Yd 15 - Kalate Zambe Nnomo a Mfefe Mfefé Nkôñelan

¹ Eyoñe ba be mbe be ngenan e menda bindelé mab be nga nyoñe foé nyô, woñ ô nga bi be.

² Amu be nga ko woñ a fô'ôban, teke môt a mbe fe ngule ya beta tebe e fefele nyô mbok: Ntyamela'ane nye a nga kui. Môt ase a nga tub a ke mezene ya nje'ese nge nkô.

³ Ba be nga vule minkan afôla si minkô mbôma'an a Bétuli, be fe be nga taté na ba tup. Nde bôte mewosan y'Israél be nga kubu be nyô.

⁴ Ôzias a nga ji'a lôme minlôman e Bétomestayim, e Bébé, e Kôbé, e Kôla, e si ése ya Israél asu ya kate foé ya jam ese e ndôme mane bobane di bôt be yeme de, a bañete bôte bese na be ku besiñe yôb a jiane be.

⁵ Eyoñ é nji lôt ataté ane bôte ya Israél be nga yeme jame te, bese be nga ku be yôb éyoñ jia a wôé be a kui Kôba. Ba ya Yérusalem a nkôle Yudé ôse, be nga zu fe koone be, amu be nga wô'ôtane fe jam e nga bobane minkane besiñ. Mvus éte bôte ya Galad a Galilé be nga bi be avel abum.

⁶ Mfa'a ba bevo'o be nga li'i Bétuli, be nga kubu e minkane y'Asiri ne bum, a sa mie a bo kum a lôte nné.

⁷ Bôte y'Israél, mebulane mab, mvuse ñwôane bôt, be nga bo bemasa ya *mebuka'a. Bôte ya beta bitison a minlame ya nkô a nje'ese be nga nyoñe fe abui biôme ya nsa, amu bi mbe abui.

Mvean akéva

⁸ Yôakim, *ntuni nnen a émo'o bemvendé y'Israél be mbe Yérusalem, be nga zu yen, be kamek, mbamba be mam Nti a nga jalé Israél, asu ya yene Yudit a batane nye.

⁹ Eyoñe be nyiineya be nye, bese be nga botane nye avale di tyiñe jia na: Ô n'étôto'o ya Yérusalem! Ô ne jôme mebune y'Israél ja dañ ôyabe yôp! Ô ne duma nnene y'ayoñe dangan!

¹⁰ Eyoñ ô nga bo mame mana mese a wo wôé, ô nga yené nyô y'Israél a yian, a Zambe a nga yemete jam ô nga bo. Nti a ne Ngul Ese a bota'ane wo biyoñ bia zu! A bôte bese be nga yalane na: Amen!

¹¹ Bôt be nga sa minkan tañe melu mewôm mela. Be nga ve Yudit *nda éndelé Hôlôfern biôme bi argent bié bise, biôme bié y'énoñ, befandé bé a biôme bié bise ya *nda. A nga nyoñe bie a ka'a bie e tite mimbe'e jé yôp, a tiñeti bone bemetôa bé a futi biôme bise été.

¹² Binga bese y'Israél be nga mate mimbil a zu yene nye a sek a botane nye, be nga ta'a nsamba bia bi abôk asu ya jem a lu'u nye. Yudit a nga nyoñe ôlé mvulan a mebui mindi'i mesam a ve wô binga ba be be be mbe nsamba.

¹³ Yudit ba be binga be mbe nsamba be nga jaé beôlivié minlô. Wôna a nga tebe ôsu ya bôt bese, a wulu nsamba a beyia bia be binga. Befame bese y'Israél be be'e mengaa a bikate mekaé bilé e minlô, be nga li'itane nye be yi'a bia a ngul ése.

¹⁴ Ezezañe Israél ase, Yudit a nga yia jia mvean akéva ji a bôte bese be nga fulane nye a yôtane jia te *tyiñ ôyab yôp.