LEVITIK 17 - Kalate Zambe Nnomo a Mfefe Mfefé Nkôñelan

Vôme ya ve metuna'a

¹ Nti a nga kobô Môze a jô na:

² Kobô'ô Aron, bone bé a bone b'Israél bese a jô be na: Jame Nti a nga bendé nde di:

³ Nge fam éziñ ya *nda bôt Israél ja tyi'i nnôme nyak, étoñe ntômba nge ngal ékela e minkan été nge atan,

⁴ te na a zuu nye anyiine *nda éndelé bendôba'an na a ve nye Nti ôsu ya Tabernakel wé, ba ye lañe môt ate étome metyi. A nga kuli metyi, ajô te ba ye vaa nye ézezañe bôte bé été.

⁵ Nalé ate bone b'Israél ba ye zuu mimveane miap e be Ntuni, asu be Nti, anyiine *nda éndelé bendôba'an, sa na be ve mimveane miab atan; éyoñe te fe ba ye ve Nti mimveane ya nlatane ngbwa.

⁶ Ntuni a ye sôé metyi y'été ata'a metuna'a Nti yôp, anyiine *nda éndelé bendôba'an; a ye di'i avoñ e bo mbamba ényum e be Nti:

⁷ nalé ate bone b'Israél ba ye bo te beta ve mimveane miab e be bive'ela'a beyôm bikela ya mimbia minsisim a bo bijabô a be. Miaé mise ya bone b'Israél ba ye ba'ale mvinda nyô.

⁸ Nde wo ye jô be na: Nge fame ya *nda bôte Israél nge nyô ya mintabe mi too ézezañe jab a ve mimvean mia di'ibane ngumba nge mimveane mife,

⁹ ve te zuu mie anyiine *nda éndelé bendôba'an na a ve Nti mimvean, ba ye vaa nye e bôte bé été.

Etyi te di metyi

¹⁰ Nge môt éziñe ya *nda bôte Israél nge nyô mintabe mi too ézezañe jap a di metyi m'éziñ, asu dam da ye ke môt ate e ngame yat a vaa nye ézezañe bôte bé.

¹¹ Amu ényiñe ya minsôn é ne e metyi. Me nga ve mia me ata'a metuna'a yôp, nalé ate ma ye volô mbulane nsem asu ényiñe jenan, amu ényiñ é ne e metyi été, nde metyi me ne nguleya bulu nsem.

¹² Ajô te me nga jô bone b'Israél na: Teke môt éziñ ya be mia a ye di metyi. A *ntabe ô too mia zañe fe wo ye bo te di metyi.

¹³ Nge môt éziñe ya bone b'Israél nge mintabe mi too e zañe jab a bi tit e nsôm nge ônon wo diban, a ye taté kuli vie metyi a buti me yôb a mbuluk.

¹⁴ Amu ényiñe ya nsôn ôse é ne e metyi. Ajô te me nga jô bone b'Israél na: Teke metyi ya nsôn éziñ mia ye di amu ényiñe ya nsôn ôse é ne metyi mé: môt ase a ye di me, ba ye vaa nye.

¹⁵ Môt ase ya bebialébialé nge mintabe a ye di tit metyi me nji kui atan: é too ñwuan abuk nge mbilize, a ye sôbe mengômesane mé, a émien a ye wobane mendim, a tabe fe te *mfuban a kui mamengô'é, mvuse valé nye a ye bo *mfuban.

¹⁶ Nge a bo te sôbe mengômesane mé nge wobane mendim, a ye be'e mekua y'ékobe jé.