Ɓaɛfɛsɔ 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo ɓaklisito ɓɔ Ɛfɛsɔ

¹ Ɨmɨ Pɔlɔ ngɨa Asɔɓɨɨ a꞉nachwa ɓɔ niɓio titima wɔ Yeso Klisito, akpatanakɨa nɔ ɓʉkʉnda ɓangɔ, akɔ ɓombi ɓɔta tu, nɔ ʉɓa, ɓa꞉baya Yeso Klisito inani aɨkʉmbʉ yɔ Ɛfɛsɔ.

² Atɨ Asɔɓɨɨ Aba, nɔ Makweso Yeso Klisito, ɓinutiyo ɨjɨɔ nɔ majɨɔ-ɛ.

Ʉɓʉnga wɔta ʉja akɔ Klisito

³ Asɔɓɨɨ ɨsɨka ʉbɨba, ɨyɔ Aba ngɨa wɔ Makweso Yeso Klisito. A꞉tɨkiokio amati Klisito nɔ ɔtinjo apɛpɛ ɔ Mʉtɨma wɔta Tu anɨngwa akʉʉ ɔ ɓisi.

⁴ Asɔɓɨɨ a꞉tɨchwa jɛnɛ ɓɔ tiɓio ɓombi ɓangɔ ta pɛɨ wɔ mʉpʉnganɨa wɔ dɔdɔ, dɔ, tiɓio tu nɔ sɔkɔmʉ nɔ ɨɗa amesu ngʉkangɔ,

⁵ nɔ a꞉tɨchwa jɛnɛ ta pɛɨ, ɓɔ tiɓio ndʉ ɓana ɓangɔ ɨngbaa akɔ Yeso Klisito, akpatanakɨa nɔ iɗo iɗo yɔ ɓʉkʉnda ngʉɓangɔ.

⁶ Kʉɓanɨ, tɨbibiseni Asɔɓɨɨ anɨna ɓʉjanana ɓɔ iɗo iɗo ngɨangɔ, ɨyɛ a꞉tinjo akɔ ɨjɨɔ ɨngbaa akɔ Mwana ngɨangɔ ɔ ɓʉkʉnda nɔgbɛ.

⁷ Isu, ta꞉ɓoonokio amati ɔ ɓʉɓiɓi, nɔ, tɛ꞉nɨanɨa nɔ nɨpaakɨa ɨngbaa akɔ menike ngʉkɔ Klisito. Kʉdɔ, Asɔɓɨɨ a꞉pananiso bʉjanana bɔ ɨjɨɔ ngɨangɔ,

⁸ ɨyɛ, a꞉tinjo ɨja nɔgbɛ, nɔ, ɔ꞉tɨmatɨa tɨa kʉ nɔ mʉtɨma wɔ pemiso yaka nɔ nɨmbɨmbɨanaka iɓomu.

⁹ Ɨyɔ akɛ, a꞉tɨmbiiso yaka yɛta ɨmbangɛ yɔ ɓʉkʉnda ngʉɓangɔ. Ɨyɛnɛnɨ, yasugo ɓɔ akpatanakɨa nɔ iɗo iɗo ngɨyɛ a꞉tambanaka jɛnɛ kʉ pɛɨ amati angɔ, ɨngbaa akɔ Klisito.

¹⁰ Asɔɓɨɨ a꞉baya jɛnɛ ga a꞉kɨa yaka ngɨyɛnɛnɨ, ta akɔ angbinga ngɨa ɨyɔ makwɔngɔ a꞉kʉda-ɔɔ: yasugo ɓɔ iɓomu ngɨyɛ akʉʉ ɔ ɓisi, nɔ ɨyɛ, ya iyani akɔ dɔdɔ, aɨmɔma tɨta ɛsɨ ɔ ɓʉngama mʉngana ngʉɓɔ Klisito.

¹¹ Nɔ ɓata amati angɔ, ta꞉dya mʉgyɛndɔ wɔ maɓɨɨ ngaweso, akpatanakɨa nɔ medi kɔ mombi ngɨa akɨa yaka iɓomu ta nɔ ɓʉkʉnda ɓangɔ.

¹² Kʉɓanɨ, isu ɓombi ɓɔ pɛɨ ngʉɓa, ta꞉napɨana mʉtɨma akɔ Klisito, tɨmʉtʉkʉeni Asɔɓɨɨ akʉʉ ɔ ʉbɨba ngʉwangɔ.

¹³ Nɔ ɓata, ndʉ inu, nɔ꞉ka Ɨsaʉ ngɨyɛ ingono, Ɨsaʉ yɛta Iɗo ngɨyɛ ya꞉nɨkɨa nɔ ɓʉhɛa, kʉdɔ, ná꞉baya Klisito. Nɔ, Asɔɓɨɨ ɔ꞉napɨa isisenio ngɨangɔ amati eno. Kʉdɔ, ɔ꞉ninjo Mʉtɨma wɔta Tu ngʉwa a꞉nɨpanaka jɛnɛ.

¹⁴ Mʉtɨma wɔta Tu ngʉwɔnanɨ, wa ndʉ mupita wɔ mʉgyɛndɔ wɔ maɓɨɨ ngʉwa Asɔɓɨɨ a꞉ɓosio jɛnɛ ɓombi ɓangɔ. Isu, tɛ꞊nɨanɨa sina nɔ ɨjangɨa ngɨyɛnɛnɨ iɓomu, tɨa nɔ ɓisi ngʉɓa ta꞊chwɛa sina-ɔɔ aɓubaya. Tɨtʉkʉeni gɔ ɓʉjanana ngʉɓa Asɔɓɨɨ tʉkʉanɨ-ɛ!

Pɔlɔ anɨta Asɔɓɨɨ

¹⁵ Yasugonio ɓɔ, ɨmɨ nɔ꞉ka pɛ ɨsaʉ yɔ báya ngɨyeno akɔ Makweso Yeso, nɔ ɓʉkʉnda ngʉɓa nánaɓɔ akʉʉ ɔ ɓombi ngʉɓa ɓa꞉baya, ʉkanɨ.

¹⁶ Ɨmɨ, nangɔsɨamʉ atosio Asɔɓɨɨ ʉbɨba akʉʉ eno. Amati ɔ nɨta ngɨyɛsɛmɨ, nakyɔchwa ino yeno chwani.

¹⁷ Nanɨta Asɔɓɨɨ ngɨa wɔ Makweso Yeso Klisito, Aba ngɨa wɔ ʉbɨba, ɓɔ ininjo Mʉtɨma ngʉwɔ nɨmbɨmbɨanaka. Ʉwa wanɨpananiso Asɔɓɨɨ, nɔ wɔnimbiiso ɨyɔ nɔ ingono.

¹⁸ Ɨniɓoo ɓaka mesu, akɔ ʉwanga ngʉwangɔ, dɔ pemiseni ɓɔ a꞉nisoko akɔ itungwio nga yeno tanɨ. Ɨjangɨa yɛta iɗo nɔgbɛ nga yeno tanɨ ɨyɛ, a꞉ɓosio ta ɓombi ɓɔta tu ngʉɓangɔ.

¹⁹ Nɔ ɓata, angu ata mʉja nga eno tanɨ akɛ ɨyɔ anayɔ akʉʉ eso ɓombi ngʉɓa ta꞉baya. Angu ata mʉja nɔgbɛ ngɨananɨ,

²⁰ ɨyɔ ingainga, a꞉mʉpananiso angbinga ngɨa a꞉jʉkaniso-ɔɔ Klisito ati ɔ mɨnda, nɔ, ɔmuwoliso aɨkɔndɔ yɔ gue ɔngɔ ngɨangɔ, aɨkʉmbʉ ngɨyɛ akʉʉ ɔ ɓisi.

²¹ Inani, Asɔɓɨɨ a꞉mʉnapɨa ɨyɔ Klisito akʉʉ ɔ ɓangama ɓaɓomu, akʉʉ ɔ ɓombi ɓɔta ɓangbɔngbɔ ɓaɓomu, akʉʉ ɔ ɓombi ɓɔ angu ɓaɓomu, nɔ ɓombi ɓɔta ɓumu ɓumu ɓaɓomu, nɔ kʉ nɔ akʉʉ ɔ mano maɓomu ngʉka kasokonio sɔkɔmʉ ta ɓʉɓʉnʉ ngɨa, yakamɛngana kʉ nɔ akɔ uɓei ngʉwa wa꞊nɨka.

²² Asɔɓɨɨ a꞉napɨa yaka iɓomu ɛsɨ wɔ mɨtɨndɨ ngɨyɔ Klisito, akʉʉ ɔ yaka ngɨyɛnɛnɨ iɓomu, ɔ꞉mʉnapɨa ɓɔ iɓio ndʉ mʉtʉ akyɛndakiso Kanisa.

²³ Kanisa a ingainga ndʉtʉ ngɨyɔ Klisito. Ɨyɔ, a muɓomu muwole amati ɔngɔ angbinga muɓomu, ɨyɔ ngɨa a꞉sɨamʉ ɨda.