۱تسالونئکلیلره 2 - کتاب مقدس به زبان آذربایجانی جنوبی - گویشیپولوسون خئدمتی 1 اونا گؤره قارداشلار، سئز اؤزوز ده بئلئرسئز کی، بئزئم سئزئن یانیزا گلمهیئمئز بوش دیئلدی. 2 آمّا بئلدئیئز کئمی، قاباقجا فئلئپئده عذاب چکئب تحقئر اولدوغوموز حالدا، تاریمیزدا جورعتئمئز وار ائدی کی، او آغیر ضئدّئیّته باخماییب، تارینین خوش خبرئنی سئزه دئیک. 3 چونکی بئزئم تشوئقئمئز نه سهودن، نه ناپاکلیقدان، نه ده حئیلهدندئر. 4 آمّا نجه کی، تاری طرفئندن ائنجئلئن بئزه امانت ورئلمهسی اوچون تصدئق اولونموشوق، اله ده دانیشیریق کی، ائنسانلاری یوخ، بلکی اورَکلرئمئزی ائمتاحان الهین تارینی راضی الهیک. 5 چونکی بئلدئیئز کئمی، هچ بئر زامان یانیزا دئلبازلیق ائنان، یا دا طاماحکارلیغی گئزلهدن نئقاب ائنان گلمهدئک، تاری شاهئددئر. 6 ائنسانلاردان دا جلال آختارمادیق، نه سئزدن، نه اؤزگهلردن. گرچی مسئحئن حوارئلری مقامیندا سئزئن بوینوزدا حاقّیمیز وار ائدی. 7 آمّا آرازدا اوشاقلارینی اَمئزدئرئب عزئزلهین بئر آنا کئمی، سئز ائنن مولایئم رفتار الهدئک. 8 بئزئم علاقه مئز سئزه او قدر چوخ ائدی کی حاضیر ائدئک شادلیق ائنان نه فقط تارینین خوش خبرئنی، بلکی اؤز جانلاریمیزی دا سئزئن یولوزدا ورک، چونکی بئزه چوخ عزئز اولدوز. 9 بئزئم چکدئیئمئز زحمت و چتئنلئک یادیزدادیر کی، هچ بئرئزه یوک اولماماق اوچون نجه گجه گوندوز ائشلهدئک و تارینین خوش خبرئنی سئزه اعلان الهدئک. 10 هم سئز هم ده تاری شاهئددئر کی، نجه سئز ائمانلیلار آراسیندا موقدّس، صالح و تقصئرسئز ائدئک. 11 نجه کی بئلئرسئز، آتا، اؤولادی ائنن رفتار الهین بئری کئمی سئزئن هر بئرئز ائنن رفتار الهدئک. 12 سئزی تشوئق الهیئب، اورکلندئرئردئک کی، سئزی اؤز پادشاهلیق و عئزّتئنه دعوت الهین تارییا، لایئق شکئلده رفتار الئیهسئز. 13 بونا گؤره ده بئز دائم تارییا شوکور الهیئرئک کی، سئز تارینین بئزدن اشئتدئیئز کلامینی قبول الهینده، اونی ائنسانلارین سؤزی کئمی یوخ، بلکی تارینین کلامی کئمی قبول الهدئز، نجه کی دوغروداندا اله دئر؛ او کلام ائندی ائمان گتئرن سئزلرده ائشئنی یرئنه یتئرئر. 14 چونکی قاراداشلار، سئز تارینین یهودئیهده مسئح عئسایا عایید اولان کئلئسالاریندان نومونه گؤتوردوز. اونا گؤره کی، سئز ده اؤز هموطنلرئزدن همن عذابلاری چکدئز کی، اولار یهودئلردن چکدئلر. 15 اولاردان کی، رب عئسانی و پیغمبرلری اؤلدوردولر، بئزی ده قوودولار. اولار تارینی ناراضی الهیئب بوتون ائنسانلارا دوشمن دورورلار. 16 بئزه مانع اولورلار کی، قیرییهودئلر ائنن دانیشمایاق، اله کی اولار نئجات تاپسینلار. بله ده دائم گوناه اوستونه گوناه قویورلار. آمّا قضب آخیردا اولارین اوستونه تؤکولوب. پولوس ائماندارلاری گؤرمک اوچون آرزی چکئر 17 آمّا ای قارداشلار، بئز کی، قیسا بئر مودّت اوچون-روحن یوخ، جئسمن-سئزدن اوزاق قالمیشدیق، بؤیوک آرزی ائنن اللشئردئک سئزئن اوزوزی گؤرک. 18 چونکی بئز نچه دفه-ائستهدئک کی، یانیزا گلک- یعنی من پولوس نچه دفه اللشدئم-آمّا شیطان مانع اولدی. 19 چونکی ربّئمئز عئسا مسئح گلنده، اونون حوضوروندا بئزئم اومئدئمئز، شادلیغیمیز و تاجیمیزین جلالی کئمدئر؟ مگر سئز دیئلسئز؟ 20 چونکی سئز بئزئم شؤوکت و شادلیغیمیزسیز. |
@ 2024 Korpu Company