कुलुस्सियों 2 - पहाड़ी महासुई

¹ हाऊं च़ाहा ऊ कि तुमै ज़ाणालै, कि तुमारै और तिऊं रै ज़ो लौदीकिया इलाकै दी आ, और तिऊं सौभी कालै ज़ुणिऐ हाऊं नाईं देखौ, कि हाऊं किणी मैहनत कौराऊ।

² मुइंऐ मैहनत एथीलै कि ताकी तिऊंरौ विश्वास बौड़ा और सै प्यारा दी आपु मांझ़िऐ कौठै रौआ, हाऊं च़ाहा ऊ कि सै पुरौ भरोसौ छ़ाड़ा कैलैकि तिउंकै परमेश्‍वरा रै छ़ुपै औन्दै राज़ा री पुरी सौमझ़ आ ज़ो यीशु मसीह आपु आ।

³ ज़ासदी औकल और ज्ञाना रै सौभी भण्डार ई छ़ुपै औन्दै।

⁴ एऊ हाऊं एथीलै बोलाऊ, कि कोई आदमी तुमु आपणी झ़ुठी शिक्षा माथै विश्वास कौरना लै राज़ी ना कौरा।

⁵ कैलैकि हाऊं तुमु कु दूर ऊ, तैबै भी हाऊं तुमारै बारै दी सुंच़दै थाकाऊ लागी, और हाऊं खुश हुआ ऊ कि ज़िणौ तुमुऐ ज़िउणौ च़ांई थौ तिणी ज़िवा ई और तुमारौ विश्वास मसीह दी पाकौ आ।

मसीह दी ज़िन्दगी री भरपुरी

⁶ तैबै ज़िणौ तुमुऐ यीशु मसीह प्रभु कौरीयौ मानी गौ आ, तिणी ई लगातार तेस पिछ़ु हाण्डदै रौऔ।

⁷ और तेसी दी ज़ौड़ी पाकड़ियौ और बौड़दै रौऔ। और ज़िणौ तुमुलै शिखाऔ औन्दौ आ तिणी ई विश्वासा दी पाकै औन्दै रौऔ, और भौरी धन्यबाद कौरदै रौऔ।

⁸ खौबरदार रौऔ कि कोई तुमु तिऊं बेकार बुशेऊ रै ज़ौरिऐ मुर्ख ना चाणा। इऐ बुशै शुणना लै ता ज्ञाना री लागा ई पर इऐ बुशै ता सिरफ धौतरी रै लोगु री तौरफा कु ई ना की मसीह री तौरफा कु।

⁹ कैलैकि मसीह रै इन्सानी शरीरा दी परमेश्‍वरा रै सारै गुण पाइआ ई।

¹⁰ और मसीह सण्सारा रै परधानता और हक्‍का माथै राज़ कौरा आ। और अगर तुमै मसीह आइलै ई ता तुमै तेसदी पुरै ई

¹¹ मसीहै भी तुमारै पाप वाल़ौ च़ाल-च़लण तुमु कु दूर कियौ ज़िणौ की खतनौ कौरणै रै बौगता दी थोड़ौ मांस शरीरा कु पोरु गाड़ाई।

¹² ज़ेबी तुमुऐ बपतिस्मौ नियौं ता तुमै मसीह ज़िणै दाबुऐ, और नौऐं च़ाल-च़लणा आइलै मसीही ज़िणै मौरै औन्दै मांझ़िया कु ज़िउंदै हुऐ ई। एऊ एथीलै हुऔ कैलैकि तुमुऐ परमेश्‍वरा माथै विश्वास कियौ कि तिणीऐ मसीह आपणी शक्ति रै ज़ौरिऐ मौरै औन्दै मांझ़िया कु ज़िउंदौ कियौ आ।

¹³ ज़ेबी तुमै आपणै गुनाह बिण खतना रै बपतिस्मा कु पैहलै तुमारौ आच़्छ़ौ च़ाल-च़लण मौरौ औन्दौ थौ परमेश्‍वरै तुमारै सारै गुनाह माफ कौरीयौ तुमै मसीह आइलै ज़िउंदै कौरी गौऐ।

¹⁴ परमेश्‍वरै सै गुनाह रै आरोप क्रुसा माथै परेगै लाइयौ मिटाई गौऐ ज़ो मुसा रै नियम नाईं मानणै री वज़ाह कु आमुदी थै लागै औन्दै।

¹⁵ और तिणीऐ मसीही रै क्रुसा माथै मौरणै रै ज़ौरिऐ सण्सारा रै अधिकारी और हुकुमत हौराइयौ सै सारेऊ मांझ़िऐ बेइज़्ज़त किऐ, और तिऊंकु ज़ीतीयौ बौड़ी खुशी मौनाई।

¹⁶ एथीलै कोई भी तुमारौ इणै बोलीयौ, कि तुमुऐ का खाणौ-पिणौ आ, या साज़ौ मौनाउणौ, या नौईं ज़ुना रौ साज़ौ मौनाउणौ, या आरामा रै दिना रै बारै दी फैसलौ ना कौरालौ।

¹⁷ कैलैकि इऐ सौभी नियम छ़ांई ज़िणै ई, पर सौच़्च़ाई ता मसीह दी आ।

¹⁸ केज़ौ आदमी ज़ुण झ़ुठौ निउल़ौपन और सौरगदूता री पुज़ा दी आ लागौ औन्दौ, तुमु तुमारै इनामा कु दूर ना कौरा। इणौ आदमी दर्शण देखणै दी आ लागौ औन्दौ। पर एऊ सब बकवास आ कैलैकि तिउंरै दिमाग मतलबी इच़्छ़ा कौरी भौरुऐ औन्दै।

¹⁹ और सै लोग यीशु मसीह आइलै मिलियौ नाईं रौउंदै ज़ुण पुरै शरीरा रौ मूंड आ। ज़िणौ मूंड पुरौ शरीर च़ौलावा तिणी ई यीशु मसीह आपणै सारै लोगु च़ौलावा, ताकी सै मिली-ज़ुलियौ कौट्ठै रौआ और बौड़दै रौआ, ज़िणौ शरीरा री सारै ज़ोड़ और नौसै शरीर पाकड़ी छ़ाड़ाई और परमेश्‍वरा री तौरफा कु बौड़दै थाका ई लागी।

मसीह आइलै मौरणौ और ज़िउंणौ

²⁰ ज़ेबी ओउलै तुमारौ पाप वाल़ौ च़ाल-च़लण मसीहा आइलै मौरी गौ आ, ता तुमुकै इऐं दुनिया रै नियमा रौ पालन कौरणै री कोई ज़ुरत नाईं आ। एथीलै आबै भी तुमै इऐं दुनिया रै नियम कैलै माना ई, एथ कौरी लागा कि तुमै औज़ौ भी दुनिया रै बौशा दी ई।

²¹ ज़िणौ कि “एऊ नाईं छ़ूंइणौ,” “तेस नाईं च़ाखियौ,” और “तेसदी हाथ ना लाइयौ।”

²² कैलैकि इऊं सारै नियम बार-बार इस्तेमाल कौरीयौ कोई फाइदौ नाईं। कैलैकि इऐ लोगु रै हुकमा और शिक्षा रै मुताबिक ई।

²³ इऐ नियम एक ठीक बाटा दी निणै वाल़ै ज़िणै दिशा ई, सै इऐ ई, ज़ौबरिऐ सै परमेश्‍वरा री भौक्ती रै ज़ौरिऐ, तिउंरी देखाउटी निउल़ौपन और सै आपणै शरीरा आइलै बुरौ बरताव कौरा ई, पर इदरा झ़ाऊं कि ज़ेबी लोग इऊं नियम माना ई तैबै भी लोग आपणै पाप वाल़ौ च़ाल-च़लण नाईं रोकी बौल़दै।