Yd 9 - Kalate Zambe Nnomo a Mfefe Mfefé Nkôñelan

Meye'elan me Yudit

¹ Yudit a nga ku asu e butu nye si, a nga woban asub e nlô a liti nkuta a nga be'e, awolo ebien be nga di'i ôtu ya ngô'é éte e *nda Zambe Yérusalem. A nga yône tyiñe ngu e be Nti a jô'ô na:

² A Nti, e Zamba ésaa wom Siméoñ, nyô ô nga futi nkpwaté mekôn e wo wé été asu ya bo akuna'a e be besiñ mbe be nga bi kale jé é mbe mongô a ngu, a samele nye éyoñ be nga vaa nye mengômesan a fulane nye. Ô nga ve atiñe na: Nalé a ye bo te boban Israél été, ve be nga bo nalé.

³ Ajô te ô nga ve bivete biab bi wu a énoñe jap, amu é mbe njalan a ôsone ya medu'ane map, ô nga ve je e medu'an ma kui metyi. Ô nga bibi alo e fefele mingungule mi bôt a mingungule mi bôt e bito minjôane biabe yôp.

⁴ O nga kañese na binga bab be saaban, bengo babe ke be ke minkôm, a mimbime miab ke mi kabaan e zañe bone bôé wo dañe nye'e mbe ba dañe nye'e wo a *aban ese, a mbe be nga wô'ô mvine jôme ya metyi mab angôndô, a be nga loone wo na ô volô be. A Zambe, e Zambe wom, yala'ane ma, e ma me ne nkus.

⁵ Amu ô nga bo mam me nga kui melu kôa, e ma ma boban éyoñe ji, a ma ma ye boban melu ma zu; ô nga fase mame ya dene di, e ma ya melu ôsu, a jam ô nga bili e Nsisime wôé été e nga yené.

⁶ Mam ô nga tyik me nga tebe a jô na: Bia ba. Amu mezene môé mese me ne nkôman a wo tak, melu abui ôsu, avale wo ye tyi'i mam.

⁷ O lôô bôte y'Asiri be nga so a ngul ése, be nga zalé bebien amu ajô bikabela biab a bebebe y'été, be nga bo mebun amu ngul wo ya bezimbi bab ba wosan be wulu'u a mebo, be nga futi e ndinleme jab e ében, e nyamele, akoñ, *élaé a toloo; be nga bo te yeme na ô ne Nti Nyô a bôé bita.

⁸ Jôé dôé e ne na: Nti. Tyamek éwôlô jab a ngule jôé, a bibi'i e ngule jab a ayo'o dôé; amu be maneya bôndé fe'e ya ndaman mevôme môé me ne étyi, a ve *nda éndelé jôé mvin e vôme jôé dôé e ne étôtok e né, a bu'u nla'a ya ata'a metuna'a dôé a étyé.

⁹ Fombô'ô mebune map, lôme aya'a dôé e minlô miap, va'a e wo nkuse wom e ngule me maneya tu'a fas.

¹⁰ A biyaé medu'ane biam, bibi'i *ôlo e fefel évet a évet e fefele mbo ésaé; fitik ayabe nté dab a wo minga.

¹¹ Amu ngule jôé é nji bo e tañe bôt, nge éwôlô jôé e mingungul été, ve ô ne e Zambe ba ba suu bebiene si, Mvolô ayôme bôt, Nkamane mintetek, Nkale ba be li'iya étam, Nyô a nyii ba be bili ate'e minlem.

¹² Yaa! Yaa! E Zambe ésaa wom, e Zambe a ne ngab éli'i Israél, Njôô ya yôb a si, Ntéé mendim, Njô bôt ya ntéane biôm ôse, yala'ane meye'elane mam,

¹³ a bo'o na nkobô medu'ane wom ô balé a wôé e ba be nga bi ayet asimesan da wosan élate jôé, *nda jôé é ne ntelan étyi, abôbône nkôle Sioñ a e *nda bôte bôé be bili.

¹⁴ Bo'o *meyoñ mese a *nda ayoñ ése be yeme na ô ne e Zambe a ne Ngul ése a Ewôlô ése, a teke mfe ve wo étam wo bômbô évevé ajô mvoñe bôt Israél.