Mapisarema 99 - Bhaibheri Dzvene MuChiShona Chanhasi

Pisarema 99

¹ Jehovha anobata ushe, ndudzi ngadzidedere; anogara pachigaro choushe chiri pakati pamakerubhi, nyika ngaizungunuke.

² Jehovha mukuru paZioni; iye akasimudzirwa pamusoro pendudzi dzose.

³ Ngavarumbidze zita renyu guru rinotyisa, iye mutsvene.

⁴ Mambo mukuru, anoda kururamisira, imi makasimbisa kururama; muna Jakobho makaita kururamisira nokururama.

⁵ Kudzai Jehovha Mwari wedu nokunamata pachitsiko chetsoka dzake; iye mutsvene.

⁶ Mozisi naAroni vakanga vari pakati pavaprista vake, Samueri akanga ari pakati paavo vaidana kuzita rake, vakadana kuna Jehovha akavapindura.

⁷ Akataura kwavari ari mushongwe yegore; vakachengeta zvaakatema nemitemo yaakavapa.

⁸ Haiwa Jehovha Mwari wedu, imi makavapindura; makanga muri Mwari anokanganwira kuna Israeri, kunyange makavaranga pane zvavakaita.

⁹ Kudzai Jehovha Mwari wedu mumunamate pagomo rake dzvene, nokuti Jehovha Mwari wedu ndiye mutsvene.