Ɓaɛfɛsɔ 2 - Mʉkpanganɨa nɔ Agɔmɛ ɔ Ɨtakɨtakɨ

Asɔɓɨɨ aninjo ɓʉhɛa ɨyɔ nɔ Klisito

¹ Jɛnɛ pɛɨ, inu na꞉ɓio ɓɔ nɔweni woni amati ɔ mʉtɨma akpatanakɨa nɔ mʉkyananakɨa, ɨhɔ nɔ ɓʉɓɨɓɨ ngʉɓeno.

² Inu na꞉ɓio akpataka tɨta gbali ata ɓɨɓɨ ɔ ʉɓɨɨ ngʉwa. Inu akyananakɨa tɨta ʉpanʉ wɔ ngama wɔ ɓakɔkɔ ɓɔta gbaɨ akʉʉ ɔ maba kɔ ɓisi. Ngama ngɨananɨ, ya mʉtɨma wɔta ɓɨɓɨ ngʉwa wakyɛndakiso uɓei wɔ ɓombi ngʉɓa ɓangɔmʉ akumo Asɔɓɨɨ.

³ Isu ɓaɓomu taɓio jɛnɛ pɛɨ kʉ amudinda wɔ ɓombi ngʉɓɔnanɨ. Ta꞉ɓio akpataka mʉsasa wɔ ndʉtʉ. Tɔ꞉ɓio akɨa ɨkyɛmʉ ngɨyɛ ndʉtʉ nɔ mʉtɨma ngʉweso wakʉnda. Mʉkyananakɨa wɔta ɓɨɓɨ ngʉweso akɛ, wa꞉ɓio nesu atitio akɨa ɓanɨ. Kʉdɔ, akpatanakɨa nɔ uɓei ngʉwɔnanɨ, ya꞉ɓio anɨtanɨa kʉ ɓɔ ʉnganga ngʉwɔ Asɔɓɨɨ, wiɓio akʉʉ eso ngbanga kʉndʉ ɓangɛ.

⁴ Yakamɛngana, mʉtɨma wɔ ikoko ngʉwɔ Asɔɓɨɨ wa ʉja nɔgbɛ, nɔ ɓʉkʉnda ɓɔta ɓʉja ngʉɓangɔ akʉʉ eso ɓa ɓɔ:

⁵ isu ta꞉ɓio ɓɔ tɔweni woni amati ɔ mʉtɨma, akpatanakɨa nɔ mʉkyananakɨa wɔta ɓɨɓɨ ngʉweso. Ɨyɔ ɔ꞉tɨjʉkaniso akɔ ingwo ɨhɔ nɔ atɨ Klisito. Yaɓanɨ, inu nɛ́꞉nɨanɨa nɔ ɓʉhɛa ɨngbaa akɔ ɨjɨɔ ngɨa Asɔɓɨɨ.

⁶ Amati ɔ ɓio ɨkyɛmʉ mɛngana nɔ atɨ Yeso Klisito, Asɔɓɨɨ a꞉tɨjʉkaniso akɔ ingwo ati ɔ mɨnda, ɨhɔ naɓɔ dɔ, tɨdya ɓʉngama ɨhɔ tɨa kʉ naɓɔ akʉʉ ɔ ɓisi.

⁷ Ɨngbaa akɔ iɗo iɗo ngɨangɔ a꞉tɨpananiso amati ɔ Yeso Klisito, a꞉ɓio akʉnda apananiso ɨjɨɔ yɛta ɨmbangɛ ngɨangɔ, akɔ angbinga ngɨa a꞊nɨka muɓomu.

⁸ Dɔ nɛ́꞉nɨanɨa nɔ ɓʉhɛa akɔ ɨjɨɔ, ɨngbaa akɔ báya. Ɓʉhɛa ngʉɓɔnanɨ, ɓa꞉ngwanamʉ nɔ inu ɓakwɔɓɔngɔ, ɓa apɛpɛ ngɨa Asɔɓɨɨ e꞉njo.

⁹ Sɔkɔmʉ masɔɔ kɔ tɛa ngɨyeno, kʉɓanɨ, dɔ, mombi atɨɓɛndanamʉ ɨgʉngʉ.

¹⁰ Yasugo ɓɔ Asɔɓɨɨ akɛ a꞉tɨkɨa. Amati ɔ ɓio ɨkyɛmʉ mɛngana nɔ atɨ Yeso Klisito, Asɔɓɨɨ a꞉tɨkɨa dɔ, tɨhuo nɔ uɓei ngʉwɔ kyananaka iɗo. Mʉkyananakɨa ngʉwɔnanɨ, a꞉tambanaka jɛnɛ kʉ pɛɨ, ɓɔ dɔ tɨkyɛndaka ɓanɨ auɓei ngʉweso.

Ta ɨkyɛmʉ mɛngana amati ɔ Klisito

¹¹ Tungueni-sɨ ɓɔ jɛnɛ pɛɨ uɓei ngʉweno wa꞉ɓio tanɨ. Inu, ngʉɓa ná꞉nɔtanɨɔmʉ amati ɔ ɨfananja yɔ Ɓayuda. Ɨɓɔ, Ɓayuda ɓa꞉nɨsɨka ndʉ ɓombi ngʉɓa bangɔkiiso ɨgʉnɨ, yakamɛngana, ɨɓɔ ɓɔ꞉sɨkana ndʉ ɓombi ngʉɓa ɓakiiso ɨgʉnɨ, ta akpatanakɨa nɔ ɨkyɛmʉ ngɨyɛ ɓombi ɓa꞉kɨa anɔ ndʉtʉ ngɨyeɓo.

¹² Angbinga ngɨananɨ, ná꞉ɓio ɗu nɔ Klisito. Nɔ́꞉ɓio kʉ ɓɛka. Inu, ná꞉ɓiomʉ-sɨ ɓombi ɓɔ Asɔɓɨɨ, ná꞉ɓio kʉ ɓɛka akɔ agɔmɛ ngɨa Asɔɓɨɨ a꞉panaka jɛnɛ, ʉɓa, ɓangɔmʉ nɔ itungwio, ga pɔ nɔ Asɔɓɨɨ ngaweɓo asɨ ɨpá ngɨyɛ.

¹³ Yakamɛngana ɨtakɨtakɨ ngɨyɛ, amati ɔɓio ɨkyɛmʉ mɛngana nɔ atɨ Yeso Klisito, inu ngʉɓa ná꞉ɓio jɛnɛ ɗu nayɔ, nɛ́꞉ka pɔngɔ tɨa tinene ɨngbaa akɔ menike ngʉkangɔ a꞉njʉakiso.

¹⁴ Dɔ ɨyɔ Klisito akɛ, a꞉tinjo majɨɔ, anujonokiso mombi ngɨa angɔmʉ Muyuda nɔ ɨya a Muyuda aɓio ɨkyɛmʉ mɛngana. Ɨyɔ, ɨngbaa akɔ ingwo ngɨangɔ akʉʉ ɔ mʉsalaba, a꞉panja aga ɔ nagbonyonoko ngɨa a꞉ɓio ati eɓo.

¹⁵ Ɓata kʉ ɨyɔ Klisito akɛ, a꞉nguso angu ɔ ʉpanʉ ngʉwɔ Ɓayuda, ɨhɔ nɔ lɨngbaa lɔngɔ di di di ngɨlɛ ɓa꞉lɨmaiso. Kʉɓanɨ, ɛ꞉ka aninjo majɨɔ ati ɔ Ɓayuda, nɔ ɓombi ngʉɓa ɓangɔmʉ Ɓayuda, dɔ mababa kapɨnɨ ngʉkɔnanɨ, kʉjonokio aɓio ɨkyɛmʉ mɛngana amati ɔ Klisito.

¹⁶ Ɨngbaa akɔ ingwo ngɨangɔ akʉʉ ɔ mʉsalaba, Yeso a꞉wa ɓʉyaa. Nɔ, ɔ꞉jonokiso mababa kɔ ɓombi kapɨnɨ akɔnɨka tɨa ndʉtʉ mɛngana nɔ ɔ꞉ɓʉkʉndaniso nɔ Asɔɓɨɨ.

¹⁷ Klisito ɛ꞉ka aɓɨakɨa Ɨsaʉ yɛta Iɗo, ngɨyɔ majɨɔ akɔ inu ɓaɓomu. Yiɓio inu ngʉɓa ná꞉ɓio ɗu nɔ Asɔɓɨɨ, kʉndʉ akɔ inu ngʉɓa ná꞉ɓio tinene nayɔ.

¹⁸ Kʉɓanɨ, ya ingainga ɨngbaa akɔ Klisito, ɨyɛ isu ɓaɓomu, Ɓayuda kʉndʉ ʉɓa ɓangɔmʉ Ɓayuda, takwanana-ɔɔ anɨsa apɛɨ ɔ Asɔɓɨɨ, ta akɔ isingo yɔ Mʉtɨma wɔta Tu mʉngana ngʉwɔnanɨ.

¹⁹ Tɨa kwananɨ, inu ɓombi ngʉɓa nángɔmʉ Ɓayuda, nángɔmʉ ɓata ɓɛka ga pɔ ɓabikpani, yakamɛngana, nátɨa ɓana ɓɔ ɨkʉmbʉ ɨhɔ nɔ ɓombi ɓɔta tu, nátɨa amati ɔ ɨfananja ngɨyɔ Asɔɓɨɨ.

²⁰ Nɔ́kumonio tɨa amati ɔ ɨkáá ngɨyɛ ɓatitima nɔ magbɛ kɔ Asɔɓɨɨ ka꞉mayakɨa pɔngɔ muɓumba wɔngɔ, nɔ Yeso makwɔngɔ akɛ a ikopi yɔ indu yɔngɔ.

²¹ Ikopi yɔ indu ngɨyɛnɛnɨ, ɨyɛ ɨkáá iɓomu ya-ɔɔ imaise. Nɔ, yɛsɨnganakiso tɛa yɔngɔ, dɔ, yiɓio ɨkáá yɛta tu yɔ Makwɔɓɨɨ.

²² Amati Klisito, inu, ná tɨa kʉndʉ lɨkyɛmʉ lɔ tɛa akɔtuɓoko ɨkáá. Inu, ɨhɔ tɨa kʉ nɔ ɓombi ngaɓɔmɔ, ná ngbanga tɨa ndʉ ɨkʉmbʉ ngɨyɛ aki Asɔɓɨɨ, a-ɛɛ ɨhɔ nɔ Mʉtɨma ngʉwangɔ.