Даниил 1 - Библи

Дүрбэн хүбүүд Навуходоносорой ордондо

¹ Иудын хаан Ёякиимэй гурбадахи жэлээ зонхилжо байха үедэ Вавилооной хаан Навуходоносор Иерусалимда добтолжо, хотые бүһэлэн сэрэгээрээ жагсаба.

² Иудын хаан Ёякиим хааниие барихыень, Һүмын үнэтэ тахил табагуудые дээрмэшэлэн абахыень Эзэн Бурхан тэрээндэ зүбшөөжэ, Навуходоносор Шинаар руугаа бусахадаа, тэдэ үнэтэ тахил табагуудые өөрынгөө бурханай үргөө соо оруулба.

^3-4 Нэгэтэ хаан Иудын хаашуулай болон түшэмэл ноёдойнь үринэр болохо хүбүүдые асархыень түшэмэлнүүдэйнгээ ноён Ашпэнаазда даалгаба. Ямаршье эрэмдэггүй, сэбэр гоё, хурса ухаатай, һүбэлгэн, эрдэмтэй хүбүүдые тэрэ шэлэхэ ёһотой байгаа. Тэдэ хүбүүд хаанай ордон соо алба хэхэеэ шэлэгдэхэ һэн. Тиимэһээ тэдэниие Вавилоон зоной хэлэ бэшэгтэ һургаха тухай хаан хэлээ бэлэй.

⁵ Тэдэ хүбүүдтэ эгээл һайн эдеэ хоол үдэр бүри үгтэдэг байха гэжэ тэрэ мүн лэ захираа. Гурбан жэл соо иигэжэ хүмүүжүүлэгдээд, тэдэ хаанда алба хэдэг болохо ёһотой байгаа.

⁶ Иудын обогһоо шэлэгдэн абтаһан хүбүүдэй дунда Даниил, Ханаанияа, Мишаһээл, Азаария гэгшэд байлсаа.

⁷ Түшэмэлнүүдэй ахалагша ноён тэдээндэ шэнэ иимэ нэрэнүүдые үгэбэ: Даниилдэ Бэлтэшаццаар, Ханаанияада Шадраах, Мишаһээлдэ Мэшаах, Азаарияада Абээд-Нэгоо.

⁸ Хаанай эдидэг эдеэ, уудаг унда уужа, бэеэ бузарлажа байхагүйн тула Даниил тэдэниие эдихэ-уухагүйб гэжэ өөртөө шэбшэн хэлээд, хаанай эдеэ хоол барихагүй тухайгаа түшэмэлнүүдэй ахалагша ноён Ашпэнаазые гуйба.

⁹ Бурхан түшэмэлнүүдэй ахалагша ноёниие Даниилда эльгэтэй, эелдэрээр хандадаг болгоһон байгаа.

¹⁰ Гэбэшье Ашпэнааз Даниилда иигэжэ хэлэбэ: – Эзэн хаан өөрөө таанадай эдеэ хоол тухай һанаагаа табяа бшуу. Үетэнһөө туранхай, муугаар харагдаа һаатнай, тэрэ намайе зэмэлээд, толгойн саазада хүртүүлхэл.

¹¹ Түшэмэлнүүдэй ахамад ноён тэдээндэ харуул болгон нэгэ хүниие табиһан байгаа. Даниил тэрээндэ:

¹² – Арбан үдэрэй туршада бидэндэ гансал ургамал ногоо, хара уһа үгэдэг байг лэ. Иигэжэ бидэниие шалган туршыт даа.

¹³ Арбан хоногой үнгэрһэнэй удаа хаанай эдеэ хоол баригша хүбүүдтэй бидэниие сасуулжа хараарайгты. Тиигээд маанадтай юу хэхэеэ шиидээрэйгты, – гэбэ.

¹⁴ Тэрэ үгыень дуулажа, арбан хоногой туршада шалгаха гэжэ шиидэбэ.

¹⁵ Арбан үдэрэй үнгэрһэнэй удаа Даниил, мүн гурбан нүхэдынь хаанай эдеэ хоол баригша хүбүүдтэ орходоо һураггүй шиираг, сэбэр гээд тодорбо.

¹⁶ Иигэжэ харуулшан элбэг-дэлбэг эдеэ хоол, үзэмэй дараһан архииень өөртөө абажа, тэдээндэ ургамал ногоол үгэдэг байгаа һэн.

¹⁷ Эдэ дүрбэн хүбүүдые Бурхан ухаатай, сэсэн мэргэн болгоо һэн. Тэдэ ном уншажа, эрдэмтэй болоо. Даниил үшөө элдэб үзэл үзэдэг, зүүдэ тайлбарилдаг шэдитэй һэн.

¹⁸ Хаанай тогтооһон сагай ерэхэдэ, түшэмэлнүүдэй ахамад ноён тэдэ бүгэдэ хүбүүдые Навуходоносорто харуулба.

¹⁹ Хаан тэдээнтэй хөөрэлдөөд, Даниил, Ханаанияа, Мишаһээл, Азаария гэгшэдые эгээл эрхимүүд гэжэ шэлэбэ. Иигэжэ тэдэ хаанай ордон соо алба хэдэг болоо бэлэй.

²⁰ Ямаршье хэрэгээр зүбшэл заабари асуухадаа, эдэ хүбүүд хан түрэ соомни байгааша мэргэшүүлһээ, үзэлшэдһөө долоо дахин дээрэ гэжэ хаан шиидээ һэн.

²¹ Вавилоониие Киир хаанай диилэһэн саг хүрэтэр Даниил тэндэ байгаа бэлэй.