Ju z'a ntùm bwe là
A na' ke ntù' ngu'njù nkù sammbàa kà bo bwe Yésu Kristô, ngelaṅ ze Habakuk na' miagte netshob ze ntshob Nsi là, Sofoni ṅwag ze. Ngelaṅ ze Sofoni to' nesoṅ Nkùn Mebwô là, ndù mfen Yosias ke' yoṅ ntsiagte ze mat netshob Nu Nsi mebwô, a bèn mbe yen ngelaṅ nà ngô Yuda b'a ntùm neta nge' (2 Fenfen 23.1-28). Mi Ntshob Nsi Sofoni b'a nelo' mbùnte ntshob benntùn tse bo ke mbètte mbe Nsi num bwe nke ntshagte benntùn boa tshô yub ké di là. Sofoni soṅ yub bon manze tse Nsi num ntshùa bwe njôg yub là yàme.
Nsi nsi se' tsho'te ba Yuda mba ba Yérusalém (1.1—2.3), a nsi sate benntùn tse boa ba Yuda tam ndùla' là (2.4-15), yen nà be tshùa, a biagte nukebwô Yérusalém mbèn nkul i kut nzwe, kà ntù' faṅ à ben tse bo be ghafà wut nsi mbèn mbe ba bwoṅ nà ntùm ngô (3.1-20)
Sofoni tshob ben Nsi mbe bo ke' ku' nebe ntshu ntshù' boa Nsi, a be ze bo ke' ta' njoṅ ben fa tse bo num mbwôgmbwe nkô à yub ju, kà njôg mbèn nkô ze nekô Tshùaben nà. Là, nsoṅ yub mba ntù i bwô num bon ngô tse bo num mfà wut tshob nsi là (2.3, 3.12).
