Даниил 7 - Библи

Даниил үзэгдэлдээ дүрбэн амитадые хараба

¹ Вавилооной хаан Бэлшаццаарай зонхилолтын нэгэдэхи жэлэй ябажа байхада Даниил зүүдэндээ нэгэтэ үзэгдэл хараба. Тиигээд тэрэ зүүдэеэ бэшэжэ абаа бэлэй.

² Даниил иигэжэ хөөрэнэ: – Һүниндөө иимэ үзэгдэл зүүдэн соогоо харааб – тэнгис далай дээрэ дүрбэн зүгһөө һалхи шуурган үлеэн-һүүен байба.

³ Бэе бэеһээ об ондоо дүрбэн амитан тэнгис далай сооһоо гарашабал даа!

⁴ Түрүүшын амитан бүргэдтэл адли далитай, гэбэшье түхэлөөрөө арсаланда адли. Хараһаар байтарни, далинуудынь хуулагдан абтаба. Тиигээд тэрэ үргэгдөөд, хүндэл адли хүл дээрээ табигдаба, хүнэй ухаан бодол тэрээндэ үгтэбэ.

⁵ Хоёрдохи амитан хойто хүлнүүд дээрээ зогсоод байһан баабгайдал адли һэн. Амандань, шүдэнүүдэйнь хоорондуур гурбан яһан харагдаа бэлэй. «Добтолжо, зоргоороо мяха эди!» гэжэ тэрээндэ хэлэгдээ һэн.

⁶ Үшөө нэгэ амитаниие харабаб – тэрэ ирбэстэл адли һэн, нюрган дээрээ дүрбэн далитай, дүрбэн тархитай, засаг зонхилолтотой бэлэй.

⁷ Удаань һүниин үзэгдэлдөө дүрбэдэхи амитаниие харабаб: угаа аймшагтай, һүрөөтэй, ехэ хүсэтэй, мантан түмэр шүдэтэй һэн. Тэрэ бүхы юумэ үрэбхижэ, удара татажа, үлөөшые дэбһэжэ байгаа. Бусад амитадһаа тэрэ нэгэл ондоохон, арбан эбэртэй һэн.

⁸ Минии хараһаар байтар тэдэ эбэрнүүдэй хажуугаар нэгэ багахан эбэр ургажа, хуушан гурбан эбэр ходоро татагдажа, һуурииень тэрэ шэнэ эбэр эзэлбэ. Тэрэ эбэр хүндэл адли нюдэтэй, дээрэлхүүгээр дуугарагша аматай бэлэй.

Угаа үндэр наһатай

⁹ Удаань минии харахада хан шэрээнүүд табигдажа, Угаа үндэр наһатай Нэгэн шэрээ дээрэ һууба. Хубсаһаниинь саһан мэтэ сагаан, үһэниинь сэбэр нооһон мэтэ, шэрээниинь дүрэлзэжэ байһан галдал, мөөрнүүдынь – аһажа байгааша гал бэлэй.

¹⁰ Тэрээнһээ гал дүлэн гол мэтэ урдажа байгаа. Мянганай мянган Тэрээндэ алба хэжэ, түмэнэй түмэн урдань зогсожо байгаа. Шүүбэрилэгшэд һуужа, номууд нээгдэбэ.

¹¹ Эбэрэй аманһаа гараһан бардам үгэнүүдһээ эхилээд, тэрэ амитанай алуулагдаһые, бэеынь һалажа, галдагдаһые би бултыень хараа һэм.

¹² Бусад амитадһаа засаг зонхилолтонь абтагдаад, ямар нэгэн болзор болотор ами наһаниинь үлөөгдөө бэлэй.

¹³ Һүниин үзэгдэлнүүд соогоо би мүн лэ иимэ юумэ харааб: тэнгэриин үүлэнүүдтэй хамта хүн түрэлхитэнэй хүбүүндэл адли хэншьеб ябажа, дүтэлхэдэнь, Үндэр наһатайда тэрэниие асарба.

¹⁴ Засаг, соло, хан түрэ Тэрээндэ үгтэжэ, бүхы яһатад, арадууд, обогууд тэрэнэй засаг мэдэрээ. Зонхилолтонь – хэтэ мүнхын, хэзээшье дууһахагүй, хан түрэнь һандархагүй бүхэ.

Үзэгдэлнүүдые тайлбарилга

¹⁵ Би, Даниил, угаа шэшэрбэб, эдэ үзэгдэлнүүд намайе ехэ һүрдүүлбэ.

¹⁶ Зогсожо байгааша нэгэндэ дүтэлжэ, эдэ бүгэдын ямар удхатай байһые асуубаб. Тэрэ намда энэ харааша юумэнэйм удхые тайлбарилжа, ойлгуулжа үгэбэ:

¹⁷ – Эдэ мантан дүрбэн амитад хадаа газар дэлхэйн хаашуул болоно.

¹⁸ Харин удаань хан түрэ Дээдын дээдэ Бурханай гэгээшүүлдэ үгтэхэ. Иигэжэ тэдэ хэтэ мүнхэдөө зонхилон байха.

^19-20 Тиихэдэнь бусадһаа ондоо, угаа аймшагтай, түмэр шүдэтэй, зэд һабартай, бүхы юумэ үрэбхижэ, һандаргаажа, үлөөшые дэбһэжэ байгша тэрэ дүрбэдэхи амитан тушаа тайлбарилан үгэхыень, мүн тиихэдэ тархи дээрэхи арбан эбэр гээшэ юун бэ, гурбан эбэрэй унахада һууридань ургааша, нюдэдтэй, аматай, дээрэлхүүгээр дуугарагша, бусад эбэрнүүдһээ томошог тэрэ үнөөхи эбэр гээшэ юун бэ гэжэ тайлбарилжа үгэхыень гуйгаа һэм.

²¹ Тэрэ эбэрэй гэгээшүүлэй урдаһаа байлдаа хэхые, диилэжэ байхыень би хараһан байнаб.

²² Гэбэшье Үндэр наһатай ерэжэ, Дээдын дээдэ Бурханай гэгээшүүлэй үнэн зүбынь элиржэ, тэдэ гэгээшүүлэй засаг бариха саг мандаба.

²³ Минии асуудалда тэрэ иигэжэ харюу үгэбэ: – Дүрбэдэхи амитан гэбэл, бусад хан түрэнүүдтэ орходоо ондоохон, дэлхэй дээрэхи бүхы юумэ залгижа, дэбһэжэ, һандаргаажа байха дүрбэдэхи хаан түрэ бии болохо гэһэн удхатай.

²⁴ Арбан эбэр хадаа энэ хан түрэ соо арбан хаашуул бии болохо, удаань тэдээнһээ ондоо үшөө нэгэ хаан мүндэлжэ, гурбан хаашуулые диилэхэ.

²⁵ Дээдын дээдэ Бурханай урдаһаа һөөргэдэн тэрэ үгэ хэлэдэг болохо, Тэрэнэй гэгээшүүлые харшалха, һайндэрнүүдые, Хуули ёһые үгы хэхэеэ һэдэхэ. Гэгээшүүл тэрэнэй мэдэл доро нэгэ сагай, хоёр сагай, хахад сагай хугасаанууд соо байха.

²⁶ Харин Шүүбэрилэгшэд шэрээ дээрэ һуухадаа, засаг түлөөлгыень абаха. Иигэжэ тэрэ хюдагдажа, эсэслэн үгы хэгдэхэ.

²⁷ Дээдэ Бурханай гэгээшүүлэй арад түмэндэ хан түрэ, засаг түлөөлгэ, огторгой доро байгша бүхы хан түрэнүүдэй һүр жабхалан үгтэхэ. Тэрэнэй хааншалалга хэтэ мүнхэдөө оршохо, ямаршье засагтан тэрэнэй засаг мэдэржэ, хэлэһэн юумыень хэжэ байха.

²⁸ Эндэ хөөрөөн түгэсэнэ. Би, Даниил, угаа һүрдэжэ, шэгни хубилан байгаа һэн. Эдэ бүгэдые сэдьхэлдээ хадуун абаа бэлэйб.