Yd 4 - Kalate Zambe Nnomo a Mfefe Mfefé Nkôñelan

Beyude ba kômesane bita

¹ Bone b'Israél ya Yudé be nga wô'ôtan ane Hôlôfern, évete bezimbi Nébukatnézar, njô bôte y'Asiri a nga bo meyoñe mevok, aval a nga sa a tyame mevôme mab me n'étyi asu nkañan.

² Be nga dañe ko woñe ya yene nye a za'a be bebé, nde be e nga fô'ôban, amu Yérusalem a amu *nda Zambe Nti, e Zambe wop.

³ Valé be ndôme so minkôm, valé be ndôme mane kôane bôte ya Yudé, nalé fe na biôme mebelane ya *nda Zambe, ata'a metuna'a a *nda Zambe bi ndôme mane teléban étyi mvuse ndamane ya étyi jap.

⁴ Be nga lôme bekate mefoé e si ése ya Samari, Kôna, Bétôroñ, Abelmayim, Yérikô a kui Kôba, Ayisor a nje'ese Salem.

⁵ Be nga too e mebôbône mese ya beta minkô, be nga yemete e beta minlam bese be mbe été a lôñe binaane bidi asu menga'aban a ngômesane bita, amu valé be ndôme mane kôane bidi ya mefube map.

⁶ Yôakim, nyô a mbe *ntuni nnen e Yérusalem melu mete a nga tili e bôt be nga too Bétuli a Bétomestayim e nka'a yat Esdreloñ, zo'one nje'ese ô ne bebé a Dôtayim.

⁷ A mbe a jô'ô be na: Be ba'ale meyo m'éfuse si minkô amu me mbe vôme ya tulan a kui Yudé a na e mbe tyi'ibi ya bi e bôt ba lôtan bebaé bebaé, amu *zen é mbe ôfanefan.

⁸ Ane bone b'Israél be nga bo avale be nga nyoñ abendé, e so'o be *ntuni nnen Yôakim, a nsamba bemvendé ya Israél ase mbe be nga too ékôan e Yérusalem.

Beyude ba ye'elane Zambe na a volô be

⁹ Befam bese y'Israél be nga yône be Zambe a ngul ése a be nga tyi bidi, fianga momo,

¹⁰ bebien, e binga bap, bendaé bap, a mimbame betite miap; nalé fe beyeñ bese be nga too be be, bebo bisaé ba ya'ane be a alo dap, be nga jaé minkuta e mengeteñ map.

¹¹ Befam bese ya Israél, binga a bongô be nga too Yérusalem, be nga lumbu si ôsu ya *nda Zambe, be nga kut asube minlô a jaé minkuta asu Zambe.

¹² Be nga buti ata'a metuna'a a nkuta a yône ngu e be Nti ane môte wua na a bo te kee bone bab e nsa, binga bab e mebom, bitisone biab bi bo te tyamban, étyi ya *nda Zambe é bo te ndaman a ékpwe'ele *meyoñ biku é bo te dañe be.

¹³ Ane Nti a nga wô'ô tyiñe jab a fombô éto ôlune jap. Bôt be nga ke ôsu a tyi bidi melu melu e Yudé ase a e Yérusalem ôsu ya vôme Nti a ne ngul ése a ne étyi.

¹⁴ Ntuni nnen Yôakim, betuni bese ba tebe asu be Nti a bebo bisaé be Nti, be be'e minkuta, be nga ve mveane ba di'i ngumba éyoñ ése, mimvean mia so *mintiñetan a mi bôt ba ve ane bebien ba kômbô.

¹⁵ Ndiñane mintôme ya minlô miab mi mbe njalan a asub a be mbe be yônô e be Nti a ngule jab ese na Nti a jome ayoñ Israél ése asu *mvo'é jé.