२ थेसलोनिकि 3 - बोटे

पर्‌थनाको लागि अनुरोध

¹ दाजिभाइ दिदिबहिनिहान हो, हाम्‍रो कुराहान सके कते पहिलि मइ ताहान्‍के कतिन, हाम्‍रो लागि पनि लगातार पर्‌थना गरिदेहेउ। उसिगर्‌ते पर्‌भुको बचन चारेउपट्‍टि छिटोकते छिटो फइलिउस् र उनहान्‍इ बिस्‍वास गरुस्। इ धन्‍दा ताहान्‍को माझोमा पनि होख्‍लो रहिक्।

² परमेस्‍वरइ हाम्‍राइ धेरे खराब मानिसहान्‍भि बचाउस् कहि पर्‌थना गरिदेहेउ, क्‍यारेकनि अरु धेरे मानिसहान्‍इ नाम्‍रो खबरमा बिस्‍वास नागर्‌तात्।

³ तर पर्‌भु बिस्‍वासिलो बाटि। ओइ ताहान्‍के बलियो बनाताइ र सइतानभि बचाताइ।

⁴ हामिइ कलो बोलि ताहान्‍इ मान्‍तिहि बाटो र मानिधार्‌ताओ कहिकनि हामि बिस्‍वास गर्‌ताहि, क्‍यारेकनि ताहान्‍को लागि हामि पर्‌भुमा भर पर्‌लाटाहुँ।

⁵ परमेस्‍वरइ ताहान्‍के गर्‌लो माया र खिरिस्‍टइ सहलो दुख बुझे पर्‌भु येसुइ ताहान्‍के साहेता गरुस्।

सभइ जनाइ धन्‍दा गरे ज पर्‌ताइ

⁶ दाजिभाइ दिदिबहिनिहान हो, पर्‌भु येसु खिरिस्‍टको नाउँमा हामि ताहान्‍के आग्‍या देताहि, कि हामि ताहान्‍के सिखालो अनुसार नामाल्‍लार अनि अल्‍छि गर्‌लारहान्‍भि सङ्‍गत झिनगर्‌हेउ।

⁷ क्‍यारेकनि कस्‍के हाम्‍रो देखासिखि गरेपर्‌ताइ कलार कुरा ताहान्‍इ जान्‍लाटो। हामि ताहान्‍सिन रते अल्‍छि होखिकनि नाबिस्‍हुँ।

⁸ ताहान कुन्‍हुँके पनि भार झिनहोखुस् कहिकनि हामिइ रातदिन एकदम दुख र मेहनत गर्‌लोरहि र पइसा नातिरिकनि कुन्‍हुँको केइ चिज पनि नाखाहिँ।

⁹ ताहान्‍इ हाम्‍रो लागि सभइ चिज जुटाए पर्‌ताइ कलार अधिकार होख्‍नि पनि हाम्‍रो जिबन ताहान्‍को लागि नमुना होखुस् कहिकनि हामिइ ओस्‍नो गर्‌लो हो।

¹⁰ क्‍यारेकनि हामि ताहान्‍सिन रते ताहान्‍के इ आग्‍या देलो रहि, “यदि कुन्‍हुँइ धन्‍दा नागर्‌ताइ कनि ओइ झिनखाउस्।”

¹¹ हामि इ कताहुँ कि ताहान मध्‍ये कत्‍का जना अल्‍छि बाटो कहिकनि हामिइ सुन्‍लाटाहुँ। उनहान आफिइ पनि धन्‍दा नागर्‌तात्, तर अरुको धन्‍दामा हात घालिकनि अलमल्‍याइ धार्‌लाटो कहि सुन्‍लाटिहि।

¹² हामिइ पर्‌भु येसु खिरिस्‍टको नाउँमा एस्‍नो मानिसहान्‍के चुपचाप आफ्‍नो धन्‍दा गरिकनि खाएके लागि र आफ्‍ने हातभि कमाउस् कहि अनुरोध गर्‌ताहि।

¹³ तर दाजिभाइ दिदिबहिनिहान हो, ताहान भलाइ गर्‌लार कुरामा पाछु झिनपरो।

¹⁴ यदि ताहानमध्‍ये कुन्‍हुँइ इ चिट्‌ठिमा लेखेलो कुरा इन्‍कार गर्‌ताइ कनि, ओइ मानिसहान्‍के चिनिधारो। र ओख्‍रोसिन सङ्‍गत झिनगरो ताकि उ आफि लाजमा परुस् र ओइ काम गरिकनि खाउस्।

¹⁵ तर पनि ओख्‍राइ दुस्‍मन जस्‍ने कहि झिनसोचो बरु आफ्‍नो दाजिभाइ दिदिबहिनिहान हो कहि सम्‍झिकनि ओख्‍राइ चेतावनि देहेउ।

पावलको अन्‍तिम कुरा

¹⁶ हाम्‍राइ सान्‍ति देलार पर्‌भु आफिइ हर समय, हरेक तरिकाइ ताहान्‍के सान्‍ति देउस्। ताहान सभइ जनासिन पर्‌भुको साथ रहुस्।

¹⁷ मइ पावल आफ्‍ने हातइ इ बिन्‍ति लेखिकनि पठातिहि बाटिन। इ चिट्‌ठि मइ ज लेख्‍लो हो कलार चिन्‍ह हो।

¹⁸ हाम्‍रो पर्‌भु येसु खिरिस्‍टको अनुग्‌रह ताहान सभइसिन रहुस्।