Даниил 3 - Библи

Гурбан хүбүүд алтан хүрэгтэ мүргэхэеэ арсана

¹ Навуходоносор хаан жаран тохой ута, зургаан тохой арай болохогүй үргэн алтан хүрэг бүтээжэ, Вавилооной Дураа гэдэг нюруу газарта табиха тухай захирал гаргаба.

² Тиигээд өөрынь үүсхэлээр бүтээгдэһэн тэрэ хүрэг арюудхаха ёһололдо бүхы тушаалтадые – түшэмэлнүүд, амбан ноёд, хэрэг эрхилэгшэд, мүн тиихэдэ зүбшэгшэд, мүнгэн һангай ноёд, шүүбэрилэгшэд, бүхы газар уһанай ноёд, тушаалтадай ерэхэ тухай тэрэ захирба.

³ Эдэ бүхы тушаалта ноёдой сугларжа, Навуходоносор хаанай байгуулһан хүрэгэй урда зогсон байхада

⁴ хаанай хуули эрхэнүүдые айладхагша шангаар тунхаглаба: – Бүхы арадууд, обогууд, бүлээлингүүд, шагныта!

⁵ Үхэр бүреэгэй, лимбын, ятагай болон бусад хүгжэм дууламсаараа доошоо һүгэдэн унажа, Навуходоносор хаанай байгуулһан алтан хүрэгтэ мүргэхэ ёһотойт.

⁶ Хэн һүгэдэнгүй, мүргэнгүй байнаб, аһажа байһан пеэшэн руу тэрэ дары хаюулха!

⁷ Үхэр бүреэгэй, лимбын, ятагай болон бусад хүгжэм дууламсаараа бүхы арадууд, обогууд, бүлээлингүүд доошоо һүгэдэн унажа, Навуходоносор хаанай байгуулһан алтан хүрэгтэ мүргэбэ.

⁸ Энэ үедэ халдейшүүдэй зариман иудейнүүдые хоблон муушалха арга гаргаба ха.

⁹ Тэдэ Навуходоносор хаанда: – Үндэр түрэлтэ хаан, мүнхэ оршохотнай болтогой!

¹⁰ Хүгжэм дууламсаараа хүн бүхэн һүгэдэн унажа, алтан хүрэгтэ мүргэхэ ёһотой гэһэн захиралта та гаргаа бэлэйт.

¹¹ Хэн нэгэн доошоо унан һүгэдэнгүй, мүргэнгүй байбал, аһажа байһан пеэшэн руу хаюулха ёһотой бэлэйл.

¹² Вавилоон орон нютаг захиран зонхилон байхыень танай табигша иудейнүүд Шадраах, Мэшаах болон Абээд-Нэгоо танай захиралта дууланагүй, бурхадыетнай шүтэнэгүй, байгуулһан алтан хүрэгтэтнай мүргэнэгүй, – гэжэ дуулгаба.

¹³ Навуходоносор хаан ехэ уурлан сухалдажа, Шадраах, Мэшаах болон Абээд-Нэгоое асархыень захирба. Тэдэниие асархадань,

¹⁴ Навуходоносор: – Шадраах, Мэшаах, Абээд-Нэгоо, таанадые минии бурхадые шүтэнэгүй, байгуулһан алтан хүрэгтэм мүргэнэгүй гэжэ дуулааб. Энэ үнэн гү?

¹⁵ Тиимэ һаань, шэлэгты: үхэр бүреэгэй, лимбын, ятагай болон бусад хүгжэмэй абяа дууламсаараа һүгэдэн доошоо унажа, минии байгуулһан хүрэгтэ мүргэгты, мүргөөгүй гээшэ һаа, галаар бушаганажа байгша пеэшэн руу тэрэ дары хаюулхат. Тиихэдэ ямар бурхан таанадые абарха гээд һананат? – гэжэ хэлэбэ.

¹⁶ Шадраах, Мэшаах болон Абээд-Нэгоо гурбан Навуходоносор хаанда хэлэбэ: – Үндэр түрэлтэ хаан, энээндэ маанадай харюусахын хэрэг үгы.

¹⁷ Манай шүтэдэг Бурхан абарха аргатай гээшэ һаа, галаар дүрэлзэһэн пеэшэнһээшье, танай мэдэлһээшье маанадые абархал.

¹⁸ Харин тиимэ юумэнэй болоошьегүй һаань, та, үндэр түрэлтэ хаан, мэдэжэ байгты: бурхадтатнай шүтэхэгүйбди, байгуулһан алтан хүрэгтэтнай мүргэхэгүйбди, – гэжэ харюусаба.

¹⁹ Навуходоносор хаан угаа сухалдажа, Шадраах, Мэшаах болон Абээд-Нэгоо гэгшэд руу хүри-улаанаар хараад, урдынхидал орходоо долоо дахин ехээр пеэшэ түлин халаахые захирба.

²⁰ Тиигээд сэрэгэйнгээ эгээл хүсэтэй зондо Шадраах, Мэшаах болон Абээд-Нэгоо гэгшэдые хүлижэ, галаар бушаганажа байгша пеэшэн руу хаяхыень захирба.

²¹ Хубсаһатай зандань – үмдэ, самсатайнь, малгайтайнь, юрэдөө, бүхы хубсаһаарнь – тэдэниие хүлижэ, сэрэгшэд гал дүлэн пеэшэн руу хаяба.

²² Хаанай хатуу захиралтын ёһоор, пеэшэн угаа ехээр халаагдаһан байжа, Шадраах, Мэшаах, Абээд-Нэгоо гэгшэдые гал руу хаягша зон өөһэдөө шатан хосорбо.

²³ Шадраах, Мэшаах болон Абээд-Нэгоо хүлеэтэй зандаа галаар бушаганаһан пеэшэн руу унаа бэлэй.

Хүбүүдэй гайхалтай абаралга

²⁴ Гэнтэ Навуходоносор угаа гайхан, хүл дээрээ собхорон бодожо, түшэмэлнүүдһээ асууба: – Гурбан хүниие хүлеэтэй зандань гал руу шэдээ бэшэ аалди? Тэдэнь: – Мүн даа, үндэр түрэлтэ хаан! – гэжэ харюусаба.

²⁵ – Теэд би дүрбэн хүниие гал дүлэн соо хараналби! Тэдэ ямаршье хүлилгэгүй, бүрин бүтэн зандаа гал соогуур сүлөөтэй ябажа байна. Дүрбэдэхи хүниинь бурхандал адли! – гэжэ Навуходоносор хэлэбэ.

²⁶ Тиигээд тэрэ аһажа байгша пеэшэнэй амһартада дүтэлөөд: – Шадраах! Мэшаах! Абээд-Нэгоо! Дээдэ Бурханай богоолнууд! Гарагты тэндэһээ! – гэбэ. Тиихэдэнь Шадраах, Мэшаах болон Абээд-Нэгоо гал дүлэн сооһоо гараба.

²⁷ Түшэмэлнүүд, амбан ноёд, хэрэг эрхилэгшэд, хаанай бусад тушаалтад сугларжа, гал дүлэн эдэ зониие яагаашьегүй – толгойнь үһэн шатаагүй, хубсаһа хунарынь тэрэл зандаа, утаанайшье үнэргүй байһыень ойлгон хараба.

²⁸ Навуходоносор: – Шадраахай, Мэшаахай, Абээд-Нэгоогой Бурханда магтаал үргэгты! Тэрэ тэнгэриин Эльгээмэлээ эльгээжэ, Өөртэнь этигэдэг богоолнуудаа абараа! Эдэ зон минии захиралта дуулангүй, ами наһаяа хайрлангүй, өөрын Бурханһаа ондоо бурхадта шүтэн мүргэхэеэ арсаал!

²⁹ Тиимэһээ ямар нэгэн арадай, обогой, бүлээлингэй хэн нэгэн Шадраахай, Мэшаахай, Абээд-Нэгоогой Бурхан тушаа баһан дуугарбал, хэһэг болгон сабшагдаха, гэр байрань һандаргаагдаха. Энэ Бурхандал адли абарха ондоо бурхан байхагүй, – гэжэ тунхаглаба.

³⁰ Тиигээд хаан Шадраах, Мэшаах болон Абээд-Нэгоодо Вавилоон соо үшөө үндэр тушаалнуудые үршөөгөө бэлэй.

Навуходоносорой аймшагтай зүүдэн

³¹ Навуходоносор хаан дэлхэй дээрэ ажаһуудаг бүхы арадуудта, обогуудта болон бүлээлингүүдтэ иигэжэ дуулгана: – Амгалан тайбаниие, үнэр баян болохыетнай хүсэнэб!

³² Дээдэ Бурханай харуулһан дүлгэ тэмдэгүүд, гайхамшагта үзэгдэлнүүд тушаа таанадта хөөрэхэ хүсэлэнтэйб.

³³ Дүлгэ тэмдэгүүдынь ямар агууехэб! Гайхамшагта үзэгдэлнүүдынь хэды шангаб! Бурханай хан түрэ хэтэ мүнхэдөө оршохо, засаг зонхилолтонь үеһөө үедэ үргэлжэлхэ!