Тоололго 3 - Библи

Аһарооной гэр бүлэ ба санаартад

¹ Синай уула дээрэ Эзэнэй Моисейдэ айладаха үе сагта Аһароон болон Моисейн уг удамынь иимэ байгаа.

² Аһарооной хүбүүдэй нэрэнүүд: түрүүшын хүбүүн Надааб, тиигээд Абиһуу, Эльазаар ба Итамаар.

³ Нэрэ нэрээрээ нэрлүүлһэн эдэ Аһарооной хүбүүд оливын тоһо толгойдоо түрхюулжэ, санаартад болоод, майхан һүмэдэ хурал мүргэлэй алба хэдэг байгаа.

⁴ Гэбэшье Надааб Абиһуу хоёр майхан һүмэдэ алба хэжэ байхадаа, Эзэнэй хориһон гал абаад, Синайн сүл губида наһа бараһан юм. Тэдэ хоёр үри хүүгэдгүй байгаа. Түрэһэн эсэгэ Аһароонойнгоо үшөө амиды мэндэ ябахада, Эльазаар Итамаар хоёр санаартад болоо юм.

Левидүүд – санаартадай туһамаршад

⁵ Эзэн Моисейдэ иигэжэ айладаба:

⁶ – Левиин бүхы обогойхидые санаарта Аһароондо асаржа, тэрэнэй туһамаршад болго.

⁷ Аһарооной болон арад зоной урда тэдэ иимэ уялгатай – үргэл мүргэлэй үедэ майхан һүмын дэргэдэхи ажал хэхэ,

⁸ майхан һүмын хэрэгсэлнүүдые хадагалха, үргэл мүргэлэй үедэ израильшуудай гурим журамтай байхыень сахиха.

⁹ Левидүүдые Аһароондо, тэрэнэй хүбүүдэй мэдэлдэ үгэ. Левидүүд израильшуудһаа шэлэгдэжэ, Аһароон болон тэрэнэй хүбүүдтэ майхан һүмын албанда үгтэхэ ёһотой.

¹⁰ Аһароон болон тэрэнэй хүбүүдтэ санаартанай уялга даалга. Ондоо хэн нэгэн энээниие хэхэеэ һэдэбэл, алуулагдаха.

¹¹ Эзэн Моисейдэ иигэжэ үгүүлбэ:

¹² – Израилиин зоной дундаһаа Би левидүүдые абанаб. Эхын умайн түрүүшын жэмэсэй – Израилиин ууган хүбүүдэй орондо Би тэдэниие Өөртөө абанаб. Левидүүд Минии болохо.

¹³ Ушар юуб гэхэдэ, алишье ууган хүбүүн ба малай түрүүшын бүхы түл – Минии. Египедэй ууган хүбүүдые болон малай түрүүшын түл үгы хэхэдээ, Би Израиль соо бүхы ууган хүбүүдые ба малай түрүүшын түлые илгааб Өөртөө. Тэдэ Минии юм. Би Эзэн мүн!

Левидүүдэй тоо бүридэлгэ

¹⁴ Эзэн Синайн сүл губида израильшуудтай хамта ябаһан Моисейдэ иигэжэ айладаба:

¹⁵ – Левиин обогой бүхы уг болон гэр бүлэнүүдые бүридхэн тооло. Бүхы эрэшүүлыень, мүн нэгэ һаратайһаа дээшэ наһатай болоһон хүбүүн үхибүүдыень бүридхэн тооло.

¹⁶ Моисей Аһароон хоёр Эзэнэй захиралта дүүргэжэ, тэдэниие бүридхэн тоолобо.

¹⁷ Левий иимэ нэрэтэй хүбүүдтэй байгаа: Гэршоон, Кэһаат ба Мэрарии. Тэдээнһээ угууд үдэһэн бэлэй.

¹⁸ Гэршооной хүбүүдэй нэрэнүүд уг угсаатайгаа хамта гэбэл, Либнии, Шимэй.

¹⁹ Кэһаадай хүбүүд уг угсаатайгаа хамта – Амраам, Ицһаар, Хэброон болон Үззиһээл.

²⁰ Мэрариин хүбүүд уг угсаатайгаа хамта гэбэл, Маһлии ба Мушии. Левиин уг удамай гэр бүлэнүүд болон угууд гэбэл, иимэ юм.

²¹ Либниигэй болон Шимэйн гэр бүлэнүүд Гэршооной угта ородог.

²² Тэдэнэй бүхы эрэшүүлэй болон нэгэ һаратайһаа дээшэ бүхы хүбүүн үхибүүдэйнь хамтын тоо 7 500 болоно.

²³ Гэршооной обог хотон хүреэнүүдээ баруун зүгтэ – майхан һүмын ара талада бариха ёһотой.

²⁴ Лаһээлэй хүбүүн Элиасаап Гэршооной обогой ударидагша байгаа.

^25-26 Майхан һүмэ, тэрэнэй дээбэри хушалтанууд, тэрэнэй хото хорёогой арһан хананууд, майхан һүмын үүдэнэй хүшэгэ, майхан һүмын бүхы хэрэгсэлнүүд болон ооһорнууд Гэршооной угайхидай харууһаламжада үгтэнэ.

²⁷ Кэһаадһаа Амраамай, Ицһаарай, Хэброоной болон Үззиһээлэй үенүүд таһарна. Эдэнэр бултадаа Кэһаат обогой байгаа.

²⁸ Тэдэнэй бүхы эрэшүүлэйнь, мүн нэгэ һаратайһаа дээшэ бүхы хүбүүн үхибүүдэйнь хамтын тоо 8 600 болоно. Эдэнэр нангин байра аршалан харууһална.

²⁹ Кэһаат обогойхид өөһэдынгөө хотон хүреэнүүдые майхан һүмын урда таладань бариха ёһотой,

³⁰ тиихэдэ Үззиһээлэй хүбүүн Элицапаан Кэһаат обогой үенүүдэйнь ударидагшань байгаа.

³¹ Тэдэнэртэ мүргэлэй болон үргэлэй үедэ хэрэглэгдэдэг ханза, шэрээ, тоһон дэнгүүдэй табюур, үргэлэй шэрээнүүд, мүргэлдэ хэрэгтэй нангин байрын амһартанууд, хүшэгэ даалгагдана. Тэдэнэр хэрэгтэй бүхы ажал ябуулна.

³² Санаарта Аһарооной хүбүүн, левит ударидагшадай эгээл дээдэ ударидагша Эльазаар болоно. Тэрэнэй харууһалган доро майхан һүмэ найдан үгтэнэ.

³³ Маһлиин ба Мушиин гэр бүлэнүүд Мэрариин угһаа гарбалтай.

³⁴ Тэрэнэй бүхы эрэшүүлэйнь, мүн нэгэ һаратайһаа дээшэ наһатай хүбүүн үхибүүдэй хамтын тоо 6 200 болоно.

³⁵ Абиһааилай хүбүүн Цүриһээл Мэрариин үенүүдэй ударидагша байгаа. Тэдэнэр өөһэдынгөө хотон хүреэнүүдые майхан һүмын хойто зүгтэнь бариха ёһотой.

³⁶ Мэрариин хүбүүдэй харууһалалган доро майхан һүмын уняанууд, хүндэлэбшэнүүд, тэрэнэй бахананууд,

³⁷ тэрэнэй һууриин модонууд, тэрэнэй барилгын бүхы хэрэгсэлнүүд, хото хорёогойнь бахананууд, тэрэнэй һаднагууд, тэрэнэй һууриинь тулганууд болон ооһорнууд даалгагдана.

³⁸ Майхан һүмын үүдэн талада, наранай гарадаг зүгтэ Моисей Аһароон хоёрой, тэдэнэй хүбүүдэй хотон хүреэнүүд баригдаха ёһотой. Тэдэнэй харууһалган доро израильшуудай энэ Нангин һүмэ үгтэнэ. Хэрбэеэ эндэ ондоо хүнүүд оробол, тэдэнэр алуулагдаха ёһотой.

³⁹ Эзэнэй захиралтаар Моисей Аһароон хоёр бүхы левидүүдые уг угсаагаарнь: бүхы эрэшүүлыень, тэдэнэй нэгэ һаратайһаа дээшэ наһатай бүхы хүбүүн үхибүүдыень бүридхэн тоолоходонь, 22 000 хүн болоно.

Израилиин ууган хүбүүдэй тоо бүридэлгэ

⁴⁰ Эзэн Моисейдэ иигэжэ айладаба: – Израильшуудай бүхы эрэшүүлые болон нэгэ һаратайһаа дээшэ наһатай бүхы түрүүшын хүбүүн үхибүүдыень нэрэ нэрээрнь бүридхэн тооло.

⁴¹ Би Эзэмби! Израильшуудай бүхы ууган хүбүүн үхибүүдэйнь орондо левидүүдые, израильшуудай үхэр малнуудайнь түрүүшын түлнүүдэйнь орондо левидүүдэй үхэр малнуудайнь бүхы түрүүшын түлнүүдыень Намда үгэ.

⁴² Моисей Эзэнэй захиралтаар израильшуудай бүхы түрүүшын хүбүүн үхибүүдыень бүридхэн тоолобо.

⁴³ Нэгэ һаратайһаа дээшэ наһатай түрүүшын бүхы хүбүүн үхибүүдыень нэрэ нэрээрнь бүридхэн тоолоходонь, 22 273 хүбүүд болобо.

⁴⁴ Эзэн Моисейдэ иигэжэ айладаба:

⁴⁵ – Израильшуудай түрүүшын бүхы хүбүүн үхибүүдэйнь орондо левидүүдые, тэдэнэй үхэр малнуудай түрүүшын бүхы түлнүүдэйнь орондо левидүүдэй үхэр мал Намда үгэ. Левидүүд Минии болог. Би Эзэнтнай гээшэб!

⁴⁶ Левидүүдһээ 273 хүнөөр олон израильшуудай түрүүшын хүбүүн үхибүүдэй түлөөһэндэ

⁴⁷ хүн бүхэнһөө тогтоомол шэгнүүрээр шэгнэжэ, табан шээкэл мүнгэ суглуула. Израильшуудһаа түлөөһэнэй энэ мүнгэ суглуулаад,

⁴⁸ тэрэнээ Аһароондо, тэрэнэй хүбүүдтэ үгэ. Энэ хадаа хоёр зуун далан гурбан хүнэй орондо түлэжэ абаһан түлөөһэн болоно.

^49-50 Тиигэжэ Моисей хоёр зуун далан гурбан хүнөөр үлүүгэй түлөө сагаан мүнгэ абаба. Тиимэһээ Моисей тэдэнэй түлэжэ абаха мүнгыень израильшуудһаа түрүүшын хүбүүн үхибүүдэйнь түлөө тогтоомол шэгнүүрээр шэгнэжэ, нэгэ мянга гурбан зуун жаран табан шээкэл сагаан мүнгэ суглуулба.

⁵¹ Эзэнэй үгыень дуулажа, Эзэнэй захиралтаар Моисей тэрэ түлэжэ абаха мүнгыень Аһароондо, тэрэнэй хүбүүдтэ үгэбэ.