Lentrodiksyon
Profet Sofoni ti koz delapar Bondye dan lepok Zozyas, lerwa rwayonm Zida, ant 640 ek 609 avan Zezi-Kri. Sa ti en lepok byen mouvmante ant lepok Asiriyen ki ti for, setadir konmansman setyenm syek, ek lepok Babilonyen, setadir lafen setyenm syek. Profet Sofoni i reponn bann ki ti demande si vreman Bondye i enterese avek bann imen ek zot listwar. I ti anonse ki Bondye pou entervenir dan divers mannyer:
Bondye pou ziz bann zabitan Zida ek Zerizalenm: 1.2—2.3; 3.1-8
I pou detri bann pep vwazen Zida: 2.4-15
I pou transform latitid lepep ek zabitan Zerizalenm 3.9-20
Sa liv i montre ki aksyon Bondye i konsern later antye avek tou son bann zabitan. Sa ki arive avek Zerizalenm ek pep Bondye i enportan pour tou et imen.
Profet i anonse ki zour Senyer i pros. I prezant sa zour koman en zour sakrifis (1.7-8). En sakrifis avek de laspe: Destriksyon ek transformasyon. 1. Zerizalenm ek bann nasyon etranze pou ganny detri. 2. Bann nasyon etranze ek Zerizalenm pou ganny pirifye.
Zour Senyer i sa zour kan Bondye pou ziz bann pep ek tou bann et imen. Alor, i osi sa zour kan lavi pou rekonmanse. Si Bondye i ziz later antye, se pour ki later antye i ganny transformen e ador li. Sa liv i fini par montre ki Bondye pou prezan dan Zerizalenm parmi tou son pep ansanm.
