फिलिप्पि 3 - बारेली पावरी

जीवनोन लक्ष

¹ इनान कोरता हे मारा भाशो, प्रभूमा खुशीमा रोयू. चेत वाते तुमु काजे घोळी-घोळी लिखनेमा मेसे काजे ते काय तोकलीत नी होयतो, एने तीनामा तुमरो वारलो छे.

² कुत्रा सी हुशारीमा रोयू, तीनु भुंडला काम कोरणे वावासी हुशारीमा रोयू, तीनु काटने वावा गोथा हुशारीमा रोयू.

³ काहाकि सुंता वावा ते आमुत छे जी परमेश्वरोन आत्मान ओगवाईसी आराधना कोरतेला, एने मसिह येसु पोर मोटाय कोरतेला छे, एने डीलोपोर भुरसू नी कोरतेला.

⁴ बाकीन मे ते डीलोपोर बी भुरसू मेक सोकतलु. अगर काहनास दिसरा काजे डीलोपोर भुरसू मेकनेन विचार होय ती मे तीनासी बी बोढीन मेक सोकतलु.

⁵ आठवे दाहळे मारी सुंता होयी इस्राईलोन पिढी, एने बिन्यामीनोन पिढीन छे; इब्रानिन इब्री छे; शास्त्रनियम नुसार अगर मे कोयो ती फरुशी छे.

⁶ तीहीवारोन बारामा अगर कोये ती मंडवीक वेला पाळावने वावू; एने शास्त्रनियमोन धारमिकतान बारामा अगर कोये ती निरदोष होतु.

⁷ बाकीन जी-जी वाते मारा फायदान होती तिनी काजे मे मसिहन वजेसी नुकसान सोमजी लेदलु.

⁸ नीती मे आपना प्रभू येसु मसिहन उवखनेन बारामा वारलान वजेसी मे आखा चीजोन नुकसान सोमोजतलु. जेरे कारण मे आखा चीजोन हानी उठावलु छे एने तीनुक कोचरू सोमजतेलु, जेरेसी मे मसिह काजे ली लेदू.

⁹ एने तीनामा जोळो नी कि आपना धारमिकता साते जी शास्त्रनियमोसी छे बाकीन तिना धारमिकता साते जू मसिह पोर भुरसू कोरनेन वोजेसी एने परमेश्वरोन भूनी गोथो भुरसू कोरनेसी जोळतली छे.

¹⁰ काहाकि मे तीना काजे एने तिनान मोरनोन जीव उठनेन ताकत काजे एने तेरे साते दुखोमा सहभागी होयनेसी तेरा भेद सोमजू एने तेरी मोरनोन समानता काजे हासील कोरो.

¹¹ कि मे काहनली रितीसी मोरलामा गोथा जीव उठनेन जागेत पुगो.

निशाणी वोखे जाणो

¹² यो मतलब नी कि मे लेदलु छे नीती पाको होय गोयलो छे; बाकीन तिना चीजो काजे धोरणेन कोरता दोवळीन जाये कोरतेलु जिनान कोरता मसिह येसुन मेसेक धोरतू होतु.

¹³ हे भाशो मारो विचार यो नी कि मे धोर लेदलु छे; बाकीन निसतो यो कि जी वाते पोछोव रोय गोयली छे तीनाक विसरीन ओगली वाते भूनी बोढ जाम.

¹⁴ निशाणी भूनी जाया कोरो काहाकि चो इनाम लेये जिनान कोरता परमेश्वर मेसे काजे मसिह येसुमा उपोर बुलावलो छे.

¹⁵ आपना गोथा जोतरा तीयार कोरला छे योत विचार राखे, एने ओगर काहणी वातोमा तुमरू ओवी दिसरू बी विचार होय ती परमेश्वर तीना काजे तुमरे पोर प्रगट कोर देसे.

¹⁶ इनान कोरता जा तोक आपनु पुगला छे, तिनान अनसारे चाले.

सोरगोमा आपना नागरिकता

¹⁷ हे भाशो तुमु आखा मेवीन मारेन तोसा चाल चालु एने तीनुक उवखी लेवू जे इनी रिती पोर चालतला छे जेरो उदाहरण तुमु आमरेमा देखला छे.

¹⁸ काहाकि घोणा सोवटा ओसी चाल चालतला छे, जेरी वात मे तुमु काजे घोळी-घोळी कोयलु छे, एने हिमी बी रोडी-रोडीन कोयो कि चे आपनी चाल-चालने सी मसिहन ख्रुसोन रीसावा छे.

¹⁹ तिंदरो आखरी नाश छे एने धोरतीन चीजो पोर मोन लागाळला रोयतला छे.

²⁰ बाकीन आपनो देस सोरगोमा छे; एने आपनु छुटकारू आपन्यु प्रभू येसु मसिहनचा गोथो आवनेन वाट जुवतला छे.

²¹ चू आपनी ताकतोन तिना असर सी जिनान लारे चे आखा चीजो काजे आपना हातोमा कोर सकतला छे, आपनी कोमजोर डीलोन रूप बोदलावीन आपनी महिमान डीलो सारका बोनाव देसे.