इफिसियों 2 - पहाड़ी महासुईमौउता कु ज़िन्दगी भिलै 1 तिणीऐ तुमै भी ज़िउंदै कियै, ज़ुण आपणै बुरै काम और पापा कौरी मौरै औन्दै थै 2 ज़ासदी तुमै पैहलै इऐं धौतरी री रीती माथै, और आसमाना रै हक्का रै आफसर मतलब सेज़ी बुरी आत्मा रै मुताबिक च़ाला थै, ज़ुण आबै भी हुकम नाईं मानणै वाल़ेऊ मांझ़िऐ काम कौरा ई। 3 एक बौगत इणौ थौ ज़ेबी आमै भी तिऊं मांझ़िऐ थै और बुरै कामा दी मगन रौआ थै, शरीर और मौना री इच़्छ़ा पुरी कौरणै दी लागै औन्दै दुजेऊ बाशीऐ रोशा री सन्तान थै। 4-5 पर परमेश्वर भौरी दया वाल़ौ आ! आमै सौभी आपणै पापा री वज़ाह कु मौरी गौऐ थै, पर परमेश्वरै आमु आइलै भौरी प्यार कियौ कि तिणीऐ आमै मसीह आइलै ज़िउंदै किऐ, और परमेश्वरै आमै तिऐं बौड़ी दया कौरी बौच़ाऐ ज़ेथरै आमै लायक नाईं थै। 6 परमेश्वरै आमै यीशु मसीह दी ज़िउंदै किऐ और सौरगा री ज़ागाह दी तेस आइलै बोशाल़ै; 7 परमेश्वरै इणौ एथीलै कियौ कि सेऊ आशणै वाल़ै बौगता दी, दुनिया रै लोगु कै देखा ई सौका कि तेसरी बौड़ी दया केती महान आ। आमै यीशु दी एक ई ज़ो कुछ़ तिणीऐ आमुलै कियौ आ तेथदी तिणीऐ बौड़ी दया देखाल़ी आ। 8 कैलैकि ज़ेबी तुमुऐ विश्वास कियौ ता परमेश्वरै तुमै आपणी बौड़ी दया कौरी बौच़ाऐ ई। तुमारी तौरफी कु नाईं, बल्कि परमेश्वरा रौ दैऔ औन्दौ दाण आ। 9 इणौ तुमारै आच़्छ़ै काम कौरणै री वज़ाह कु नाईं हुऔ एथीलै तुमै घमण्ड नाईं कौरौ। 10 कैलैकि आमै तेसरै चाणै औन्दै ई, और मसीह यीशु दी तिऊं भौलै कामा लै, ज़ेज़ै परमेश्वरै पैहलै कु आमुलै कौरना लै ई चाणै औन्दै। मसीह दी एक 11 एज़ी वज़ाह कु इणौ याद छ़ाड़ौ कि तुमै ज़नमा कु दुजी ज़ाती रै ई, और यहुदी तुमारौ मज़ाक कौरा ई कैलैकि तुमारौ खतनौ नाईं हुऔ और सै ई खतनै वाल़ै। पर तिऊंरौ सेऊ रिवाज़ सिरफ तिउंरै शरीरा दी लागु हुआ आ। 12 तुमै सेज़ै बौगता दी यीशु मसीह नाईं ज़ाणा थै और तुमै परमेश्वरा रै चुनै औन्दै लोगु इस्राइली लोग नाईं थै, और परमेश्वरै यहुदी लोगु लै ज़ो आशीषै दैणै रौ वायदौ थौ कियौ औन्दौ तुमै तेथरै भागी नाईं थै। तुमै इऐं दुनिया दी बिण आशा रै और बिणा परमेश्वरा रै थै ज़िउंदै लागै औन्दै। 13 पर आबै यीशु मसीह दी तुमै ज़ुण पैहलै दूर थै, मसीह रै लोऊ कौरी नज़दीक हुई गौऐ ई। 14 कैलैकि सेऊ आमारौ मिलाउणै वाल़ौ आ, ज़ुणिऐ दुइया एक किऐ ई और अलग कौरणै वाल़ी द्वाल ज़ेज़ी यहुदी और दुजी ज़ाती रै बौच़ाई थी ढाल़ी गोई आ, 15 और आपणै शरीरा रै दुश्मन मतलब सेज़ै नियम ज़ासरौ हुकम नियमा री रीती माथै थौ, मिटाई गौऐ कि दुइया कु आपु दी एक नौंवौ चाणीऔ मिलावा, 16 और क्रुसा माथै दुश्मनी नाश कौरीयौ एथ कौरीऐ दुइया दी एक शरीर चाणीऔ परमेश्वरा कु मिलावा। 17 मसीहीऐ आशीयौ तुमु दुजी ज़ातीऊ रै लोगु कै ज़ुण परमेश्वरा कु दूर थै, और यहुदी लोग ज़ुण नज़दीक थै, दुइया लै मेल-मिलाप और शान्ति री खौबर शुणाई आ। 18 कैलैकि मसीह री वज़ाह कु आमै सारै सेज़ी पवित्र आत्मा रै ज़ौरिऐ बाबा काऐ आशी बौल़ा ई। 19 एथीलै तुमै दुज़ी ज़ाती वाल़ै आबै परदेशी और बौटैणु नाईं रौऐ, पर पवित्र लोगु रै साथी वासी और परमेश्वरा रै टौबर हुई गौऐ। 20 तुमै प्रेरितु और भविष्यवक्ताऔं री पौई माथै चाणी ऐन्दी द्वाल ई, ज़ेथरै कुणै रौ पात्थर यीशु मसीह आपु आ। 21 मसीह दी सारै चाणै औन्दै कौठै मिलियौ प्रभु दी एक पवित्र परमेश्वरा रौ घौर बौणा आ, 22 ज़ेथदी तुमै भी पवित्र आत्मा कौरी परमेश्वरा री रौइणै री ज़ागाह हुणा लै कौठै चाणियाई। |
This work is licensed under Creative Commons Attribution-ShareAlike 4.0 License.