LEVITIK 3 - Kalate Zambe Nnomo a Mfefe Mfefé Nkôñelan

Etyi'a ya nlatane ngbwa

¹ Nge mveane môt éziñ ô ne étyi'a ya nlatane ngbwa, nge a ve nyak é too nnôm nge ngal, a ye ve je asu Nti é too *mvo'é ne selem.

² A ye beté wo wé e nlô y'étyi'a jé, éyoñe te a tyi'i je *tyiñ anyiine *nda éndelé bendôba'an, a betuni, bone b'Aron, ba ye miame metyi mbôma'an a ata'a metuna'a.

³ Etyi'a ya nlatane ngbwa te, a ye nyoñ avoñ e yale *miñya a avoñ ese e ne abum été, a ve de metuna'a ma di'ibane nduan asu Nti;

⁴ mimbañe mi ôtam mibaé a avoñ da bômane mie, nalé fe avoñ e yale mevel a ndalebôbô é yale ések, nje a ye vaa bebé a mimbañe mi ôtam.

⁵ Bone b'Aron ba ye di'i biôme bite ata'a metuna'a yôp, bia lat a étyi'a ja di'ibane ngumba ja ye bebe e nja'a é ne mfutane di yôp. Etyi'a ja di'ibane nduan le a mbamba menyum e be Nti.

⁶ Nge mveane wé ô ne ntômba, ékela, nnôm nge ngal, ô too étyi'a ya nlatane ngbwa asu Nti, a ye ve wô ô too *mvo'é ne selem.

⁷ Nge a ve étoñe ntômba, a ye zuu je asu Nti.

⁸ A ye beté wo wé e nlô étyi'a te, a tyi'i je *tyiñ ôsu ya *nda éndelé bendôba'ane, a bone b'Aron ba ye miame metyi mé mbôma'an a ata'a metuna'a.

⁹ A ye nyoñ avoñ y'été, a tyi'i fe njem bebé nkoñ a nyoñe fe avoñ ese e yale *miñya a avoñ ese e ne abum été a ve bie ane metuna'a ma di'ibane nduan asu Nti,

¹⁰ wôna mimbañ mi ôtam mibaé a avoñ da bômane mie, di é yale mevel a ndalebôbô é yale ések nje a ye kandé.

¹¹ Ntuni a ye di'i biôm bite ata'a metuna'a yôp: bi ne bidi bia di'ibane nduan asu Nti.

¹² Nge mveane wé ô n'ékela, a ye zuu wô asu Nti.

¹³ A ye beté wo wé e nlô étyi'a jé, a tyi'i je *tyiñ ôsu ya *nda éndelé bendôba'ane; bone b'Aron ba ye miame metyi y'été mbôma'an a ata'a metuna'a.

¹⁴ A ye nyoñ avoñ e yale *miñya a avoñ ese e ne abum été, a ve bie ane metuna'a ma di'ibane nduan asu Nti,

¹⁵ mimbañe mi ôtam mibaé a avoñ e yale mie yôp, a di e yale mevel, nalé fe ndalebôbô é yale ések nje a ye kandé bebé a mimbañ mi ôtam.

¹⁶ Ntuni a ye di'i biôme bite ata'a metuna'a yôp. Bi ne bidi bia di'ibane nduan, bi too mbamba menyum. Avoñ ese e ne jôme Nti.

¹⁷ Jame di da ye bo mvinda ya melu mese e miaé mi bôte mienan na: E vôm ase mia ye tabe mia ye bo te di avoñ nge metyi.