Ester 2 - WEN GBAŊKA

¹ Wieŋa de ŋaaŋnyiŋ ase Naab Ayasuerus suinni ale jam yɔk la, wa yaa teeri Vasti wie ale dii ate wa nye la, ale wa dii ale jam nye a ta va wa ale nye diila.

² Naawa tomteerɔma baai ale a tom a te wa la, weeni ayen naawa basi ate ba gisi nipok paalisa baai ale kan seba nidoa la a ta jam te naawa.

³ Abe ni basi ate naawa a lueri nuruba tɛŋ fi sii meena ale bo wa tɛŋka po la ate ba yaa tigsi paalik sii meena ale kan seba nidoa la a ta jam jigi yeŋ Susa tɛŋka jigi pagrika, nipooma yenni po. Ni basi ate ba bo Yegai naawa yɔmawa waai ale a nya nipooma zuk la jigi abe ni tebi ba nalim tebika.

⁴ Abe ni basi ate nipok bi dii ate naawa mariŋ la a chim naawa pok, daa Vasti ŋmana. Ate naawa yaa mariŋ wanni de, a yaa nye di.

⁵ Yɔgyɔgla de Susa naab yenni po, Juuma wanyi ale jam boro wa yuei jam ale Mordekai wa jam ka Jair nidoabili, Jair kowa mɛ ale Simei, Simei kowa ale Kis a nyini Benjamin buuni po.

⁶ Wa jam ka baai ate ba jam nak yik a ta nyini Jerusalem tɛŋka ate ka bo Juda po la wanyi, ale ka naawa ate ba a wi ayen Jekonaya la. Ka Babilon naawa Nebukadnezzar ale jam yik ba a ta cheŋ.

⁷ Ate Mordekai yaa jam a nya Yadassa zuk, Ester ale la, wa jam ka wa kowa suok lie. Dii nyiŋla wa jam ka koa yaa si ma. Nipowa yaa jam magsi ale nala, wa kowa ale wa mawa a jam kpi kama ate Mordekai yaa pai wa ase wadek lie la.

⁸ Ase ku yaa ale jam paari diipo ate nipok paalisa yega a tigsi wa wanni nyiŋla, ba yaa tigsi lieba nna yegayega a basi jigi yeŋ Susa naab yenni po ate Yegai a nya ba zuk, Ester mɛ jam maa bo naawa yenni po kama Yegai jigi.

⁹ Ester a yaa yɔk wa sui, ate wa yaa nye nwuli a te wa ŋan baai ale ba nye ate wa nala la, ale ŋandiin yonta, ale pai wa a basi jigi maŋ naab yenni po. A lueri nipooba bayopɔi a ta nyini naawa yenni po ayen ba ga tom a te wa.

¹⁰ Ester an jam basi ate ba seba wa nuruma yaase wa buuni, dii nyiŋla, Mordekai ale weeni wa ayen wa kan basi ate ba seba.

¹¹ Daa meena Mordekai a kasim jam a cheŋ nipooma yenni kama, ayen wa wom Ester wie.

¹² Ase ku yaa ale paari diipo ayen liema meena a cheŋ Naab Ayasuerus jigi la, ku ŋaaŋnyiŋ ku magsi ayen wa pai ka chiisa pi ale siye a gomsi nala a magsi chaab ale nipok ale magsi ayen wa nye diila. Da ŋala po ale ba pai a gomsi badek a nueri, chiisa siyuebi, ba pai sa kpaam, abe chiisa siyuebi ba sa kpa masik, ale wie ŋaai ale ŋa nye ate lie meena a nala la.

¹³ Lie meena ale magsi ayen wa cheŋ naawa jigi diila ale nna, jabuui meena ate wa a yaali la, ba te wa ate wa ta nyini nipooma yenni po a cheŋ naawa yenni.

¹⁴ Junɔi wa yaa cheŋ naawa jigi abe wa ŋman pilim ŋman saluik a cheŋ nipooma yie woŋku ale saari ŋayewa la, naawa tomteerɔwa Saasgaz jigi waai ale a nya nɔŋtaŋa zuk la. Wa kan ŋman cheŋ naawa jigi ya, ka wa sui nin peenti ate wa wi yuei ayen wa jam.

¹⁵ Ku yaa ale jam paari diipo ayen Ester, Mordekai suoku Abiyail liewa ate Mordekai a jam pai ase wa lie la, yaa jam ayen wa jo naawa jigi, wa an jam pai jaaboa alege ka Yegai naawa yɔmawa waai ale a nya nipooma zuk la, ale dak wa, ate baai meena ale nya Ester la yaa mariŋ.

¹⁶ Ba yaa jam ta Ester a ga te Naab Ayasuerus wa yenni po, chiisa piika po, Tebet chiika ale la, wa ale dɛ wa naamu a ta a ga paari bena ŋayopɔi wa po la.

¹⁷ Ate naawa a yaali Ester a gaam nipok mbala meena, wa yaa jam nya niaka ale nyemagsika a gaam mbala meena, ate wa pai naam zutɔkka a vuk wa, a nye wa wa pok. Ku an ŋman magsi ayen ku chim Vasti.

¹⁸ Ate naawa yaa nye tigi kpienni Ester nyiŋ a te nabisaŋa ale wa tomteerɔma meena, wa jam mooli ka vuusum dai a te tɛŋsaŋa meena ale chari tiirita tɛŋka meena a magsi chaab ale naawa pagrimu ale jam ka diila.

¹⁹ Baai ale kan seba nidoaba la a yaa jam tigsi jigi yeŋ, ku naŋtuok nɔi buyewa po Mordekai mɛ a jam kala ka naawa tuoku nɔi.

²⁰ Ester an diem jam weeni ba wa nuruma yaase wa buuni ale ka baai la, ase Mordekai ale weeni wa ayen wa kan weeni la, wa diem kasim jam va ka Mordekai nɔnni ase wa ale jam weeni wa ayen wa nye diila.

²¹ Da ŋala po, ase Mordekai ale jam kala naawa tuoku nɔi la, naawa limisidɔba baye Bigtana ale Teres, baai ale jam a limisi tuoku la sue yaa puuri ate ba a zɔk ayen ba ko Naab Ayasuerus.

²² Ate Mordekai wom ate wa mɛ yaa weeni sak Ester naawa powa, ate Ester mɛ a yaa weeni sak naawa ayen ka Mordekai ale weeni sak wa.

²³ Ase ba ale jam kpesi nya ayen wanni ka wensie la, ba yaa bobi limisidɔma de bayewa a yik tiib nyiŋ ate ba kpi. Ate ba yaa ŋmarisi wie ŋaai ale nye la a nyo ba ŋiak gbaŋsaŋa po naawa nimbie.