Yd 14 - Kalate Zambe Nnomo a Mfefe Mfefé Nkôñelan

Beyude ba sa minkane mi bôte y'Asiri

¹ Yudit a nga jô be na: Vô'ôla'ane ma, a bobejañ, nyôñane nlô wu a tyelé wô e mimfine meka'a menane yôp.

² Wôna, éyoñe tyé é lendéya a jôb e tôéya si, môt ase a nyoñe mengale mé, a fam ése é yeme é kele atane ya tison. Tela'an évete ya nsamba bezimbi a bo'an aval ane nge mia kômbô siliki e nje'ese mfa'a vaa bezimbi y'Asiri a né. Ve te silikan.

³ Bôte y'Asiri ba ye nyoñe biôme mewosane biap, ba ye bulan e minkane miap, ba ye vele bivete ya nsamba mewosane wop. Ba ye ji'a ke e *nda éndelé Hôlôfern a ba ye bo te koone nye. Woñ wo ye bi be a ba ye tube mia.

⁴ Mia, a ba bese be too éfuse si Israél, da ye li'i mia ve na mi tôñe be a wôé be asoé dap.

⁵ Ve bi ngenane te bo nalé, lo'one ma Akior mon Amônit asu ya na a yen *a yem mbiasé *nda Israél, nyô a nga lôme nye be bia ane môt ôsusua a yiane wu.

⁶ E nde ba soo Akior be Ôzias. Nné ane a nga suan a yene nlô Hôlôfern ñwô wua ya bôte be mbe ékôan ayoñ a nga bili, a nga ku asu e butu si, ve suu nyô.

⁷ Be nga bete nye si. Nd'a wua émien e mebo me Yudit si a a lumbu'u si ôsu vié, a nga yôtan a jô'ô na: Ebotan é bo'o be wo, e menda bindelé mese ya Yuda, a *meyoñ me bôt mese été; ba bese ba ye wô'ô be tote jôé dôé, woñ wo ye bi be!

⁸ Eyoñe ji kate ma jam ô boya melu ma. Nde Yudit a nga kañete nye, ézezañe bôte bese, mam mese a nga bo, ataté nkôlane ya Bétuli a kui éyoñ a mbe a kobô'ô le.

⁹ Eyoñ a nga mane nkañete ôte, bôt be nga loñe ngul ayenga a jalé tison a zô'e mevak.

¹⁰ Eyoñ Akior a yeneya e jam ese Zambe Israél a nga bo, a nga buni nye nya mbunane, ve bo na a tyi'iban atye a su'ulane nyoñeban e *nda Israél.

¹¹ Eyoñe tyé é nga lendé, bôte ya Bétuli be nga tyelé nlô Hôlôfern aka'a ôlem. Môt ase a nga nyoñe mengale mé, a bese be nga kui minsamba minsamba e mesiliki me nkô.

¹² Eyoñe bôte y'Asiri be yeneya nalé be nga lôme bôt avô e be bivete biap, be ki be nga ke e be bebôndé mefek, beasuzo'o a bivete bezimbi bise.

¹³ Nalé be nga ke a kui *nda éndelé Hôlôfern, be nga jô mba'ale akume dé na: Vele'e masa wongan. Alo te da te bi ayo'o nleme ya sise be bia a tya'a bia na be mane wôéban ne meñ.

¹⁴ Nde ñhe Bagôas a nga nyiin, ve kute mo ôsu éndelé ya *nda éndelé, a buni'i na Hôlôfern ba Yudit be ne ôyo.

¹⁵ V'amu e nga yené ane môt éziñ a nji wôk, a nga dii a nyiin étune *nda ba bômbô, a kooé na be wuaya nye e *mbé yôp, ñwuan a nlô ntyi'an.

¹⁶ Nd'a nga bôé beta ñyôn, a nga yi, a nga se'ebe, a nga bam a nyabe mengômesane mé,

¹⁷ wôna a nga nyiin e *nda éndelé Yudit a nga too, teke koone nye. Nde éyoñ a nga nyiin éndundumba bôt été, a nga yôtane na:

¹⁸ Aé! Belo be beneya njôan! Minga Beyude a wo'oya *nda njô bôte Nébukatnétzar ôson. Hôlôfern a bôô mbime si, nlô ntyi'an!

¹⁹ Mejô mete me nga bulekane nsisime bivete bi nkane bita y'Asiri ôse, be nga nyabe melô'ô map, a bo na miñyône miab a zô'é jab bi bet e yôb été a wô'é e minkan.