TOBI 8 - Kalate Zambe Nnomo a Mfefe Mfefé Nkôñelan

Esulan bidi asu aluk Esulan bidi ya aluk

¹ Eyoñ be nga mane di a nyu, be nga kômbô ke bômbô si. Be nga zu mone ndôman a ke liti nye étune *nda.

² Tôbias a nga simesane *melep me Rafaél: Ane a nga kui ékpwaé jé a nyoñe ések a nleme kos a beté bie metye'e me nduane yôp.

³ Enyume kos é nga telé mbia *nsisim, ane a nga tup a ke miñyeme mesi ya Ejipte. Rafaél a nga tôñe nye wé, a bi nye a ka'a nye ngata'a éto te ébien.

⁴ Ane be nga li'i Tôbias a be nga dip *mbé ya étune *nda. Ane a nga kôlô énoñ a jô Sara na: Tebe'e tetele a kale jam, bi ye'elan a sili Nti wongan na a ko bia éngôngol a ve bia nyiane wé.

⁵ A nga tebe tetele; ane be nga ye'elan a sili na ényiñ é vebane be be. Tôbias a nga jô na: Ebotan a wo, Zambe beésa bangan! Jôé dôé e bo'o ôlu'u e mmiaé mi bôte mise mia zu! Yôp a bitétéa bise bia ye kañe wo nnôm éto!

⁶ Wo ô nga kôm Adam, wo ô nga kôme minga wé Eva a bo nye mvolô a nyô a su'u nye, a meyoñe me bôt mese me nga so e be be. Wo ô nga jô na: a nji bo mvaé fam ja tabe étam, bia ye bo nye mvolô a funane nye.

⁷ Nde ñhe éyoñe ji, sa amu mbia minkômban mmie mia tindi ma na me lu'u kale jame nyô, ve amu évévé ya bebela. Jibi'i ko bia éngôngol, a nye a mamien. Ane bia ye ke minnôm bese.

⁸ Bese be nga jô tyiñe jia na: Amen, *amén!

⁹ Ane be nga bômbô si ngum alu.

¹⁰ Nde Raguél a nga kôlô si a loone bebo bisaé bé, be ke fa'a soñ; amu a nga jô *nlem été na: Ndô'ôtô Tôbias a ke wu; bôt ba ye kpwe'ele bia a ta bia.

¹¹ Eyoñ be nga mane fa'a soñ, Raguél a nga bulane *nda a loone minga wé

¹² a jô nye na: Tame lôme mbo ésaé minga wua a ke lembe nge Tôbias a ngenan a vee: amu nge a wuya, bia ye jame nye môt te yem.

¹³ Be nga loone mbo ésaé minga, be bo'é lampe a yoé mbé; ane a nga nyine étune *nda a zu koone be ôyo ne kpwe'elé.

¹⁴ A nga bulane zu kate be na: A ngenan a vee, mam mese me ne *mvo'é.

¹⁵ Raguél a nga ve Zambe ya yôp akéva a jô na: a Zambe, nyoñe ébotan ése é ne *mfuban! Ba ye botane wo nnôm éto ya nnôm éto mintete mimbu mise!

¹⁶ Akéva amu ô jaléya ma a mevak! Amu e boya te bo aval ma te simesan; ve wo nyoñe bia aval ane beta mvame wôé a né.

¹⁷ Akéva amu wo wô'ô metyi'i me bone bebaé ba éngôngol! A Nti, va'a be mvame jôé a nyiane wôé; a bo'o na ényiñ jap é wulu a mevak a *mvo'é.

¹⁸ Ane a nga jô bebo bisaé bé be mane jine soñ tyé é ngenan te lendé.

Rafaél baa Raguél

¹⁹ Raguél a nga jô minga wé na a bup abui fembé; émien a nga ke mbam a nyoñe nyak ébaé a mintômba minyin; ane be nga taté ngômesane ya aluk.

²⁰ Ane a nga loone Tôbias a jô na: Tañe melu awôm a menyin, wo ye bo te kôlô va; ve wo ye tabe *nda jam a di a nyu a jalé avak nleme ngo jam é ndôme tôbane beta minjuk.

²¹ Eyoñe ji ébien, ô nto ve nyoñe ngabe baa ya akume dam ese a bulane *mvo'é e be éso. Ngabe baa fok ja ye bo énjenan éyoñ bia minga wom bi wuya. Tabe'e ndi nleme na me ne éso a Edna a ne nyua. A mone wom, tabe'e ndi na ataté éyoñe ji akekui nnôm éto, bi ne mia bebé, a wo a nyô ka.