Mapisarema 76 - Bhaibheri Dzvene MuChiShona Chanhasi

Pisarema 76

Kumutungamiri wokuimba nomutengeranwa une hungiso. Pisarema raAsafi. Rwiyo.

¹ Mwari anozivikanwa muJudha; zita rake iguru muIsraeri.

² Tende rake riri muSaremu, ugaro hwake paZioni.

³ Ndipo paakavhuna miseve inovaima, nhoo neminondo, izvo zvombo zvokurwa. Sera

⁴ Imi makashongedzwa nechiedza, kupfuura makomo akapfuma nemhuka.

⁵ Varume vakashinga vakavata pasi vapambwa, vakavata hope dzavo dzokupedzisira; hakuna mumwe wavarwi angasimudza maoko ake.

⁶ Pakutuka kwenyu, imi Mwari waJakobho, zvose bhiza nengoro zvinovata zvakati mwiro.

⁷ Imi moga ndimi munofanira kutyiwa. Mukatsamwa, ndianiko angamira pamberi penyu?

⁸ Muri kudenga makazivisa kutonga kwenyu, uye nyika yakatya ikanyarara,

⁹ haiwa Mwari, pamakasimuka kuti mutonge, kuti muponese vanonetswa vose venyika. Sera

¹⁰ Zvirokwazvo hasha dzenyu pamusoro pavanhu dzinokuvigirai kurumbidzwa, uye vanosara pahasha dzenyu vachadziviswa.

¹¹ Itai mhiko kuna Jehovha Mwari wenyu mugodzizadzisa; nyika dzose dzakakupoteredzai ngadzivigire zvipo kuna Iye anofanira kutyiwa.

¹² Anoputsa mweya yavatongi; anotyiwa namadzimambo enyika.