Mapisarema 98 - Bhaibheri Dzvene MuChiShona Chanhasi

Pisarema 98

Pisarema.

¹ Imbirai Jehovha rwiyo rutsva, nokuti akaita zvinhu zvinoshamisa; ruoko rwake rworudyi nechanza chake chitsvene zvakamukundisa.

² Jehovha akazivisa ruponeso rwake uye akaratidza kururama kwake kundudzi,

³ Akarangarira rudo rwake nokutendeka kwake kuimba yaIsraeri; migumo yose yenyika yakaona ruponeso rwaMwari wedu.

⁴ Danidzirai nomufaro kuna Jehovha, imi nyika yose, imbai nziyo mupembere nomufaro;

⁵ imbirai Jehovha nembira, nembira nenzwi rokuimba,

⁶ nehwamanda nokurira kworunyanga rwegondobwe, danidzirai nomufaro pamberi paJehovha, iye Mambo.

⁷ Gungwa ngaritinhire, nezvose zviri mariri, nenyika, navose vanogaramo.

⁸ Nzizi ngadziuchire maoko adzo, makomo ngaaimbe pamwe chete nomufaro;

⁹ ngaaimbe pamberi paJehovha, nokuti anouya kuzotonga nyika. Achatonga nyika zvakarurama navanhu nokururamisira.