२ थेसलोनिकि 2 - बोटेपर्भु आउलार दिन 1 दाजिभाइ दिदिबहिनिहान हो, हाम्रो पर्भु येसु खिरिस्ट आउलार र हामि ओख्राइ भेटे परमेस्वरइ हाम्राइ कस्के बट्याताइ कलार बारेमा केइ कुरा परस्टसिन कतिन। 2 कुन्हुँइ पर्भु आउलार दिन आइसक्लाटि कहि परमेस्वरभि हामि बोल्लो कताइ कनि र चिट्ठि लेखिकनि पठानि पनि तुरुन्ते ताहान अलमलमा झिनपर्हेउ र झिन आत्हेउ। 3 उनहान्इ ज्या कनि पनि उनहान्को बोलिइ ताहान्को बिस्वासके नास झिनगरुस्। क्यारेकनि जब सम्म धेरे मानिसहान्इ परमेस्वरको बिरोध नागर्तात्, धर्म नियम नामान्लार मानिस नास होखे देखा नापरुनज्यालसम्म उ दिन नाआउताइ। 4 धर्म नियमके नामान्लार मानिसइ परमेस्वर कहिकनि मानि आउलो सभइ थोकको बिरोध गर्ताइ र आफिइ आफइके बड्को ठान्ताइ। उसिगर्ते उ परमेस्वरको मन्दिरमा बिस्ताइ र “मइ ज परमेस्वर हो” कहिकनि कताइ। 5 मइ ताहान्सिन रते ज इ सभइ कुरा सिखालो रहिन क्या ताहान्इ बिर्साओ र? 6 ओख्रो दिन पुग्लोपाछु ओइ धर्म नियम नामान्लार मानिस देखा पर्ताइ। आन्हा सम्म ओख्राइ क्याइ रोक्लाटि कहि ताहान्के थाहा बाटि। 7 क्यारेकनि धर्म नियम नामान्लार मानिसको लोकाइलो सक्तिइ काम गरिधार्लाटि। आन्हा सम्म ओख्राइ ज्याइ रोक्लाटि, परमेस्वरइ नाहटाते सम्म उ रहि ज रताइ। 8 एख्राइ थामिधार्लार हटिसक्लोपाछु उ धर्म नियम नामान्लार मानिस देखा पर्ताइ। अनि पर्भु येसुइ आफ्नो आग्याइ ओख्रो सक्तिके नास गर्ताइ र पर्भु येसुको महिमाइ ओख्राइ नास गर्ताइ। 9 तर धर्म नियम नामान्लार मानिसके येसुइ नास गरेकते पहिलि उ मानिस सइतानको सक्ति लिहिकनि आउताइ अनि सभइ किसिमको फटाहा चिन्ह र अचम्म अचम्म धन्दाहान गर्ताइ। 10 र नास होख्लारहान जत्का सभइके ओइ हरेक किसिमको ननाम्रो चालइ झुक्याताइ, क्यारेकनि उनहान्इ मुक्ति देलार सत्यके इन्कार गर्वाइ। 11 उसिगर्ते उनहान्इ फटाहा कुराके मन परालो कारनइ परमेस्वरइ उनहान्ठुँ छलको सक्ति पठाइदेताइ। 12 क्यारेकनि सत्य कुराके मन नापरालार तर ननाम्रो कुरामा आनन्द मान्लार सभइ दोसि ठहरेउस् कहिकनि परमेस्वरइ इ धन्दा गर्ताइ। बिस्वासमा इस्थिर रहेउ 13 दाजिभाइ दिदिबहिनिहान हो, पर्भुइ ताहान्के माया गर्लाटि, ताहान्को लागि परमेस्वरके हामिइ सधइ धन्येबाद देहे ज पर्ताइ, क्यारेकनि सुरुभि ज परमेस्वरइ ताहान बाँचे सकोस् कहिकनि चुनिक र सत्य कुरामा ताहान्इ गर्लो बिस्वास साङ्हे पबित्र आत्माभि ताहान्के पबित्र बनाले लेग्लाटि। 14 एइ मुक्तिको लागि हामिइ सुनालो नाम्रो खबरभि, हाम्रो पर्भु येसु खिरिस्टको आदर ताहान्इ पनि पाओ कहिकनि ताहान्के बोलालो हो। 15 उसिगर्ते दाजिभाइ दिदिबहिनिहान हो, हामिइ बोलिकनि र लेखिकनि ताहान्के देहेलो दोहइ सिछाहानमा इस्थिर होखो। 16 हाम्रो पर्भु येसु खिरिस्ट आफिइ र परमेस्वर बुबाइ हाम्राइ माया गर्लाटि। अनि ओख्रो अनुग्रहभि हाम्राइ सधइ हउसला र नाम्रो आस देलाटि। 17 ताहान्के हउसला दिइधारुस् हरेक नाम्रो धन्दा र बचनमा ताहान्के बलियो बनाइधारुस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.