- फिलिप्पियों 4 - Bundeli Holy Bible

¹ ईसे भईया हरौ, जिन पै मोरो जी लगो रैत आय, जिन हां मैं चाहत आंव और मोरी लालसा आय, कि बे मोरी खुसी आय, और मोरी चाहना आय, कि तुम पिरभू में पक्के बने रओ।

² मैं यूओदिया और सुन्तुखे हां सोई समझात आंव, कि बे पिरभू में एक मन से रैबें।

³ और मोरे भले जनो जिन ने मोरे संग्गै सेवा करी आय तुम से बिनती करत आंव, कि तुम उन बईयरन को हाथ बटाओ, जौन मोरे संग्गै सुसमाचार के परचार में लगी रईं, उन ने मोरे और क्लेमेंस के संग्गै मिलके बहुत काम करो, उन के नाओं जीवन की पोथी में लिखे आंय।

⁴ पिरभू में हमेसा खुस रओ; मैं फिन कैत आंव कि खुस रओ।

⁵ तुमाए भले जीवन से सबरन हां पता चले, कायसे पिरभू झट्टई आबेवारे आंय।

⁶ कोई बात की चाहना न करो: परन्त हर एक बात में अपनी बिनती धन्न मान के परमेसुर से करो।

⁷ अब परमेसुर की सान्ति, जौन मान्स की समझ के बायरें आय, तुमाए मन और तुमाए सोच हां पिरभू यीशु मसीह में बचाए राख है।

⁸ सो भईया हरौ, जौन बातें सांची आंय, और जौन साजी आंय, जौन पवित्तर और अच्छी आंय, और मन हां भाती आंय, सो जौन बातें कहबे लाक होबें, उनईं पै ध्यान धरो।

⁹ जौन बातें तुम ने मोय से सुनी, सीखी, और अपने हिये में धरीं आंय, उनईं जैसो करो, ऐसो करबे से परमेसुर जौन सान्ति देत आय तुमाए संग्गै रै है।

¹⁰ मैं पिरभू में बहुतई खुस आंव बिलात दिना के बाद तुम हां मोरी याद फिन के आई; पेंला सोई तुम हां चिन्ता हती, परन्त तुम जा चिन्ता न दिखा पाए।

¹¹ मैं ऐसो ई लाने नईं कै रओ कायसे मोहां पईसन की जरूरत आय; मैंने तो सीखो आय कि जैसो हो, ओई हाल में खुस रओ।

¹² मैंने पईसन की कमी और बहुत पईसन देखो आय: मैंने जैसो हाल होबै ऊ में खुस रैबो सीखो आय, चाहे खीब खैबे हां होबै चाहे भूखे रैबें, बिलात होबे और कछु न होबे।

¹³ मैं ऊ परमेसुर के जोर से सब कछु कर सकत आंव।

¹⁴ जा तुमाई भलमनसाहत आय, कि मोरी कमी में तुम ने मोरी मदद करी।

¹⁵ फिलिप्पियों के रैबेवारे जौ अच्छे से जानत आंय, कि परचार करत जब मकिदुनिया से चलो तो पईसा के लैबे दैबे में कोई मण्डली ने मोरी मदद नईं करी, परन्त तुम ने मोरी कमी पूरी करी।

¹⁶ और ऊं सई जब मैं थिस्सलुनीके में हतो; तबै सोई तुम ने मोरी घटी में एक बेरा नईं परन्त दो बेरा कछु पईसा भेजे हते।

¹⁷ जौ नईंयां कि मोहां कछु चईये परन्त मैं चाहत आंव कछु ऐसी बातें, जौन से आगे हां तुमाओ फायदा होबे।

¹⁸ मोरे लौ सब कछु आय, और बिलात सोई आय: जौन बस्तें तुम ने इपफ्रुदीतुस के हाथन पठैई हतीं बे मोहां बहुतई साजी लगीं, बे मानो ऊ बली जैसे आय, जी की गन्ध और बलदान से परमेसुर खुस होत आय।

¹⁹ मोरो परमेसुर तुमाई सबरी घटी हां अपने जस के धन से पिरभू यीशु मसीह के नाओं से पूरी कर है।

²⁰ अब हमाए परमेसुर और पिता को जस बिरोबर बनो रैबे। आमीन।

²¹ सब बिसवासी जन हां यीशु मसीह के नाओं से नमस्कार कईयो। जौन भईया हरें मोरे संग्गै आंय, तुम हां नमस्कार कैत आंव।

²² और सब बिसवासी जनें, और राजा कैसर के घर से तुम हां नमस्कार कैत आंय।

²³ हमाए पिरभू यीशु मसीह तुमाई आत्मा के संग्गै बने रैबें। आमीन।