TOBI 7 - Kalate Zambe Nnomo a Mfefe Mfefé Nkôñelan

Raguél a kañese na Tôbias a lu'u ngo jé

¹ Ane be nga kui Ekbatan; Tôbias a nga jô éngele na: A monyañ wom Azarias, jika'a kee ma e be mojañ Raguél, a nga ke liti nye e *nda Raguél. Be koone nye a too *mbé yôp mfa'a ya nseñ, ane be nga taté batane nye. A nga jô be na: Mbôlané, a bobejañ! Ma tame mia mbamba nsoon! Ane a nga nyiñeli be e *nda jé.

² A nga jô Edna minga wé na: Za avale éfunane mone ndômane nyô a funane mojañ Tôbi!

³ Edna a nga sili be na: Mia so vé, a bendôme bam? Be nga yalane nye na: Bi ne bone ya mvoñ bôt Néftali, be ne minkôm e Ninive.

⁴ A nga sili be na: Ye mia yeme monyañ wongan Tôbit. Be nga yalane nye na: Ya, bia yeme nye.

⁵ A nga sili be na: Ye a ne *mvo'é? Be nga jô nye na: A ngenan a vee, a ne fe *mvo'é. Tôbias a nga beta jô na: Ke ésaa wom émiene le!

⁶ Raguél a nga valé si, a wubane nye, a yôn. Nde a nga kobô a jô na: Ô ne ébotan, a mone wom, ô bili mfañ ésaa. Engôngole jame na: Abime zôsôa môte te, nyô a nga volô bôt abui, a su'ulane bo ndindim. Ane a nga wubane monyañ wé Tôbias *tyiñ a dañe yôn.

⁷ Minga wé Edna a ngo jé Sara, be fe be nga yôn.

⁸ Ane a nga tyi'i ntômba wua ya mbam, a ve be abui bidi.

⁹ Eyoñ be nga mane woban, ane be nga tabe tebele; Tôbias a nga jô Rafaél na: A mojañ Azarias, sili'i Raguél a ve ma kale jam Sara.

¹⁰ Raguél a nga wôk éfia te, a jô mone ndômane na: Tabe'e ne séé, ja'ak a nyu, a mojañ; teke'e môte mfe a ne zu lu'u ngo jam, ve wo; mamien me se ngule ya ve nye môte mfe; amu wo ô ne évuvuman ja dañe ma bebé. Ve jame da, a mone wom, ma yiane kate wo bebela.

¹¹ Me veya nye aluk e be bôte zamgbwale ya be bia, a bese be nga wu, alu ôsu be nga nyine étune *nda y'aluk. Ve éyoñe ji, a mone wom, ja'ak a nyu, Nti émien a ye bo mia aval a nye'e; a ye ve mia *mvam jé a *mvo'é jé Yérusalem. A Nti émien a ye volô mia:

¹² Ve Tôbias a nga jô na: Ma ye bo te di nge nyu jôme va nté ô ngenane te kôm ajô di. Raguél a nga jô na: Za jam afe! E bo'o nalé. Sara a ne éngôé aval ane e ne ntyi'an e kalate Môze. Nkômbane Nti ya yôp wo tyi'i na me ve wo nye. Nyoñe nyô ka. Ataté éyoñe ji, ô ne ndôme jé, a a ne kale jôé, ataté den akekui nnôm éto. Alu di, a mone wom, Nti ya yôp a ye bo na mam mese me wulu *mvo'é mfa'a wônan. A ye ko mia éngôngol a ve mia *mvo'é jé!

¹³ Ane Raguél a nga loone mona minga wé Sara; ane a nga ji'a zu. Eyoñ a soya, Raguél a nga bi nye wo a ve nye Tôbias a jô'ô na: Nyoñe nye aval ane metiñ a mintyi'ane ya kalate Môze mia ve wo nye na a bo minga wôé. Nyoñe nye a ke nye e be ésaa wôé. Zambe ya yôp a wulu'u mia *mvo'é!

¹⁴ Ane Raguél a nga loone Edna minga wé na a zu ve nye afebe ya tili. A nga tili kalate ya aluk a jô'ô na a ve Sara aluk aval ane ntyi'an kalate metiñ me Môze ô né. Eyoñe te be nga zu taté di a nyu.

Tôbias a lañe Sara alu ôsu

¹⁵ Raguél a nga loone minga wé Edna a jô nye na: A kale jam, kele kôm étune *nda évok a ke liti Sara été.

¹⁶ A nga ke kôm énoñ étune *nda, aval ane nnôm a nga jô nye. A nga ke futi ngo jé été a yônôk; ane a nga fimi nye mili'i mis a jô na:

¹⁷ Bo'o ngul a mone wom, Bii ndi *nlem, a ngo jam, Nti ya yôp a ye tyéndé ôlune wôé ô bo mevak. Bi ndi *nlem a ngo jam.