फिलिप्पियो 4 - पहाड़ी महासुई1 ओ मैरै प्यारै साथी विश्वासिउओ, हाऊं तुमु आइलै भौरी प्यार कौराऊ और तुमु कु मिलणौ च़ाहा ऊ, ज़ो मेरी बौड़ी खुशी और इनाम ई। एथीलै ओ मैरै प्यारै साथी विश्वासिउओ, प्रभु रै विश्वासा दी इणै मज़बूत रौऔ। आपसी मेल मिलापा रै बारै दी बोलणौ 2 हाऊं यूओदिउ भी सौमझ़ावा ऊ और सुन्तुखे लै भी हौसलौ दियाऊ, कि सै प्रभु दी मिली-ज़ुलियौ रौआ। 3 ओ सौच़्च़ै साथी, हाऊं तांउकु भी औरज़ कौराऊ कि तू तिऊं छ़ेउड़ी री मज़द कर कि सै भी मिली-ज़ुलियौ रौआ, कैलैकि तिंउऐ मुं आइलै खुशी री खौबर फैलाउणा दी, क्लेमेंस और मैरै दुजै गोश्टणु आइलै मैहनत की ई आ, तिऊं सारेऊ रै नाऊं ज़िन्दगी री किताबी दी लिखै औन्दै। 4 प्रभु दी सौदा खुश रौऔ। हाऊं तुमुलै तौंइऐ बोलाऊ, खुश रौऔ। 5 तुमारौ कौंउल़ौपन सौभी लोगु माथै पौगड़ौ हुआ। प्रभु रौ वापिस आशणौ नज़दीक आ। 6 केज़ी भी बुशु री फिकर नाईं कौरौ। पर हर एक हालती दी तुमारै निवेदन, प्राथना और औरज़ा रै ज़ौरिऐ धन्यबादा आइलै परमेश्वरा काऐ देईया। 7 तैबै परमेश्वरा री शान्ति, ज़ो आदमी री सारी सौमझ़ा कु बाइरै आ, तुमारौ मन और तुमारौ बिच़ार मसीह यीशु दी बौच़ाई छ़ाड़ाई। 8 एथीलै आखरी दी, ओ मैरै प्यारै साथी विश्वासिउओ, तुमै आपणौ ध्यान तिऊं बुशु माथै लाऔ, ज़ो-ज़ो बुशै सौच़्च़ी ई, और इज़्ज़त वाल़ी ई, और भौली ई, और पवित्र ई, और बुशै आच़्छ़ी ई, और ज़िवा दी आच़्छ़ी लागणै वाल़ी ई। तिऊं बुशु रै बारै दी भी सुंच़ौ ज़ो भौरी आच़्छ़ी और बौड़ाई री। 9 ज़ो बुशै तुमुऐ मुकु शिखी, और मानी, और शुणी, और मुंदी देखी ई, तिऊंरौ पालन कौरौ, तैबै शान्ति रौ परमेश्वर तुमु लोगु आइलै रौआ आ। दाणा लै धन्यबाद 10 हाऊं प्रभु दी भौरी खुश ऊ कि आबै एती दिना बासिऐ तुमारै ज़िवा दी मुलै पैसै भेज़णै रौ तौंइऐ बिच़ार आशै। सौच़्च़ी तुमुकै शुरु दी भी एथरी फिकर थी, पर तुमुकै एथरौ मौकौ नाईं मिलौ। 11 इणौ नाईं कि हाऊं आपणी ज़रुरता री वज़ाह कु इणौ बोलाऊ। कैलैकि मुंइऐ इणौ शिखौ आ कि ज़ेज़ै हालता दी ई, तेसी दी खुशी कौरु। 12 हाऊं भौरी कामती दी भी ज़िन्दगी ज़िवी सौका ऊ। ज़रुरता कु ज़ादै दी भी ज़िउणौ ज़ाणाऊ। भुखौ रौउणौ, और बौड़णौ-घौटणौ, हर एक बूश और सौभी हालती दी मुंइऐ ज़िउणौ शिखी गौ आ। 13 मसीह रै ज़ौरिऐ ज़ुण मुलै शक्ति दिआ सा तेसदी हाऊं सारौ कुछ़ कौरी सौका ऊ। 14 तैबै भी तुमुऐ आच़्छ़ौ किऔ आ कि मुकै पैसै भेज़ीयौ मैरै दु:खा दी साज़ी हुऐ ई। 15 ओ फिलिप्पिऊ रै लोगुओ, तुमै आपु भी ज़ाणाई कि खुशी री खौबर ज़ो तुमुकै शुरु कु शुणाई और ज़ेबी हाऊं मकिदुनीया परदेशा कु डैऔ थौ, तैबै सिरफ तुमारी ई कलिसिया रै लोगुऐ लेण-देणा रै बारै दी मेरी मज़द की आ। 16 इणै कौरी ज़ेबी हाऊं थिस्सलुनीके दी थौ, तैबै भी तुमुऐ मेरी ज़ुरत पुरी कौरना लै कई बारै पैसै भेज़ै थै। 17 हाऊं इणौ नाईं बोलदौ कि हाऊं पैसैऊ री मज़द च़ाहा ऊ, पर हाऊं इणौ फल़ च़ाहा ऊ ज़ो तुमारै फाइदै लै बौड़दै रौआ। 18 मुकै सारौ कुछ़ आ, पर भौरी का भी आ। ज़ो च़िज़ै तुमुऐ इपफ्रुदीतुसा रै हाथा कु भेज़ी थी तिऊं नीईंयौ हाऊं डौटी गो ऊ, सै च़िज़ै ता सुखवाल़ी खुशबु ज़िणी, और अपणाउणै रै लायक बौल़ी ई, ज़ो याजक परमेश्वरा कै च़ौड़ावा ई, ज़ास परमेश्वर अपणावा आ और खुश हुआ आ। 19 मैरौ परमेश्वर भी आपणै तेस धना रै मुताबिक ज़ो महिमा समेत मसीह यीशु दी आ, तुमारी हर एक ज़ुरत पुरी कौरा आ। 20 आमारौ परमेश्वर और बाबा री महिमा जुगा-जुगा झ़ांऊ औन्दी रौआ। आमीन। आखरी ढाल 21 यीशु मसीह रै सारै परमेश्वरा रै पवित्र लोगु लै मेरी तौरफा कु ढाल कौरौ। ज़ेज़ै विश्वासी भाई मुं आइलै ई, तुमुलै ढाल कौरा ई। 22 सौभी परमेश्वरा रै पवित्र लोग ज़ो इदै ई, खास कौरीऐ ज़ो कैसर राज़ै रै घौरा रै विश्वासी ई, तुमुलै ढाल कौरा ई। 23 आमारै प्रभु यीशु मसीह री बौड़ी दया तुमु आइलै सौदा रौआ। आमीन। |
This work is licensed under Creative Commons Attribution-ShareAlike 4.0 License.