႆ ဢိၵ်ႇ​တင်း တုမ်​မႆႉ​ပွတ်း​မႆႉ​တင်း​လၢႆ​ဢေႃႈ။-

¹⁰ ပိၵ်ႉ​သမ်ႉ မီး​ဢပႅတ်ႈ​ထၢၼ်ႇ​ၼၼ်ႉ သေ​ၵေႃႈ၊ ၼွင်ႉ​ယိင်း​မၼ်း​ယူႉတႃႉ ဢၼ်​သဵတ်ႈ​ၸႃႇ​လူႉ​ၼၼ်ႉ ဢမ်ႇ​ပႃး​ဢဝ်​တင်း​ႁူဝ်​ၸႂ်​သဵင်ႈ​သဵင်ႈ ၶိုၼ်း​မႃး​ၸူး​ၵႃႈ​တီႈ​ၵဝ်။ ႁဵတ်း​ၼင်ႇ​ႁၢင်ႈ​ၶိုၼ်း​မႃး​ၵူၺ်း၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

¹¹ လႆႈ​သမ်ႉ ထႃႇဝရႃႉ​ၽြႃး မီး​ဢမိင်ႉ​တီႈ​ၵဝ်​ၸမ်ႉ၊ ဢီႉသရေႇလႃႉ ဢၼ်​ၽွၵ်ႈ​ပျၢၼ်ႇ​ၶိုၼ်း​ၼၼ်ႉ ႁႂ်ႈ​တူဝ်​ၸဝ်ႈ​ၵဝ်ႇ​ပဵၼ် ဢၼ်​သိုဝ်ႈ​တေႃႇ​ၼႃႇ​သေ ယူႉတႃႉ​ဢၼ်​သဵတ်ႈ​ၸႃႇ​လူႉ​ၼၼ်ႉ​ဢေႃႈ။-

¹² ၵႂၢမ်း​ဢၼ်​မႂ်း​တၵ်း​လႆႈ​ၵႂႃႇ​လႄႈ ႁွင်ႉ​ပၢဝ်ႇ​ႁွင်ႉ​သေႃႇ​ၵႃႈ​တီႈ​ၽၢႆႇ​ၼႃႈ​တၢင်း​ႁွင်ႇ​ၸမ်ႉ၊ ဢီႉသရေႇလႃႉ ဢၼ်​ၽွၵ်ႈ​ပျၢၼ်ႇ​ၶိုၼ်း​ဢိူၺ်း၊ ၶိုၼ်း​မႃး​သေ​ၵမ်း၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။ ၵဝ်​တၵ်း​ဢမ်ႇ​ႁဵတ်း​တၢင်း​ဢၼ် တိုတ်ႉ​ၼႃႈ​ၸႃႉ​ၼႃႈ​ၸဵတ်ႉ​တေႃႇ​မႂ်း။ ၵဝ်​မီး​ၸႂ် ၵရူႉၼႃႇ​လႄႈ ၸၢင်ႈ​ၶႆႈ​ၸႃႉ​ၶႆႈ​ၸဵတ်ႉ​ယူႇ​တႃႇ​သေႇ​ဢမ်ႇ​ၸႂ်ႈ၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

¹³ ၵူၺ်း​ၵွမ်ႉ​ႁပ်ႉ​တုင်း​ဢဝ် တွင်း​ပၢၼ်ႇ​လွင်ႈ​တၢင်း​ဢၼ်​ႁၢႆႉ​ဢၼ်​ယုတ်ႈ​ဢၼ်​ဝႃႈ ဢပႅတ်ႈ​ဢၼ်​မႂ်း​ပုင်ႇ​ၵၢၼ်ႇ ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ​မႂ်း​လႄႈ ၽိတ်း​ပိူင်ႈ​ႁူမ်ႈ​လူၺ်ႈ​ၵၼ်​တင်း​ၶႅၵ်ႇ တင်း​လၢႆ ဢၼ်​မႂ်း​ထူပ်း ၵႃႈ​တီႈ​တႂ်ႈ​တူၼ်ႈ​မႆႉ ဢၼ်​လိပ်း​ဢၼ်​ၶဵဝ် ၵႃႈ​မီး​လႄႈ ဢမ်ႇ​ထွမ်ႇ​ဢမ်ႇ​ဢဝ်​ၵႂၢမ်း​ၵဝ်​ၼၼ်ႉ​ၵူၺ်း​တႃႉ၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

¹⁴ လုၵ်ႈ​လၢင်း​ဢၼ် ၽွၵ်ႈ​ပျၢၼ်ႇ​ၶိုၼ်း​ၶဝ်​ဢိူၺ်း၊ ဢွၼ်​ၵၼ်​ၶိုၼ်း​မႃး​တႃႉ၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။ ၵဝ်​ပဵၼ်​ၸဝ်ႈ ပဵၼ်​ၽူဝ်​သူ​လႄႈ တၵ်း​လိူၵ်ႈ​ၵဵပ်း​ဢဝ်​ၵႃႈ​ၼႂ်း​သူ ယေႈ​ဝဵင်း​ယေႈ​ၵေႃႉ၊ ၵႃႈ​ၼႂ်း​မဵဝ်း​ၸိူဝ်ႉ​ၶိူဝ်း ယေႈ​မဵဝ်း​သွင်​ၵေႃႉ​သေ​လႄႈ ဢဝ်​သူင်ႇ​ၵႃႈ​တီႈ​ဝဵင်း​ၸီႉဢုၼ်ႇ​ဢေႃႈ။-

¹⁵ ၵဝ်​တၵ်း​ဢဝ်​ၶဝ်​ၸိူဝ်း​ဢၼ်​လူ​ဢၼ်​ထိင်း ဢၼ်​ထုၵ်ႇ​ၸႂ်​ၵျိူၵ်ႈ​ၸႂ်​ၵဝ်​ၼၼ်ႉ ဝႆႉ​ၵႃႈ​ၼိူဝ်​သူ​လႄႈ​ၶဝ်​ၼၼ်ႉ တၵ်း​ပျေႉ​ၸုမ်ႇ​ဝႆႉ​တင်း​ၺၢၼ်ႇ​ပိင်ႇ​ၺႃႇ​ယူႇ သေ​လႄႈ ဢွၼ်​ၵၼ်​လဵင်ႉ​လူ​သူ​ဢေႃႈ။-

¹⁶ ၼႂ်း​ၶိင်ႇ​မိူဝ်ႈ​ၼၼ်ႉ မိူဝ်ႈ​ဢၼ်​သူ​ယႂ်ႇ​ၽႄႈ​ၼမ်​မႃး​လႄႈ တူဝ်း​တွၼ်း​မႃး ၵႃႈ​တီႈ​မိူင်း​ၸဝ်ႈ​ၼၼ်ႉ​ၸိုင်၊ ၵမ်း​လိုၼ်း​ၶဝ်​တၵ်း ဢမ်ႇ​လႆႈ​ႁွင်ႉ​လႆႈ​ဝႃႈ တိူၵ်ႈ​ပတီႉၺိၺ်ႇ ထႃႇဝရႃႉ​ၽြႃး၊ ဝႃႈ​ၼင်ႇ​ၼႆ​ၼၼ်ႉ။ ဢမ်ႇ​လႆႈ​ၸႂ်​ၸပ်း​ၸႂ်​ၸွႆး​မၼ်း။ ဢမ်ႇ​လႆႈ​ၶုၵ်း​ၸႂ်​လႆႈ​ၶႆႈ​ၸႂ်​ထူပ်း​မၼ်း။ ဢမ်ႇ​လႆႈ​လူ​တူၺ်း​လုမ်း​လႃး​မၼ်း။ ၵမ်း​လိုၼ်း​ဢမ်ႇ​လႆႈ​ႁဵတ်း​လႃး​လႃး၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

¹⁷ မိူဝ်ႈ​ၼၼ်ႉ ၶဝ်​တၵ်း​ႁွင်ႉ​ႁဵၵ်ႈ ဝဵင်း​ယေႇရူႉသလႅမ်ႇ​လႄႈ​ဝႃႈ၊ ပလၢင်ႇ​ထႃႇဝရႃႉ​ၽြႃး၊ ဝႃႈ​ၼင်ႇ​ၼႆ​လႄႈ ၵူၼ်း​ၵူႈ​ၸိူဝ်ႉ​ၵူႈ​မဵဝ်း တၵ်း​ၸူႉ​ၵၼ်​တုမ်​ၵၼ် ၵႃႈ​တီႈ​မၼ်း ၵႃႈ​တီႈ​ၼႃႇ​မႃႉ​ၸိုဝ်ႈ​သဵင် ထႃႇဝရႃႉ​ၽြႃး ၵႃႈ​ၼႂ်း​ဝဵင်း​ယေႇရူႉသလႅမ်ႇ​ဢေႃႈ။ ၵမ်း​လိုၼ်း ၶဝ်​ဢမ်ႇ​လႆႈ​ဢွၼ်​ၵၼ်​ၸွမ်း​သၽေႃး တၢင်း​ဢၼ်​ႁူဝ်​ၸႂ်​ၶဝ် ဢၼ်​ႁၢႆႉ​ဢၼ်​ယုတ်ႈ​ၼၼ်ႉ ၵမ်​ၵျၢင်ႉ​ၵႅၼ်ႇ​ၵႅၼ်ႇ​ၶႅင်​ၶႅင်​ၼၼ်ႉ။-

¹⁸ ၼႂ်း​ၶိင်ႇ​ၵႃႇလႃႉ​မိုဝ်ႉ​ဝၼ်း​ၼၼ်ႉ မဵဝ်း​ယူႉတႃႉ တၵ်း​ႁူမ်ႈ​ပွင်း​လူၺ်ႈ​ၵၼ်​တင်း မဵဝ်း​ဢီႉသရေႇလႃႉ ယူႇ​သေ​လႄႈ လုၵ်ႉ​သေ​ၵႃႈ​တီႈ​ၼႃႈ တၢင်း​ႁွင်ႇ​မႃး မုၵ်ႉ​လဵဝ်​ၸိူဝ်း​လဵဝ်​ၵူၺ်း​လႄႈ ႁွတ်ႈ​ထိုင်​ၵႃႈ​တီႈ​မိူင်း​ဢၼ်​ၵဝ်​လႆႈ​ပၼ်​ပုၼ်ႈ​ဢၼ် ပူႇ​သူ​မွၼ်ႇ​သူ ၶၢမ်ႇ​ဢမူၺ်ႇ​ၼၼ်ႉ​ဢေႃႈ။

ၵူၼ်း​ၽြႃး​ပဵၼ်​ၸဝ်ႈ​ဢၼ်​သဵတ်ႈ​ၸႃႇ​လူႉ

¹⁹ ၵူၺ်း​ၵႃႈ​ၵဝ်​ထၢမ်​လႄႈ​ဝႃႈ၊ ၵဝ်​တၵ်း​လႆႈ​ဢဝ်​မႂ်း​ဝႆႉ ၵႃႈ​ၼႂ်း​လုၵ်ႈ​လၢင်း တင်း​လၢႆ​လႄႈ ဢဝ်​မိူင်း​ဢၼ်​သႃႇ​ယႃႇ၊ မိူင်း​တီႈ​ဢၼ်​ၶၢမ်ႇ​ဢမူၺ်ႇ ဢၼ်​မုၼ်ႈ​ယႂ်ႇ ပဵၼ်​ၸိၵ်း​ပဵၼ်​ၸွမ်​မိူင်း​တင်း​လၢႆ​ၼၼ်ႉ ပၼ်​တီႈ​မႂ်း​ၸိူဝ်ႉ​ၼင်ႇ​ႁိုဝ်။ ဝႃႈ​ၼင်ႇ​ၼႆ​လႄႈ သမ်ႉ​လၢတ်ႈ​လႄႈ​ဝႃႈ၊ မႂ်း​တၵ်း​လႆႈ ႁွင်ႉ​ႁဵၵ်ႈ​ၵဝ် ပေႃႈ​လႄႈ ဢမ်ႇ​လႆႈ​ဝႄႈ​ပိူင်ႈ​ၵဝ်​သေ​လႄႈ​ၵႂႃႇ၊ ဝႃႈ​ၼင်ႇ​ၼႆ​ဢေႃႈ။-

²⁰ မဵဝ်း​ဢီႉသရေႇလႃႉ​ဢိူၺ်း၊ ၸိူဝ်ႉ​ၼင်ႇ မေး​ဢၼ်​ယႃႉ​သဵတ်ႈ​ၸႃႇ​ၼၼ်ႉ၊ ယႃႉ​သဵတ်ႈ​ၸႃႇ​တီႈ​ၵဝ်​ယဝ်ႉ၊ ဝႃႈ​ၼင်ႇ​ၼႆ​လႄႈ ထႃႇဝရႃႉ​ၽြႃး မီး​ဢမိင်ႉ​ဢေႃႈ။-

²¹ လႆႈ​ငိၼ်း​သဵင်​ၵႃႈ​ၼိူဝ် တီႈ​ဢၼ်​သုင်​တင်း​လၢႆ ဢၼ်​ဝႃႈ တၢင်း​ဢၼ် ၵူၼ်း​မဵဝ်း​ဢီႉသရေႇလႃႉ​တင်း​လၢႆ ႁႆႈ​ႁွင်ႉ ဢိၵ်ႇ​တင်း တၢင်း​ဢၼ်​ၶဝ်​တွင်း​ပၢၼ်ႇ​ၼၼ်ႉ​ယဝ်ႉ။ လွင်ႈ​မၼ်း​ၸမ်ႉ ၶဝ်​ဢွၼ်​ၵၼ် ၽိတ်း​တၢင်း​ပိူင်ႈ​တၢင်း​လႄႈ လူင်​လိုမ်း ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ ၶဝ်​ပႅတ်ႈ​ယဝ်ႉ။-

²² လုၵ်ႈ​လၢင်း​ဢၼ်​ၽွၵ်ႈ​ပျၢၼ်ႇ​ၶိုၼ်း​ၶဝ်​ဢိူၺ်း၊ ဢွၼ်​ၵၼ်​ၶိုၼ်း​မႃး​သေ​ၵမ်း။ ၵဝ်​တၵ်း​ႁဵတ်း​ႁႂ်ႈ တၢင်း​ဢၼ်​ၽွၵ်ႈ​ပျၢၼ်ႇ​ၶိုၼ်း​ၼၼ်ႉ သၢၵ်ႈ​သႃႇ​ၶႅၼ်း​မႃး​ဢေႃႈ။ ၶဝ်​ၵေႃႈ​လၢတ်ႈ​လႄႈ​ဝႃႈ၊ ၶႃႈ​ၸဝ်ႈ​ႁဝ်း​ၶဝ်​မႃး​ၸူး​တီႈ​ၸဝ်ႈ​ႁဝ်း​တီႈ​ၶႃႈ​ဢေႃႈ။ ၸဝ်ႈ​ႁဝ်း​ပဵၼ် ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ​ႁဝ်း​ၶႃႈ​တီႈ​ၶႃႈ​ဢေႃႈ။-

²³ ၵုင်း​တင်း​လၢႆ ဢိၵ်ႇ​တင်း သၼ်​လွႆ​ၼမ်​ၼႃႇ​ၸိူဝ်း​ၼၼ်ႉ ပဵၼ်​ဢၼ်​လၢႆ​လၢႆ ဢမ်ႇ​ပွင်ႇ​လွင်ႈ​ၵႃႈ​သင် ဢမၢၼ်ႇ​ၶၼ်​ပဵၼ်​လႄႈ ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ​ႁဝ်း​ၶႃႈ​ၼၼ်ႉ ပဵၼ်​လွင်ႈ​ဢၼ် ၵႄႇ​သႄႇ​ၶျွတ်ႈ​ဢဝ် မဵဝ်း​ဢီႉသရေႇလႃႉ​ဢေႃႈ။-

²⁴ လွင်ႈ​တၢင်း​ဢၼ်​လီ​ဢူၵ်း​လီ​ဢၢႆ​ၼၼ်ႉ ၵိၼ်​ဢုၵ်ႉ​ၸႃႇ​ၸေး​ၸိမ်ႇ​မွၼ်ႇ​ႁဝ်း ဢၼ်​ဝႃႈ ၽုင်​သူဝ်း​ၽုင်​ဝူဝ်း၊ လုၵ်ႈ​ၸၢႆး​လုၵ်ႈ​ယိင်း တင်း​လၢႆ ၸႃႉ​ၸဵမ်​မိူဝ်ႈ​ဢသၢၵ်ႈ​ႁဝ်း ယင်း​လဵၵ်ႉ​ယင်း​ဢွၼ်ႇ​ၼၼ်ႉ​လႄႈ သဵင်ႈ​မူတ်း​ယဝ်ႉ။-

²⁵ ႁႂ်ႈ​ႁဝ်း​လႆႈ​ဢွၼ်​ၵၼ် ဢူၵ်း​ဢၢႆ​ယူႇ​သေ​လႄႈ ၼွၼ်း​တႃႉ။ ႁႂ်ႈ​တၢင်း​ဢၼ်​သရေႇ​ႁဝ်း​လူႉ​ၼၼ်ႉ ႁူမ်ႇ​သုမ်ႇ​ႁဝ်း​ယူႇ​တႃႉ။ လွင်ႈ​မၼ်း​ၸမ်ႉ ႁဝ်း​ဢိၵ်ႇ​တင်း​ပူႇ​မွၼ်ႇ​ႁဝ်း ဢွၼ်​ၵၼ်​ၽိတ်း​ပိူင်ႈ ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ​ႁဝ်း ၸႃႉ​ၸဵမ်​မိူဝ်ႈ​ဢၼ်​ဢသၢၵ်ႈ​ယင်း​လဵၵ်ႉ​ယင်း​ဢွၼ်ႇ​ၼၼ်ႉ တေႃႇ​ထိုင်​ႁွတ်ႈ​မိူဝ်ႈ​လဵဝ်​ၼႆႉ​လႄႈ ဢမ်ႇ​ထွမ်ႇ​ဢမ်ႇ​ဢဝ်​ၵႂၢမ်း ထႃႇဝရႃႉ​ၽြႃး ၽြႃး​ပဵၼ်​ၸဝ်ႈ​ႁဝ်း၊ ဝႃႈ​ၼင်ႇ​ၼႆ​ဢေႃႈ။