Тоололго 4 - Библи

Кэһаадай удамай ажалнууд

¹ Эзэн Моисей Аһароон хоёрто иигэжэ айладаба:

² – Левиин обогой Кэһаадһаа гараһан эрэшүүлые ураг урагаарнь, гэр бүлэнүүдээрнь бүридхэ.

³ Гушанһаа таби хүрэтэр наһатай бүхы эрэшүүлыень бүридхэн тооло. Тэдэ эрэшүүл майхан һүмын үргэл болон мүргэлэй ёһололгын алба хэг.

⁴ Тэдэнэр майхан һүмэ соохи нангин зүйлнүүдэй түлөө харюусалгатай.

⁵ Отог омогойнгоо хотон хүреэнүүдэй аян замда мордохо болоходонь, Аһароон ба тэрэнэй хүбүүд майхан һүмэ соо орожо, халхабша хүшэгыень абаад, тэрээгээрээ хэлсээнэй ханзаяа хушаг.

⁶ Тиигээд булгайр арһаар ханзаяа хушаад, үргэлжэдөө сэнхир хүхэ үнгэтэй нэмэргээр нэмэрээд, һургааг-харбиинхануудые табиг.

⁷ Хилээмэн үргэл табидаг шэрээе сэнхир хүхэ нооһон нэмнээгээр нэмнээд, тэрээн дээрээ үргэл болон мүргэлэй ёһололдо хэрэглэгдэдэг томо жэжэ табагуудые, аягануудые табиг. Тиихэдээ тэдэнэй хажуудань хододоо байдаг хилээмэн үргэл байха ёһотой.

⁸ Тиигээд тэрээн дээрээ улаан хушалта хушуулаад, дээгүүрнь хүхэ булгайр арһаар нэмэргэ нэмэрүүлээд, һургааг-харбиинхануудые табиг.

⁹ Сэнхир хүхэ нэмэргээр һалаатай зула дэнгэй голто һууриие, тэрээндэ хэрэглэгдэдэг зулануудые, тэрэнэй хабшагуудые, согой амһартануудые, оливын тоһо хэдэг бүхы амһартануудые хушаг.

¹⁰ Тэрэнэй бүхы хэрэгсэлнүүдые хүхэ булгайр арһаар хушаад, тэдэнээ тээлгүүр дээрэ табиг.

¹¹ Сэнхир хүхэ нэмэргээр үргэлэй алтан шэрээ хушаад, тэрэниие хүхэ булгайр арһаар нэмэрээд, һургааг-харбиинхануудые табиг.

¹² Майхан һүмэ соохи үргэлдэ хэрэглэгдэдэг бүхы юумэнүүдыень абаад, сэнхир хүхэ нэмэргээр хушажа, хүхэ булгайр арһаар нэмэргээд, тээлгүүрнүүд дээрэ табиг.

¹³ Үргэл шэрээе үнэһэн болон хөөһөөнь сэбэрлээд, тэрэниие уб улаан нэмэргээр хушаг.

¹⁴ Тиигээд тэрээн дээрэ үргэлэй ёһололдо хэрэглэгдэдэг бүхы амһартануудые: согой амһартануудые, мяханай һэрээ, хүрзэхэнүүдые, шуһа сүршэдэг аягануудые, үргэлэй шэрээдэ хэрэглэгдэдэг бүхы амһартануудые булгайр арһаар хушажа табяад, һургааг-харбиинхануудые табиг.

¹⁵ Отог хүреэнэйнгээ аян замда түхеэржэ бэлэн болотор, Аһароон ба тэрэнэй хүбүүд майхан һүмэеэ, тэрэнэйнгээ бүхы хэрэгсэлнүүдые орёожо бэлдэг. Багсалжа бэлэн болоходонь, тэдэнииень абажа ябахаяа, Кэһаадай гэр бүлынхид тэдээндэ дүтэлэг. Зүгөөр тэдэнэр үхэхэгүй гээ һаа, майхан һүмын нангин юумэнүүдтэ гар бү хүрэг.

¹⁶ Зулын тоһон, уталгын дабирхай, хэзээдэшье ходол байдаг хилээмэн үргэл, түрхидэг оливын тоһон, майхан һүмэ, тэрээн соохи нангин юумэнүүд болон тэрэнэй бүхы хэрэгсэлнүүд санаарта Аһарооной хүбүүн Эльазаарта даалгагдан үгтэнэ.

¹⁷ Эзэн Моисей Аһароон хоёрто иигэжэ айладаба:

¹⁸ – Левидүүдэй дундаһаа Кэһаадай обогой уг гарбалнуудыень бү хосороогты. Нангинай Нангин таһалгада дүтэлхэдэнь,

¹⁹ тэдэнэй үхэхэгүйн тула иимэ юумэ хэгты: Аһароон ба тэрэнэй хүбүүд майхан һүмэдэ орожо, Кэһаадай үенүүдэйнь эрэшүүл бүхэндэ хэхэ ажалыень, үргэлэн абажа ябаха юумэнүүдыень хэлэжэ заажа үгүүжэг.

²⁰ Харин өөһэдөө тэдэнэр үхэхэ гээгүй һаа, майхан һүмэеэ хуряажа ба хушажа байхадаа, Нангинай Нангин таһалгада орохо ёһогүй.

Гэршооной уг удамай ажалнууд

²¹ Тиигээд Эзэн Моисейдэ иигэжэ айладаба:

²² – Гэршооной үри һадаһадай бүхы обогуудые, бүхы гэр бүлэнүүдэйнь эрэшүүлые бүридхэн тооло.

²³ Сэрэгэй албанда ябажа шадаха тэдэнэй гушан наһанһаа табин наһан хүрэтэрхи эрэшүүл майхан һүмые зөөлгэхэ ажал хэг.

²⁴ Гэршооной үри һадаһадай гэр бүлэнүүд майхан һүмэдэ алба хэхэдээ, тэрэнэй хүндэ ашааень абажа ябаха ажалынь иимэ:

²⁵ Тэдэнэр Уулзалгын майханай бүдые, хушалтануудые, тэрэнэй дээгүүр хушадаг булгайр арһан бэрээһэнүүдые, майхан һүмэ руу ородог халхабша хүшэгые,

²⁶ хорёо хотын халхабша ханануудые, майхан һүмые болон шатаалгата үргэлэй шэрээе тойроод байдаг хорёо хотын халхабша үүдэнүүдые, тэдэнэй бүхы ооһорнуудые болон бүхы хэрэгсэлнүүдые үргэлөөд, аян замда абажа ябаха ёһотой. Эдэ бүхы ажалнууд Гэршооной обогой бүхы эрэшүүлдэ даалгагдана.

²⁷ Аһарооной ба тэрэнэй хүбүүдэй захиралта болон ударидалган доро Гэршооной үенүүдэйхид хүндэ хүшэр ашаануудые үргэлөөд, аян замда абажа ябахадаа, тэдэнэр зүйл бүриин ажал хэхэһээ гадна, абажа ябаһан юумэнэйнгээ түлөө харюусалгатай байха ёһотой.

²⁸ Энэ хадаа Гэршооной үри һадаһадай майхан һүмэдэ алба хэхэ ажалынь гээшэ. Эдэ ажалнууд санаарта Аһарооной хүбүүн Итамаарай харууһан доро хэгдэхэ ёһотой.

Мэрариин уг удамай ажалнууд

²⁹ Мэрариин урагые угаарнь, гэр бүлөөрнь бүридхэн тооло.

³⁰ Майхан һүмын дэргэдэхи ажалда эльгээхын тула сэрэгэй албанда ябажа шадаха 30-50 наһа хүрэтэрхи бүхы эрэшүүлыень бүридхэн тооло.

³¹ Тэдэнэр Уулзалгын майхан һүмын албанда алба хэхэдээ, иимэ ажал бүтээг: зөөдэлэй үедэ тэдэнэр майхан һүмын хүндэлэбшэ модонуудые, тэрэнэй хүреэнүүдые, баханануудые, һууриин мододые үргэлөөд ябаха ёһотой.

³² Хорёо хотын бүхы бахананууд болон һаднагуудые, тэрэнэй һууриин хүндэлэбшын модонуудые, ооһорнуудые, тэрээндэ хабаатай бүхы юумэнүүдые, тэрэнэй бүхы хэрэгсэлнүүдые, тэдэнэй үргөөд абажа ябаха бүхы юумэнүүдые тэдээндэ нэрэ нэрээрнь тооложо үгэ.

³³ Энэ хадаа санаарта Аһарооной хүбүүн Итамаарай харууһан доро, майхан һүмын дэргэдэ тэдэнэй алба хэхэ, Мэрариин үри һадаһадай хэхэ ажал гээшэ.

Левидүүдэй уг удамууд

³⁴ Моисей, Аһароон болон арадай удамаршад Кэһаадай уг удамые гэр бүлөөрнь, урагаарнь бүридхэн тоолобо.

³⁵ Алба хэжэ, Уулзалгын майхан һүмын дэргэдэ ажал хэжэ шадаха гушан наһанһаа табин наһан хүрэтэрхи эрэшүүлэй тоое тэдэ тоолон гаргаба.

^36-48 Урагууд Эрэшүүлэй тоо Кэһаат 2 750 Гэршоон 2 630 Мэрарии 3 200 Хамта: 8 580

Урагууд Эрэшүүлэй тоо

⁴⁹ Эзэнэй Моисейгээр дамжуулан айладаһан захиралтаар тэдэнэй тоо тоолон гаргагдаба. Эзэнэй захиралта дүүргэгдэжэ, тэдэнэй үргөөд ябаха юумэн, ажал хүдэлмэри тодорхойлон үгтэбэ.