Yd 3 - Kalate Zambe Nnomo a Mfefe Mfefé Nkôñelan

Bikul bia ja'é * mvo'é e be Hôlôferne

¹ E nde ñhe bikul bi nga lôme bôt ba ke ja'é *mvo'é be jô'ô na:

² Bia bi tele wo mise vana ba, bia bebo bisaé be Nébukatnétzar, njôô nnen. Bo'o bia aval ane *nlem wo jô wo.

³ Meka'a me bone biyem bangan ma a si jangan ése, a mefub me fembé mangan mese, mimbam biyem miangan, bone biyem a beta biyem a mebemba biyem mangan mese ya male bezimbi mangan, e me me tele wo e mise ma. Bo'o ñhe fo'o biôme bite ane wo nye'e.

⁴ O yeme na bitisone biangan bi, a bôte ya été be nto belo bôé; za'a ñhe, ô zu nyiin été aval ane wo kômbô.

⁵ Ane bôte bete be nga ke kui e be Hôlôferne be mane fe kobô nalé.

⁶ E nde Hôlôferne a nga sus mfa'a ya nsa'a mañ, a nye a nsamba bita wé, a mane telé bôte ba ba'ale bitison bi bili meka'a bita, a mane fe tob mimben bezimbi mia ye volô be.

⁷ Ane be nga nyoñe nye vôm ate a afôla si ese e mbe mbôma'ane, be be'e bikate mesam, be bôme mengom a jeme *mebôk.

⁸ Ane a nga mane ndaman e si jab ése, a baké'é bilé bi ne étyi amu a nga bili asu ésaé na a mane jañele bezambe bese ya si éte ékok, ndemben meyoñe me bôte mese me kañe ve Nébukatnétzar étam, *minkobô mise a meyoñe me bôte mese me ye'elane nye aval ane *zambe.

⁹ E nde ñhe Hôlôferne a nga ke kui e zia Esdedon, bebé a Dôtayim, beta ôtômetôm nkôl ya Yudé a ngenan ôsu.

¹⁰ Ane be nga mane lôñe bibem biab e zañe Gébayi a Sitôpôlis. A nga tabe valé tañe ngume ngon a tôka'an mimbe'e asu bôte bese ya nsamba bezimbi wé.