Yd 7 - Kalate Zambe Nnomo a Mfefe Mfefé Nkôñelan

Nkane mewosan Hôlôfern wo dili Bétuli bita

¹ Tyé kpwaa, Hôlôfern a nga bendé minsamba bezimbi mié a e bôte bese be nga zu volô nye na, be ke mfa'a ya Bétuli, be nyoñe meyo me nkôl a wosane bone be Israél.

² Môs ôte, fam ése é yeme é nga taté dulu. Nsamba befam ba wosan be wulu'u a mebo ô mbe toyini mewôme zamgbwa, a bewulu bikabela toyini awôm a ébaé, te lañe beba'ale mam ma fombô moné a bôte ba wulu a mebo be mbe été, ézu'u jama bôt.

³ Be nga vule minkan e nje'ese ô ne bebé Bétuli, mfôm anjeñ a be nga mialan vôm ase, ataté Dotayim a kui Belbayim nté ataté Bétuli a kui Kiyamôn, nye a ne Esdreloñ e nka'a yat.

⁴ Eyoñe bone be Israél be nga yen abim ézu'u be mbe, biyebe bi nga bi be a môt ase a nga jô nyô mbo'o na: Ke ba ye mane mine ngume si éyoñe ji: To'o minkôle mi ne ôyabe yôp, to'o mimbi'ili, to'o zesé minkôl, teke jôme y'été ja ye bo ngule ya jibi adite dap.

⁵ Eyoñe môt ase a maneya nyoñe biôme mewosane bié, a bo'é nduane ya minkume miap, be nga tebe na ba mombô ngum alu te ôse.

⁶ E môse baa ñwô Hôlôfern a nga kuli bikabela bié a bewulu y'été ôsu bone be Israél be mbe Bétuli.

⁷ A nga mane ke a fombô meyo me nkôl ma bete mfa'a ya tisone jap, a mane fe bômane mevôme mab me bili mendim; a nga mane me nyoñ a telé bezimbi bita été, émiene ke ve bulane be bôte bé.

⁸ Bivete bise bi bone b'Esô a beteb'ôsu bezimbi be bôte ya Môab a ba ya nsa'a mañ be nga zu bebé a jô nye na:

⁹ Masa wongan a vô'ôlô'ô tyiñe jangan, nalé môt a ye bo te wu e nsamba mewosane wôé.

¹⁰ Amu ayoñe bone be Israél ete e nji buni mekoñe map, ve ôyabe yôbe ya minkô e vôme be too; amu e nji bo tyi'ibi ya kui e mebôbône ya minkôle miap.

¹¹ Ajô te ñhe éyoñe ji a Masa, te wosane be ane bita ba telé bôte minnoñ wôna môt wua ya bôte bôé a ye bo te wu.

¹² Tabe'e e minkane miôé a ba'ale bôte bese ya nsamba mewosane wôé a bebo bisaé bôé ki be ke ôsu a ba'ale anjeñe mendim da so tine nkôl.

¹³ Amu e nne bôte be too Bétuli ba labe mendime valé. Evé ja ye wôé be a ba ye suu tison jap. Bia a bôte bangan bia ye bet e mebôbône minkôle mia dañe bebé, a bia ye vule minkan bebé vôme be né nalé môt éziñ a ye bo te kui atan a so'o tison été.

¹⁴ Ba ye wu zaé, bebien, binga bab a bone bap, a te na nkpwaté mekôn ô bi be, ba ye biban e mevôme menda mab me né.

¹⁵ Wo ye ya'ane be angônda ma'an, amu be nga ben éjôé a be nji zu tôbane wo e *mvo'é été.

¹⁶ Hôlôfern a bivete bezimbi bié bise be nga yene nkobô wobe mvaé, nde a nga bendé na be bo ane be nga jô.

¹⁷ Minkane mi bone be Amon mi nga téé dulu baa be bôte toyini étan ya bone b'Asiri; be nga vule minkan e mbi'ili, be nga nyoñe mevôme me bili mendim a menjeñ me bone be Israél.

¹⁸ Bone b'Esô a ba be Amon be nga bet a vule minkan e si minkô, Dotayim a too e nka'a yat, a be nga lôme bevo'o ya be be mfa'a ya nké a e jôbe da tôô, Engrebel a too e nka'a yat, bebé a Kus, ôtôñe Môkmur yôp. Minsamba y'Asiri mia li'i mi nga vule minkan e nje'ese a yiane abôta si ese. Menda bindelé mab a mimbe'e miap bi mbe beta avis e minkan atan; be mbe étua abui jama bôt.

¹⁹ Bone be Israél be nga yône be Nti, e Zambe wop, amu nleme wob ô nga bili atek amu besiñe babe bese be nga bômane be, a be nji bo nguleya tup, be kôlô'ô ézezañe jap.

²⁰ Minkan mi Asiri mise, bezimbi bab ba wosan be wulu'u a mebo, bevagoñ bita bap, bewulu bikabela bap, be nga bômane be tañe melu mewôm mela a menyin. E bôte bese be too Bétuli be nga yen ane bilaba'a biab bia vele mendim.

Ozias a kômbô ve bôte be ne ndilane bita ngule nyô

²¹ Bibé mendim bi nga mane vele a be nji beta bi mendime ya nyu ve tañe môse wua, amu be mbe be kabe jôm ése ba nyu.

²² Ayôme bone dab e mbe nte'an, binga a bendômane fe amu évé, be kele ba ku mimbek e minseñ ya tison a e mezen ba tulane mimbé; be nji beta bi évee ngule nyôl éziñ.

²³ Bôte bese, bendôman, binga a bongô be nga sulan e fefele Ozias a bivete ya tison, be nga yône tyiñe ngu a jô asu be bemvendé na:

²⁴ Zambe a bo'o *ntyi'i mejô e zañe bia be mia. Amu melu mebiene ma, mi boya bia *abé, e vôme mi nji belane nkobô *mvo'é, mia be bone be Asiri.

²⁵ A éyoñe ji, e môt a ne volô bia a nji bo, ve Zambe a kuaneya bia e mo mab na, bi bômban ôsu viab a évé a mbia éto éngôngo.

²⁶ Eyoñe ji lo'one ñhe be a ve tison ése e nsa be Hôlôfern a nsamba mewosane wé ôse.

²⁷ Amu mfa'a wongan, e ne mvaé na bi bo bidi biab a lôte na bi wu zaé. Bia ye bo alo, ve bia ye nyiñ a bia ye bo te yen ane ayôme bone dañ da wu ane binga bangan a bone bangan ba suu mvebe.

²⁸ Bia kalane yôp a si, bia kalane fe e Zambe wongan, Masa b'ésaa bangan, Nyô a kun Emiene be bia aval ane bikobe biangan bi né, a aval ane *abé b'ésaa bangan e né, na mi bo den ane nkobô bi maneya kobô ô né.

²⁹ Beta ntat a so'o be bôte bese a nga boban éyoñe jia ézezañ ékôan; be nga yône tyiñe ngu e be Nti.

³⁰ Ozias a nga jô be na: Mva'ane ngu, a bobejañ! Mbeta'a yangane melu metane na Nti, e Zambe wongan a kôñelane nkoon égôngole wé be bia; amu a ye bo te li'i bia a kui amané.

³¹ Ve nge melu mete me lôté te na bia bi mvolan, éyoñe te ma ye bo ane mia jô.

³² Ane a nga mialane bôt e mesu bita map, be nga ke aleme dap a e minkume ya bitisone biap; ve be nga suu binga a *bon be ke e menda map. E tison, bôt be nga bili ate'e abui.