Yd 2 - Kalate Zambe Nnomo a Mfefe Mfefé Nkôñelan

¹ E mbu awôm a muame, e ngon ôsu é to melu mewôm mebaé a mebaé, ane Nébukatnétzar, njôô nnen bone ya Asiri, a nga kobô e *nda jé été na a zu kun émien, e si ésese'e, aval ane a nga mane jô.

² E nde ñhe a nga bañete beta minlô mi bôte mise ya minsamba bezimbi a beta be bôte bese, a bu émo'o baa be be, ane a nga tyik a anyu dé aval éndeñela'a ese a ye ndeñele si.

³ E nde be nga yene na ba yiane jañele ékôb môt ése, e bôte bese be nga bo teke tôñ mejô me nga kui nye anyu.

⁴ Amané a nga mane émo'o éte, ane Nébukatnétzar, njôô nnen bone ya Asiri, a nga loone Hôlôferne, njôô bezimbi bese ya nkane bita, a to fe môte baa ya éjôé jé, a jô nye na:

⁵ Njôô nnen, *nti ya si ésese'e a kobô na: Yeme na wo zu kôlô be ma va a wo ye nyoñ mingungul mi bôt ô too mie ndi, akekui tañ bezimbi ya si si ntet toyini a toyini mewôm mebaé, bikabela bizu'u bizuk a bôte ya été tañ toyini awôm a ébaé.

⁶ Wo ye téé a ke bôé bita éfase si ése ya mfa'a jôb da dim, amu be nga bo melo, teke wô'ô mejô ya anyu dam.

⁷ Wo ye jô be na be bo ngômesan e mfa'a ya si a mfa'a ya mendim, amu ma ye ke wosane be a ôlun ôse e *nlem, ma ye yametane si ése a nkane bezimbi wom a ma ye ve tyiñe na be mane sa be biôm biap.

⁸ Mimbi'ili mia ye jaé ne lut a bôte ba ye mane balé meveñ; atôñ a beta b'asôé ba ye jaé a fuluku a mimbim mi bôte miap.

⁹ Ma ye bi bôte bab minkôm a ke kui be e meku'u me si mese.

¹⁰ Ve mfa'a wôé ki wo ye me ke mane nyoñe ma mesi mab mese; bebien ba ye zu kate wo na be te'eya a mewosan, a wo ye ba'ale me be ô yange'e môse ba ye bo'olô ajô dap.

¹¹ Ve bôte ki ba ye bo mbia nlô, te wo ve'ele bo éwu dis, wo ye bo na be mane wôé be a mane sa biôme biab afôla si ese.

¹² Amu na, ane me vee, me bili fe ngul ya éjôé, me kobôya, a ma ye bo jam ma jô a wo wom mamien.

¹³ Ve mfa'a wôé ki, te wo ve'ele dañ *atiñ da da ya mejô *nti wôé a jô; ve wo ye jalé me mese teke bu'u da, aval ane me nga tili me a wo ye bo teke yange a lôte biyoñ ya été.

¹⁴ E nde ñhe Hôlôferne a nga kôlô e be *nti wé, a mane loone mintômba mi bôte mise, bejôô benen a beta minlô mi bôte ya nkane bita ya Assur.

¹⁵ Ane a nga mane lañe tañe bôte ba dañe biwôlô asu mewosan, aval *nti wé a nga bendé nye akekui tañe bizu'u betoyini awôm a bebaé, bewua bilaé ki toyini awôm a ébaé.

¹⁶ E nde a nga mane telé be aval ba ta'a nsamba bita.

¹⁷ A nga nyoñe fe bekamel, b'ôzele a bikabela, nnôm éjakas a biaé a ngal ékabela abui abui, asu mbe'ane mimbe'e; a nyoñe fe mintômba, a benyak a bikela ba ye ke ba di;

¹⁸ a nyoñe fe bidi abui asu môt ase, a or a étyé, moné abui abui e *nda be njôô nnen.

¹⁹ Ane a nga téé a ke e mewosan, a nye a nsamba bezimbi ôse, be kele njôô nnen Nébukatnétzar ôsu, be mane ke yametane si ésese'e ya mfa'a jôb da dim a bemetua bita, a bezimbi ya bikabela, a ba ya si si ba dañe biwôlô.

²⁰ A nga ke fe a beta nkunda bôt abui aval ane nkunda bitandak, nge ki nsele'e ya si, amu be mbe bizu'u bizuk tee tañ.

²¹ E nde ñhe be nga ke ôyab a tison ya Ninive, a wulu melu mela, e zene ya nje'ese si ya Bektilet; nkôlane ya Bektilet, ane be nga ke lôñe bibem, bebé a nkôl ya mbo ngal, e si ya Silisi akôé.

²² Ane a nga nyoñe fo'o ngumba nkane bita ôse, bezimbi bé ya si si, e ba ya bikabela, a ba ya bemetua, a kôlôô be valé a kee be mfa'a ya minkôle yôp.

²³ E nde be nga bôm Fud baa Lud, bezimbi be mane fe sa bone be Rassis bese a ba be Ismaél bese be nga to mfa'a ékôte si ya yat, e Kéléône nké.

²⁴ Ane a nga lôt Efrata, a dañ e kindi'i Mesopotami ya yat, a nga tyam bitison mewosan bi mbe e nsa'a ôsôé Abôlôma, akekui e mañ.

²⁵ E nde a nga mane nyoñ mesi ya Silisi, a nga sañ a fa e bôte ba bo nlô *abé a za'a kui mesi me Afet ya nlame nké, e mfa'a Arabi ya yat.

²⁶ Ane a nga mane bômane bone be Madian bese nyul ne kpwok, a diki'i mal bezimbi map, a sa fe mebemba biyem map.

²⁷ E nde ñhe a nga sus e nje'ese si ya Damas, éyoñ bôt ba koé mefub me fembé, a mane di'i mefub mese a nduan; a nga mane fe wôé be mimbam mintômba a mimbam mi nyak, a sa bitison, a mane ndaman mesi bidi map, a mane fe wôé bendômane bese a nkpwaté mekôn.

²⁸ Woñ a mimfô'ôban bi nga bi ñhe bôte ya nsa'a mañ Sidôn baa Tir, e bôte ya Sur a Okina, a ba bese ya Yameni; e bôte bebien ya Azot a ba ya Askalon be nga bili angônda woñ.