MARKUS 5 - Kalate Zambe Nnomo a Mfefe Mfefé Nkôñelan

Yésus a Ezu'u

¹ Ane be nga dañ e kindi'i mañe ya yat, e si bôte ya Gérasa.

² Wôna a ngenane fo'o a suse éfunga, été été ane môt éziñ a nga zu tôbane nye a be'e mbia *nsisim, a so'o mesoñ.

³ E ne a nga bili étaba'a e mebôm mesoñ été wé, a teke avale ngôkob môt a mbe ngule ya tiñeti nye,

⁴ amu na, biyoñe biyoñ, be nga tiñeti nye a minkole bityé a bengôkop, ane a nga mane té bengôkob a tyi'i minkole bityé, teke fo'o fe môt éziñ a nga bili abime ngul a ne te'e nye.

⁵ Nté alu a nté *môs a mbe a kele a bam e mesoñ a minkô, a kele a tene nyôle jé a balé émien meveñ a *mekok.

⁶ Eyoñ a yeneya Yésus a za'a ôyap, ane a nga bumu mbil a ke kute nye meboñe si,

⁷ e nde a nga bôé angônda *mvam, nye na: Bia wo bi ne za ajôô, a Yésus Mone Zambe a dañe nkôñe yôp? ma vu wo soñ, e jôé Zambe, te wo nembane ndeñele ma.

⁸ Ane Yésus a nga jô nye na: A mbia *nsisim Kôlô'ô be môte nyô!

⁹ Yésus a sili fe nye na: O ne jôé ne za? ane a nga yalane nye na: Ezu'u, e nye a ne jôé dam, amu bi ne abui!

¹⁰ E nde nsisime te ô nga ye'elane nye abui abui na a bo te titane be na be kôlô afôla si te.

¹¹ Nde beta mbame bengôé ki a mbe valé, a kele a di mfa'a nkôl ô mbe.

¹² E nde be nga ye'elane nye, a jô na: Lôme nja'a bia e mbame bengôé, bi ke nyiine été.

¹³ Ane a nga me'ete; mimbia minsisim ve mane kui atan, mi ke nyiin e bengôé. E nde mbame bengôé ô nga yôô édo'o yee été a ke ku e mañ, tañe bengôé toyini ébaé, ane be nga mane wu e mendime me mañ été.

¹⁴ E nde bôte be mbe be ba'ale'e bengôé be nga mane tup, be ke kate foé éte e tison, a minlam minlam. Ane bôte be nga ke yene jam ebien e nga boban.

¹⁵ Ane be nga ke be Yésus, be yene fe môta mimbia minsisim a to tôtoo, a be'e ngômesan, a mbili fek, e môt a nga be'e ézu'u minsisim! Ane be nga ko woñ.

¹⁶ E bôte be nga yene jame te a mis, be nga kañete be étua jam é nga bo môta mimbia minsisim a bengôé.

¹⁷ E nde be nga ye'elane Yésus na a ke ôyap, a dañe minné mi si miap.

¹⁸ Eyoñ a dañeya éfunga été, ane môta mimbia minsisim a nga ye'elane nye na baa nye be ke.

¹⁹ Ve Yésus a nji kañese. Ane a nga viane jô nye na: Kele *nda jôé, e be bôte bôé, ô kate be foé ya bitua bi mame Nti a nga bo wo, a abim a nga wô'ô wo éngôngo.

²⁰ Eyoñ a keya, a tebe ñhe na a ke a kañete e si ya Dékapôl, bitua bi mam Yésus a nga bo nye, ane bôte bese be nga dañe fo'o semé.

Yésus a saé minga a wômôlô fe ngone Yairus

²¹ Eyoñ Yésus a dañeya éfunga été a ke kindi'i ôsôé ya yat, ane ndulu bôt a nga zu tôkan e vôm a mbe e nsa'a mañ.

²² E nde njôô nnene wua ya *aba Zambe a nga zu, a to jôé na Yairus, ayen a nga yene nye, ane a nga ku nye mebo si,

²³ a nga ye'elane nye abui a jô'ô na: Ngo jam é ne *abé abé, za'ak, ô beté nye mo, a bo *mvo'é, a nyiñ.

²⁴ Ane baa nye be nga ke. Bizu'u bi bôt ve ke bia tôñe nye, be bo'o nye yemeyeme a bametane nye.

²⁵ Nde minga éziñe kik a nga to été a kone nlôte metyi, nté mimbu awôm a mibaé,

²⁶ a ju'uya a mintaé ya ke a saéban e be besaé bôt abui, moné wé ase a maneya foé, teke fo'o yene mone mvolan, ôkon ve viane ya'a yak.

²⁷ Eyoñ a wô'ôtaneya Yésus, nde a nga ke nkunda bôt été, ve ke kuu Yésus mfa'a ya mvus, a nambe nye ngômesan.

²⁸ Amu a mbe a jô'ô na: Nge ma nambe nye ja'ane ve mengômesan étam, ma ye bo *mvo'é.

²⁹ Ane nlôte metyi ô nga tyi'i nye été été, a émien a nga wô'ôtan e nyôl jé été na a yeteya mfa'a ya ébubua ôkone jé.

³⁰ Eyoñe te Yésus a nga wô'ôtan été été na ngul éziñ é ne nkôlan e be nye, a nga tyiñelan ñhe e bôt été, a sili na: Za nye a te nambe mengômesane mam'

³¹ Ane beyé'é bé be nga jô nye na: Ye abime bôt wo yen e bameta'ane wo di, éyoñe te wo jô na: Za nye a te nambe ma'

³² A nga ke a fombô mbôma'ane na a yene minga a ne mboone jame té.

³³ Minga a nga ko ñhe woñ, a fô'ôba'an a benyeñenyeñ, éyoñ a yemeya jam e nga boban e be nye. Ane a nga zu a kute meboñe si asu Yésus a mane kate nye bebela ase.

³⁴ Ane Yésus nga jô nye na: A ngo jam e mbunane wôé ô nyiiya wo; kele ñhe *mvo'é, ébubua ôkone jôé é yeteya.

³⁵ A ngenan a kobô'ô nalé, bôte be nga so e be njôô nnen ya *aba Zambe a jô na: Ke ngo jôé é wuya, jé fo'o wo beta zu ndeñele Ñye'ele'

³⁶ Eyoñe Yésus a wô'ôya jam be nga bo be kobô'ô, e nde a jô njôô nnen ya *aba Zambe na: Te ko woñ éziñ, ô bi jôme jia ve mbunan.

³⁷ E nde a nga bo teke kañese na baa môt éziñ be ke, vengevenge ve Pierre baa Yakob, a Yôanes, monyañe Yakob.

³⁸ Eyoñ be nga ke kui e *nda be njôô nnen ya *aba Zambe, a nlôô abui éngôngôm: A bôt ba yi du, a ba ba yôn *tyiñ e yôb été abui;

³⁹ ane a nga nyiine *nda été a jô be na: Jé mia bo abim éngôngôme di, jé ke mia yôn? mongô a nji bo ñwuan, a ke zezé ôyo.

⁴⁰ Ane bôt be nga kpwe'ele nye a bo nye éwoé vioé. E nde a mane titane bôte bese a nyoñe ve ésaa mongô baa nyia, a bôt ya nsamba wé, a tulane vôme mongô a nga bôô.

⁴¹ Ane a nga bi mongô e wo a jô nye na: Talitha koumi nalé a tinane na: A mona minga, wo ma jôô nye, ve'e ôyo!

⁴² Eté été, ane mona minga a nga kôlô si a tebe tetele, a nga ke a wulu, amu a mbe mimbu awôm a mibaé. Ane bôt be nga semé beta nseman.

⁴³ E nde a nga bendé be nya mbendane na, étyi, môt a bo'o teke yeme jame te, a jô fe na be ve mongô jôm ya di.