Yd 5 - Kalate Zambe Nnomo a Mfefe Mfefé Nkôñelan

Hôlôfern a bo émo'o

¹ Be nga kate Hôlôfern, évet ôsu ya nkane bita bôte ya Asiri na bone be Israél ba kômesane bita, na be maneya dibe mezene m'éfuse si minkô, na be maneya lôñ alem e mebôbône mese ya beta minkô a na be maneya futi melam e minje'ese miap.

² Ane a nga wô'ôlun a yaa abui, ve loone bivete bise ya Môab, beteb'ôsu bezimbi ya Ammon a bengovina ya nsa'a mañ.

³ Nye ve jô be na: Ayoñe bôt avé e too éfuse si minkô? Be too minlam mivé? Nkane bita wob ô bili bôt tañ aya? Ngule jab a éwôlô jab bi ne jé? Njô bôt a tele be ôsu asu ya jôô minsamba miab a ne za'

⁴ Amu jé ba te biasé zu tôbane ma nsela'an a bôte bese be too e jôbe da dim'

Nkobô Akior

⁵ Ane Akior, évete bezimbi ôsu e be bone b'Ammon bese é nga jô nye na: Masa wom a tame vô'ôlô éfia ja so anyu be mbo ésaé wôé a ma ye kate wo bebela a fombô ayoñe bôt e too éfuse si minkôle te e fefele jôé. Teke minsos mia ye kui anyu mbo ésaé wôé.

⁶ Ayoñe te e ne di da so mvoñe bôte Bekaldééñ.

⁷ Be nga taté tabe Mézôpôtami, amu be nji kômbô tôñe bezambe b'ésaa bap be mbe e sii Bekaldééñ.

⁸ Be nga kôlô e zene bimvame biap, a be nga kañe Zambe a ne e yôp, e Zambe be nga yem. Be nga titane be be kôlô asu ya bezambe bab a ke sobô Mézôpôtami a tabe wé abui melu.

⁹ E Zambe wob a nga jô be na be kôlô e vôme be nga too a ke e si ya Kanaañ. Be nga tabe été a bi abui mvot, a argent a ézu'u mimbam betit.

¹⁰ Be nga sis mfa'a ya Ejipte, amu mfumbale zaé a nga yiane si ya Kanaañ a be nga tabe wé a nyiñ a fôé a bo abui teke alañé.

¹¹ Njô bôte ya Ejipte a nga tebe be ngame yat a belan atyeñe fe'e dé na a ve be ésaé mbibane brik; a nga sili be si a veñesane be alo.

¹² Be nga yône be Zambe wop, Nye ve bibi si ése ya Ejipte a bibubua bi mbe teke biañ a bôte ya Ejipte be nga titane be be kôlô vôme be too.

¹³ Zambe a nga bo na évele mañ é kôt ôsu viap

¹⁴ a wulu be mfa'a zene ya Sinayi a Kadés-Barné. Be nga titan e bôte bese be nga too e *nkôte si.

¹⁵ Be nga tabe sii Beamorite a jiane bôte bese ya Yésboñ éwôlô jab été. Eyoñ be dañeya Yordan, be nga nyoñ éfuse si minkôl ése.

¹⁶ Be nga titane mone Kanaanieñ, Périzieñ, Yébuzieñ, Sikémieñ a Begirgazieñ bese a be nga tabe valé abui melu.

¹⁷ Nté ôse be nji bo *abé e mise me Zambe wop, ma'a a mbe be be, amu be bili Zambe a vini ékotekot.

¹⁸ V'éyoñ be nga li'i zene a nga liti be, be nga wôéban mbia ñwôéban ézu'u bita été a keebane minkôm éza si. E ndaa Zambe wop é nga tyamban a besiñe bap be nga nyoñe bitisone biap.

¹⁹ Eyoñe ji, amu be bulaneya be Zambe wop, be soya mevôm be nga mane mialane be, be tabeya Yérusalem, e vôme *nda Zambe jap é né, be tabeya fe éfuse si minkôl, amu é mbe teke môt.

²⁰ Ajô te ñhe, a nye'ele a Masa, éyoñe ji nge ate'e éziñ e ne e be ayoñe bôte di, nge ba bo e Zambe wob *abé, bi ke bi kulan amu jé be nga ku bia ye bet a wosane be.

²¹ Ve nge ékotekot éziñ é nji bo be be, e masa wom a jibi'i jô'é dili é lôt e Nti, e Zambe wob a zaa kamane be. Bi zaa tôban ékpwe'ele e si nyôna ése.

Ba ve Akior mekua a kalane nye e be bôte ya Israél

²² Eyoñ Akior a nga mane kobô nalé, e nde bôte bese be nga bômane *nda éndelé a be mbe njiñelete, be nga kobô menyiñ; biwôlô bezimbi Hôlôfern a bôte bese be too nsa'a mañ a e Môab be nga kobô na be bôme nye a njet ése.

²³ Amu bia ye bo te ko bone be Israél woñ. Amu tame yen ayoñe bôt e ne fô'ô momo, ngule momo, asu mewosan ma sili njet.

²⁴ Ajô te bia ye bet a ba ye bo bidi asu minsamba mewosane miôé mise a Masa Hôlôfern.