Yohané 2 - NTSHOB NSI

Nandà mà Kana

¹ A be mbatte lé'njù tat, bo nke ntsiaṅte nandà mà Kana, ngô Galiléa. Mà Yésu lo be bwe.

² Là bo tsiaṅ mba Yésu mba ghazi'te nu i num yen nandà là.

³ Mba ndu' ke ntù' nemi là, mà Yésu tshob yi ndù: Bo ke' bèn ngù ndu'.

⁴ Yésu tshob yi ndù: Mènnzwi, ke z'o ghù ntùm yàm nu à? Yàm ngelaṅ ke' yoṅ nku'u,

⁵ màab tshob ghafa' ndù: Bin ghù mba ke lo z'a nsi tshob bin nà;

⁶ ntshaṅ ntse ntôg lo be bwe mi bo na' njab num nelànte wut ba Yuda là, ta' tshaṅ lo ke ndo' mfi' ntse bàa ke tat lo.

⁷ Yésu tshob bo ndù: Bin naṅ ntse ntùm men ntshaṅ nà, a dune, bo naṅ ntse bwe k'a dun nte ngoṅ bwe.

⁸ A tshob bo ndù: Bin tu' ndonni, ndo' nèn mfà ngaze nandà. Bo lo' nèn mfà yi.

⁹ Là ngelaṅ ngaze nandà zwi'te ntse mi a tù' ndu' là, a ke lèn dù' z'a fe là, là ghafa' tse bo tu' ntse là lo lène.

¹⁰ Ngaze nandà tsiaṅ ndu mènnzwi ntshob yi ndù: A b'a matnu ndù bo ke mbwôgmbwe nte à ndu' mebwô, ngelaṅ bo nu, nto' nebum nà, bo te mi a ke' gho' mbwô là; wù, o lé' mbwô ndu' tà nse' nkum ndonni.

¹¹ Yen ni b'a mbwe nsà ze Yésu ghù là, mà Kana ngô Galiléa; a tswite nkuni mi, ghazi'te nu i bam i.

¹² Yen nà lo be tshùa, Yésu lo bwe nswe' nèn mà Kapernaum boa màab, fèt tse mba ghazi'te nu i, bo tswe bwe lé'njù ke nsag.

Yésu mà Yérusalém. Nelànte ndà Nsi

¹³ Pasa ba Yuda lo be ghebte, Yésu ko' nèn Yérusalém.

¹⁴ A tèt ghaswèn mfô, njùmbwe mba bwoṅsaṅe, mba ghabate nkàb ntùm ndà Nsi, ndù bo tete ndiaṅ bwe.

¹⁵ A nabte shua' mvèt, nta' njoṅ yub fa yi ntùm ndà Nsi; a ta' njùmbwe mba mfô, nsate nkàb ghabate nkàb, ntèn téblé mub ntamte nsi,

¹⁶ ntshob ghaswèn bwoṅsaṅ ndù: Bin lo' tshen nà ntum yi nsen ni, kà bin ghù ndà Tàa kaṅ ntù' ndà ntàne.

¹⁷ Ghazi'te nu i kwimte ndù bo lo kite ndù: Nkôni num ndà o nsi mi àm.

¹⁸ Ndùlala, ba Yuda bùnte, ntshob yi ndù: O ke nda't'a ke lèn nsà bag kà nke ngù ndùlal'à?

¹⁹ Yésu ntshob bo ndù: Bin sate yen ndà Nsi li me nsi bèn bù't'é lé'njù tat!

²⁰ Ba Yuda bèn ntshob ndù: Bo lo yab ngu'njù ntshob ntôg ṅam nkuà nekut yen ndà Nsi li, wù, o nsi bù't'é lé'njù tat!

²¹ Là Yésu ke ntshob ndà Nsi à tu wul i.

²² Ngelaṅ Yésu lo num vù là, ghazi'te nu i kwimte ndù a lo ke ntshob yen nu là. Bo bam ṅwa'ni Nsi mba ntshob mi Yésu tshob là.

²³ Ngelaṅ a be Yérusalém num Pasa, mum lé'njù jùa là, benntùn be yen nsà ts'a ke ngù là, mbam lén se.

²⁴ Là Yésu ke fà wul i num bo, nummbe a lo lèn njoṅ yub fa.

²⁵ A lo ke kô ndù mèn kwé nta mènntùn, nummbe tu wul i lo lèn ju z'a be ntùm ntù mènntùn nà.