Тоололго 1 - Библи

Моисей израильшуудые бүридхэн тоолобо

¹ Израильшуудай Египедэй газар дайдаһаа гаража ошоһонһоо хойшо хоёрдохи һарын нэгэдэхи үдэр, Синайн сүл губида майхан һүмэ соо Эзэн Моисейдэ иигэжэ айладаба:

² – Израилиин ниитэ бүхы зоной, тэдэнэй бүхы эрэшүүлые нэрээрнь гэр бүлөөрнь, угаарнь тооложо тооень абагты;

³ Аһароон та хоёр Израилиин сэрэгэй алба хэжэ шадаха, хори наһанһаа дээшэ наһатай бүхы эрэшүүлэй тоое, сэрэгэй бүлэг бүлэгөөрнь тоологты.

⁴ Таанадта обог бүхэнһөө нэгэ хүн – энэ обогой угуудай толгойлогшо туһалха.

^5-15 Таанадта туһалха зоной нэрэнүүд гэбэл, иимэ: Обогууд Угууд Толгойлогшонор Рэүбээнэй Шэдэһүүрэй хүбүүн Элицүүр, Симеоной Цуришаддайн хүбүүн Шэлүмиһээл, Иудын Амминадаабай хүбүүн Нахшоон, Иссахаарай Цуһаарай хүбүүн Нэтанээл, Зэбүлүүнэй Хэлооной хүбүүн Элиааб. Иосифой хүбүүдэй: Эпрааимай Аммиһүүдэй хүбүүн Элишамаа, Мэнашшээгэй Пэдэцүүрэй хүбүүн Гамалиһээл, Бэньямиинэй Гидеоной хүбүүн Абидаан, Даанай Аммишаддайн хүбүүн Ахиээзэр, Ашээрэй Охраанай хүбүүн Пагиил, Гаадай Дэүһээлэй хүбүүн Элиасаап, Напталиигай Энаанай хүбүүн Ахираа.

Обогууд Угууд Толгойлогшонор

¹⁶ Эдэнэр арад зондоо хүндэтэй зон, обогуудай ударидагшад, Израилиин мянган сэрэгэй дарганар болоно.

¹⁷ Моисей Аһароон хоёр нэрээрнь нэрлэһэн эдэ обогуудай толгойлогшонортой хамта

¹⁸ хоёрдохи һарын нэгэнэй үдэр бүхы ниигэмые суглуулжа, тэдэниие обог обогоорнь, уг угаарнь, гэр бүлөөрнь тоолон нэрлэжэ, сэрэгэй албанда ябажа шадаха хоринһоо дээшэ наһатайшуулайнь хамтын тоое тус тустань тоолон гаргажа бүридхэбэ.

^19-46 Моисей, Аһароон, Израилиин арбан хоёр обогой удамаршад Синайн сүл губида тогтон байрлаһан Израилиин арбан хоёр эсэгэнэрэй үри саданарые үе үенүүдээрнь, гэр бүлэнүүдээрнь, бүхы эрэшүүлэйнь нэрэнүүдые Эзэнэй зарлигаар нэрлэжэ, сэрэгэй албанда ябажа шадаха хоринһоо дээшэ наһатайшуулайнь хамтын тоое обог обогуудаарнь тоолон иигэжэ гаргаба: Отогууд Хоринһоо дээшэ наһатай эрэшүүлэй тоо Рэүбээнэй 46 500 Симеоной 59 300 Гаадай 45 650 Иудын 74 600 Иссахаарай 54 400 Зэбүлүүнэй 57 400 Эпрааимай 40 500 Мэнашшээгэй 32 200 Бэньямиинэй 35 400 Даанай 62 700 Ашээрэй 41 500 Напталиигай 53 400 Хамта: 603 550

Отогууд Хоринһоо дээшэ наһатай эрэшүүлэй тоо

⁴⁷ Левиин обогой уг гарбалтай эрэшүүл израильшуудай хамтын тоо бүридхэлдэ ороогүй.

⁴⁸ Эзэн Моисейдэ иигэжэ айладаба:

⁴⁹ – Левиин үе залгамжалагшадые энэ тоо бүридхэлдэ бү оруула, израилиин эрэшүүлтэй хамта бү тооло,

⁵⁰ гэбэшье левидүүдтэ Гэршэлгын майхан һүмэ, тэрэ һүмэдэ хабаатай бүхы юумэнүүдые болон хэрэгсэлнүүдые даалга. Тэдэнэр майхан һүмэ, тэрэнэй бүхы хэрэгсэлнүүдые абажа ябаг, тэрээниие хамгаалжа, майхан һүмэ тойрон хотон хүреэнүүдээ бариг.

⁵¹ Нүүхэдээ, левидүүд майхан һүмэеэ задалан хуряаг, байрлан тогтоһон газартаа майхан һүмэеэ татаг. Хэрбэеэ ондоо хүн эдэ бүгэдые хэбэл, үхэхэ.

⁵² Израильшууд сэрэг сэрэгүүдээрээ өөрынгөө тугтаяа хамта өөһэд өөһэдынгөө хотон хүреэнүүдтэ байха ёһотой.

⁵³ Израильшуудта гай тодхор ушархагүйн тула левидүүд Гэршэлгын майхан һүмын хажууда хотон хүреэнээ баряад, Гэршэлгын майхан һүмэеэ харууһалан харуулда зогсохо ёһотой.

⁵⁴ Израильшууд Эзэнэй Моисейдэ зааһан зарлигыень түгэс дүүрэн дүүргэбэ.