Даниил 6 - Библи

Даниил арсалангуудтай нүхэ руу хаягдаба

¹ Даарий улас түрын бүхы нютагуудаар зуун хорин ноёдые томилбо.

² Тэдэ гурбан түшэмэлнүүдтэ, тэдэнэй нэгэн Даниил, элидхэн тоосодог һэн. Иигэжэ хаан бэеэ зобоодоггүй бэлэй.

³ Даниил бусад түшэмэл, ноёдто орходоо дээрэ гээд элирбэ, юуб гэхэдэ, тэрэ шанга зоригтой һэн. Тиимэһээ хаан тэрэниие бүхы хан түрэ зонхилдог байхаар табиха гэжэ һанажа байгаа.

⁴ Тиихэдэнь түшэмэлнүүд болон ноёд Даниилай хойноһоо хинажа, улас түрэ хүтэлбэрилхэдөө ямар муу юумэ хэдэгыень бэдэрхэ һанаатай байба ха. Теэд тэдэ иимэ юумэ олобогүй, юуб гэхэдэ, тэрэ үнэн сэхэ, ямаршье өө мөөгүй, гэмгүй бэлэй.

⁵ Тэдэ зон иигэжэ хоорондоо хөөрэлдэбэ ха: – Даниилые зэмэлхэ юумэ олохогүймнай ха даа. Бурханайнгаа хуули ёһо сахин дүүргэдэгтэнь олоогүй һаа, бэшэ хаанашье олохогүйбди.

⁶ Тиигээд эдэ түшэмэл, ноёд хаанда ерэжэ, иигэжэ хэлэбэ: – Үндэр түрэлтэ Даарий хаан! Хэтэ мүнхэдөө оршохотнай болтогой!

⁷ Хаан түрын бүхы түшэмэлнүүд, эрхилэгшэд, ноёд, зүбшэгшэд, нютагай ноёд хоорондоо хэлсэжэ, иигэжэ шиидхэбэ: үндэр түрэлтэ хаан, танһаа бэшэ ондоо хүндэ, үгышье һаа, бурханда хэн нэгэн энэ гушан үдэр соо нэгэтэ зальбаран гуйжа байгаа гээшэ һаа, арсаланай нүхэн руу хаюулагдаха ёһотой. Энээн тушаа хаанай зарлиг, хорилго тунхаглагдаг лэ.

⁸ Үндэр түрэлтэ хаан, иимэ хорилго баталыт даа, гар табин зарлиг гаргыт! Мидиин болон Персиин хуули мэтэ тэрэ хубилгагдахагүй, һэлгэгдэхэгүй байг лэ!

⁹ Даарий хаан зүбшөөжэ, зарлиг гаргаба.

¹⁰ Даниил иимэ зарлигай гараһан тушаа мэдэһэншье һаа, гэртээ ошоходоо урданайхидал адляар үдэртөө гурба дахин үбдэглэн, өөрын Бурханда зальбардаг, магтаал үргэдэг байба. Мүргэдэг дээдэ таһалгынь сонхонууд Иерусалим руу харанхай, нээгдэнхэй байдаг һэн.

¹¹ Бурхандаа мүргэжэ байха үеыень һамбаашалан, тэдэ зон Даниилда бултадаа ерэжэ, зальбаржа байһыень хараба.

¹² Тиигээд тэдэ хаанда ерэжэ, хорилго тухайнь һануулба: – Гушан үдэрэй туршада нэгэтэ хэн нэгэн танһаа бэшэ ондоо хүндэ гү, али бурханда зальбаран мүргэжэ байгаа һаань, тэрэниие арсаланай нүхэн руу хаяха гэһэн зарлиг та гаргаа бэшэ аалта? Хаан: – Тиимэ даа. Энэ зарлиг хадаа Мидиин болон Персиин хубилгагдахагүй хуули гээшэл! – гэжэ харюусаба.

¹³ Тиихэдэнь тэдэ хаанда: – Иудаһаа баряанда абтаһан зоной нэгэн болохо Даниил танииешье, хаан, танай зарлигыешье тооногүй: зальбаралнуудаа тэрэ үдэртөө гурба дахин уншажа байнал, – гэбэ.

¹⁴ Энээниие дуулахадаа, хаан угаа голхоржо, Даниилые абарха гэжэ шиидэбэ. Абарха арга тэрэ наранай оротор бэдэрээ бэлэй.

¹⁵ Харин тэдэ зон дахин хаанда ерэжэ, иигэжэ хэлэбэ: – Мидиин болон Персиин хуулиин ёһоор, хаанай ямаршье хорюул, зарлиг болюулжа болохогүй гэжэ та һайн мэдэнэт.

¹⁶ Тиихэдэнь хаан Даниилые асаржа, арсаланай нүхэн руу хаяхыень захирба. Тэрэ Даниилда: – Саг үргэлжэ шүтэдэг Бурханшни шамайе абархань болтогой! – гэбэ.

¹⁷ Шулуун асарагдажа, нүхэнэй амһар бүглэбэ. Хаан нүхые өөрынгөө болон түшэмэлнүүдэйнгээ тамгануудаар тамгалба. Иигэжэ Даниилай тушаа хэрэг тэрэл зандаа бүтэхэ ёһотой байгаа.

¹⁸ Хаан ордон руугаа ошожо, унтаха гэхэдээ унтажа ядаба, эдеэ хоолшье барибагүй, зугаа наадашье шагнабагүй.

Даниилай гайхамшагта аршалалга

¹⁹ Үүрэй толоной задаржа байхада тэрэ эртэ үглөөгүүр бодожо, арсаланай нүхэн руу яаралтай ошобо.

²⁰ Нүхэндэ дүтэлхэдөө тэрэ сошон-мэгдэн иигэжэ Даниилые дуудаба: – Амиды Бурханай богоол болохо Даниил! Саг үргэлжэ зальбардаг Бурханшни шамайе арсалануудһаа абаржа шадаа гээшэ гү?!

²¹ Даниилай иимэ абяан дуулдашаба: – Үндэр түрэлтэ хаан, хэтэ мүнхэдөө амиды мэндэ оршохотнай болтогой!

²² Бурхамни тэнгэриин Эльгээмэлээ эльгэжэ, Тэрэ арсалануудай ама таглаал! Тэдэ намайе яагаашьегүй! Юуб гэхэдэ, би Бурханай урда нүгэлтэй бэшэб, үндэр түрэлтэ хаан, танайшье урда ямаршье гэм зэмэ хээгүйб.

²³ Хаан угаа ехээр баярлажа, Даниилые нүхэнһөө гаргаха гэжэ захирба. Тэрэниие нүхэнһөө гаргахадань, ямаршье шарха шулгархайгүй гэжэ элирбэ. Бурхандаа этигэдэг байһанайнгаа түлөө тэрэ бүрин бүтэн гарасалдаа гээшэл.

²⁴ Тиигээд хаан Даниилые гэмнэгшэ тэдэ зониие асархыень захирба. Тэдэ асарагдажа, үхи хүүгэдтэеэ, һамгадтаяа хамта арсаланай нүхэн руу шэдүүлэгдэбэ. Нүхэнэй оёорто хүрөөгүйдэнь арсаланууд тэдэниие таһа татаа бэлэй.

²⁵ Энээнэй удаа Даарий хаан иигэжэ бэшэн тунхаглаба: – Дэлхэйн бүхы арадуудта, обогуудта, бүлээлингүүдтэ. Амар амгалан, баян байдал танда оршохонь болтогой!

²⁶ Минии зарлиг иимэ: хан түрымни алишье газар нютагай улад зон Даниилай Бурханһаа айн-шэшэрэн байг лэ. Тэрэ болбол амиды мэндэ, диилдэхэгүй Бурхан мүн, хааншалалгань хэтэ мүнхэ, зонхилолгонь заха хизааргүй.

²⁷ Тэрэ абардаг, аршалдаг, огторгой, газар дээрэ дүлгэ тэмдэгүүдые, гайхамшагта үзэгдэлнүүдые хэдэг. Даниилые Тэрэ арсалануудһаа абараал.

²⁸ Иигэжэ Даниил Даариин, мүн Персиин Киирэй хааншалалгын үенүүдтэ урагшатай һайн ажаһуугаа.